Бізнес-навіны

БУТБ дапаможа аптымізаваць ланцужкі паставак прадукцыі з Самарскай вобласці

Фота БУТБ

22 ліпеня, Мінск /Кар. БЕЛТА/. Асаблівасці выкарыстання біржавога канала продажаў у знешнегандлёвай дзейнасці, лічбавізацыі закупак і роля біржы ва ўмацаванні дзелавых сувязей паміж суб'ектамі гаспадарання Рэспублікі Беларусь і Расійскай Федэрацыі сталі асноўнымі тэмамі парадку дня сустрэчы дэлегацыі прамысловых прадпрыемстваў Самарскай вобласці з кіраўніцтвам Беларускай універсальнай таварнай біржы. Аб гэтым паведамілі карэспандэнту БЕЛТА ў прэс-службе БУТБ.

Бакі абмеркавалі паказчыкі работы самарскіх кампаній на біржавой пляцоўцы, адзначылі рост цікавасці рэгіянальнага бізнесу да біржавых інструментаў і выдзелілі найбольш перспектыўныя таварныя напрамкі для рэалізацыі праз электронную платформу БУТБ.

"Для многіх расійскіх кампаній і ў тым ліку для таваравытворцаў Самарскай вобласці акрэдытацыя на біржавой пляцоўцы замяняе ўвесь працэс выхаду на беларускі рынак. Бо па шэрагу пазіцый, такіх як металавырабы, вугаль або шрот алейных культур, практычна ўвесь попыт сканцэнтраваны на біржы. Таму ўдзельнікі таргоў з РФ, па сутнасці, атрымліваюць гатовы канал збыту, які дазваляе гандляваць непасрэдна з беларускімі спажыўцамі, абыходзячы пасрэднікаў і мінімізуючы рызыкі", - падкрэсліў старшыня праўлення БУТБ Аляксандр Асмалоўскі.

Такога ж меркавання прытрымліваецца кіраўнік упраўлення знешнеэканамічных сувязей і міжрэгіянальнага супрацоўніцтва Міністэрства эканамічнага развіцця і інвестыцый Самарскай вобласці Аляксей Папоў. Паводле яго слоў, на БУТБ акрэдытаваны ўжо больш за 60 самарскіх кампаній, якія ўдзельнічаюць у біржавых таргах і заключаюць здзелкі. Аднак для далейшага павелічэння тавараабароту практыку выкарыстання біржавога механізма неабходна маштабаваць. "Біржа добра паказала сябе як дапаможны інструмент для аптымізацыі ланцужкоў паставак, скарачэння маркетынгавых выдаткаў і дыверсіфікацыі рынкаў збыту. Таму пры арганізацыі бізнес-місій у Беларусь мы ў абавязковым парадку ўключаем у праграму наведванне БУТБ", - расказаў Аляксей Папоў.

Па выніках перагавораў аб намеры акрэдытавацца на БУТБ і ўдзельнічаць у біржавых таргах заявіў адзін з вядучых вытворцаў падшыпнікаў Самарскай вобласці, а таксама буйная кандытарская фабрыка, якая выпускае шырокі асартымент вафельных вырабаў і зефіру. Такое супрацоўніцтва не толькі пасадзейнічае павелічэнню аб'ёмаў узаемнага гандлю Беларусі і Самарскай вобласці, але і будзе перашкаджаць паступленню на беларускі рынак кантрафактнай прадукцыі.

версія для друку

зрабіць стартавай

дабавіць у выбранае