Бізнес-навіны

БУТБ і Гандлёва-прамысловая палата Самарскай вобласці падпісалі пагадненне аб супрацоўніцтве

Фота БУТБ

22 ліпеня, Мінск /Кар. БЕЛТА/. Беларуская ўніверсальная таварная біржа і саюз "Гандлёва-прамысловая палата Самарскай вобласці" заключылі пагадненне аб супрацоўніцтве ў сферы біржавога гандлю. Цырымонія падпісання дакумента адбылася ў Мінску ў рамках прэзентацыі інвестыцыйнага і эканамічнага патэнцыялу Самарскай вобласці, паведамілі карэспандэнту БЕЛТА ў прэс-службе БУТБ.

Стратэгічнай мэтай партнёрства дзвюх арганізацый з'яўляецца забеспячэнне ўстойлівай дадатнай дынамікі біржавога тавараабароту паміж Беларуссю і Самарскай вобласцю шляхам уключэння беларускіх і самарскіх суб'ектаў гаспадарання ў рэгулярную экспартна-імпартную дзейнасць на платформе БУТБ.

Старшыня праўлення БУТБ Аляксандр Асмалоўскі звярнуў увагу на актуальнасць пагаднення ў кантэксце рэалізацыі знешнегандлёвай палітыкі Рэспублікі Беларусь, накіраванай на ўмацаванне міжрэгіянальных гандлёва-эканамічных сувязей - у першую чаргу з суб'ектамі Расійскай Федэрацыі.

"Сёння для трансгранічнага біржавога рынку характэрны тыя ж тэндэнцыі, што і для пазабіржавога, а менавіта: рэгіяналізацыя, фокус на малы і сярэдні бізнес, усталяванне прамых кантактаў паміж вытворцамі і спажыўцамі тавараў. Упэўнены, што ў партнёрстве з гандлёва-прамысловай палатай мы зможам максімальна ўключыць у біржавы гандаль прадпрымальнікаў Самарскай вобласці, прадаставіўшы ім набор эфектыўных інструментаў для работы ў Беларусі", - заявіў кіраўнік беларускай біржы.

Як адзначыў прэзідэнт ГПП Самарскай вобласці Валерый Фамічоў, пагадненне аб супрацоўніцтве з БУТБ - не простая фармальнасць, а важны крок у развіцці біржавога вектара ўзаемадзеяння з прадпрыемствамі Рэспублікі Беларусь. Сінхранізацыя намаганняў з біржай, безумоўна, надасць дадатковы імпульс гэтаму напрамку работы. "Хачу зрабіць акцэнт на тым, што сёння мы падпісалі не дэкларацыю аб намерах, а фундаментальны дакумент, які вызначае прыярытэтныя мэты і задачы нашага супрацоўніцтва з біржай, а таксама канкрэтныя практычныя вынікі, якія плануем атрымаць за кошт кансалідацыі нашых рэсурсаў", - падкрэсліў ён.

Паводле інфармацыі БУТБ, пул удзельнікаў біржавых таргоў з Самарскай вобласці цяпер налічвае 65 юрыдычных асоб і індывідуальных прадпрымальнікаў. Асноўны аб'ём здзелак у бягучым годзе прыпаў на продаж чорнага металапракату самарскай вытворчасці, у той час як у Беларусі пераважна закупляўся лом каляровых металаў.

версія для друку

зрабіць стартавай

дабавіць у выбранае