Бізнес-навіны

БУТБ будзе супрацоўнічаць з Гандлёва-прамысловай палатай Томскай вобласці

Фота з архiва

22 жніўня, Мінск /Кар. БЕЛТА/. Беларуская ўніверсальная таварная біржа і Гандлёва-прамысловая палата Томскай вобласці заключылі пагадненне аб супрацоўніцтве ў сферы біржавога гандлю. Цырымонія падпісання дакумента адбылася ў час візіту дэлегацыі БУТБ у Томск для правядзення семінара па пытаннях выкарыстання біржавых інструментаў пры правядзенні экспартна-імпартных здзелак паміж суб'ектамі гаспадарання Беларусі і Томскай вобласці Расіі, паведамілі БЕЛТА ў прэс-службе біржы.

У пагадненні замацаваны ключавыя напрамкі ўзаемадзеяння бакоў, прыярытэтныя задачы і зоны адказнасці. У прыватнасці, акрамя абмену інфармацыяй і арганізацыі сумесных анлайн- і афлайн-мерапрыемстваў для дзелавых колаў Томскай вобласці, БУТБ і рэгіянальная гандлёва-прамысловая палата маюць намер аб'яднаць намаганні па прыцягненні на беларускую біржавую пляцоўку томскіх таваравытворцаў. Пры гэтым асноўную ўвагу плануецца засяродзіць на прадстаўніках малога і сярэдняга бізнесу, якія выпускаюць тавары, запатрабаваныя на рынку Беларусі. Размова ідзе перш за ўсё аб прадукцыі каляровай металургіі, хімічнай прамысловасці і электратэхнічных вырабах.

Чакаецца, што пашырэнне прысутнасці прадпрыемстваў прамысловага сектара Томскай вобласці на біржавых таргах БУТБ не толькі станоўча паўплывае на дынаміку тавараабароту Беларусі з гэтым рэгіёнам Расіі, але і спросціць узаемны гандаль шляхам устанаўлення прамых кантактаў паміж вытворцамі і спажыўцамі. Акрамя таго, адкрыюцца дадатковыя магчымасці для паглыблення прамысловай кааперацыі і актывізацыі ўзаемадзеяння па лініі імпартазамяшчэння.

Цяпер акрэдытаваныя на БУТБ кампаніі з Томскай вобласці ўдзельнічаюць у таргах выключна як пакупнікі піламатэрыялаў. У сувязі з гэтым яшчэ адным перспектыўным напрамкам развіцця двухбаковага біржавога гандлю стане пашырэнне наменклатуры беларускага экспарту, у тым ліку за кошт такіх пазіцый, як сухое малако, сметанковае масла, амінакіслоты і мяса буйной рагатай жывёлы.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных бірж ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае