Бізнес-навіны

Буйнейшы ў Кітаі вытворца электратэхнічнага абсталявання прыйдзе са сваімі тэхналогіямі ў Беларусь

30 жніўня, Цяньцзінь /Кар. БЕЛТА/. Буйнейшы ў Кітаі вытворца электратэхнічнага абсталявання - кампанія ТВЕА - мае намер прыйсці са сваімі інвестыцыямі і тэхналогіямі ў Беларусь. Аб гэтым ішла размова ў час наведвання міністрам замежных спраў Беларусі Максімам Рыжанковым вытворчых аб'ектаў і выстаўкі кампаніі ў Цяньцзіне, перадае карэспандэнт БЕЛТА.

Па выніках наведвання кампаніі беларускай дэлегацыяй было падпісана пагадненне аб стратэгічным супрацоўніцтве паміж ДВА "Белэнерга" і ААТ "ТВЕА". З беларускага боку подпісы пад дакументам паставіў генеральны дырэктар аб'яднання Андрэй Панчанка.

"Беларуская энергасістэма - гэта высокааўтаматызаваны комплекс, які надзейна і стабільна забяспечвае нашу краіну электрычнай і цеплавой энергіяй. У бліжэйшае дзесяцігоддзе перад намі стаіць даволі складаная задача - развіццё і мадэрнізацыя энергетычнага комплексу. Узаемадзеянне з кітайскімі партнёрамі грунтуецца на трывалым фундаменце шматгадовага супрацоўніцтва", - сказаў гендырэктар.

Пасля падпісання пагаднення пачнецца далейшая дэталёвая прапрацоўка магчымасцей удзелу кітайскіх партнёраў у развіцці энергетычнага комплексу Беларусі. Прапрацоўваецца магчымасць адкрыцця кампаніяй вытворчасці па выпуску самага сучаснага абсталявання. Пляцоўка пакуль яшчэ не вызначана, усе адпаведныя пытанні будуць вырашацца на больш познім этапе. "Мы вывучылі вопыт і ўзровень вытворчасці кітайскіх партнёраў. Бачым, што гэта сусветны ўзровень", - адзначыў Андрэй Панчанка.

ТВЕА - буйнейшы ў Кітаі вытворца электратэхнічнага абсталявання для перадачы, размеркавання і трансфармацыі электраэнергіі.

версія для друку

зрабіць стартавай

дабавіць у выбранае