Бізнес-навіны

БУТБ дапаможа росту паставак беларускай сельгаспрадукцыі на рынак Блізкага Усходу

Фота БУТБ

18 лютага, Мінск /Кар. БЕЛТА/. Па выніках удзелу Беларускай універсальнай таварнай біржы ў міжнароднай харчовай выстаўцы Gulfood у Дубаі дасягнуты дамоўленасці аб павелічэнні экспарту айчыннай сельгаспрадукцыі ў Аб'яднаныя Арабскія Эміраты і іншыя краіны Блізкага Усходу, паведамілі БЕЛТА ў прэс-службе таварнай біржы.

З гэтай мэтай на палях Gulfood праведзены перагаворы больш як з 30 кампаніямі-дыстрыб'ютарамі прадукцыі АПК, многія з якіх выказалі гатоўнасць выкарыстоўваць электронную платформу БУТБ для закупкі беларускага сухога малака, сухой малочнай сыроваткі і замарожаных мясных паўфабрыкатаў. Пашырэнне пула эмірацкіх імпарцёраў, акрэдытаваных на БУТБ, як лічаць эксперты, створыць перадумовы для павелічэння аб'ёмаў біржавога экспарту ў ААЭ, які ў 2024 годзе дасягнуў $43 млн.

"У мінулым годзе ўдзельнікі з ААЭ ўвайшлі ў пяцёрку буйнейшых пакупнікоў беларускіх тавараў на біржавых таргах. Прычым доля сельгаспрадукцыі ў агульным аб'ёме здзелак, заключаных эмірацкімі кампаніямі, склала 80 працэнтаў, а астатнія 20 працэнтаў забяспечыў экспарт піламатэрыялаў, - пракаменціравалі ў прэс-службе біржы. - Калі гаварыць пра тавары сельскагаспадарчай групы, то ў 2024 годзе праз біржу ў ААЭ пастаўляліся пераважна сухое абястлушчанае малако і амінакіслоты. У 2025 годзе да гэтых пазіцый дабавілася сухое натуральнае малако. Вядзецца актыўная работа па павелічэнні продажаў амінакіслот беларускай вытворчасці, з пачатку года сума біржавых здзелак па іх рэалізацыі ў ААЭ перасягнула $20,5 млн".

Прадстаўнік БУТБ таксама правёў сустрэчу з кіраўніцтвам Дубайской золата-таварнай біржы (Dubai Gold and Commodities Exchange, DGCX). Бакі дамовіліся аб устанаўленні партнёрскіх адносін і сумесным развіцці біржавога гандлю паміж Беларуссю і ААЭ.

"Гэта важны крок у развіцці інстытуцыянальнага партнёрства, які дазволіць умацаваць сувязі паміж нашымі пляцоўкамі і стварыць дадатковыя магчымасці для прыцягнення дзелавых колаў ААЭ на біржавы таварны рынак Беларусі", - звярнуў увагу памочнік старшыні праўлення БУТБ Яраслаў Кавальчук.

Паводле даных на 1 лютага, на БУТБ акрэдытаваны 33 рэзідэнты Аб'яднаных Арабскіх Эміратаў.

версія для друку

зрабіць стартавай

дабавіць у выбранае