Бізнес-навіны

Бранцэвіч: у "Вялікім камені" створаны ўсе ўмовы для фарміравання фармацэўтычнага кластара

4 сакавіка, Мінск /Кар. БЕЛТА/. У "Вялікім камені" створаны ўсе ўмовы для фарміравання фармацэўтычнага кластара. Аб гэтым заявіла сёння намеснік міністра эканомікі Таццяна Бранцэвіч у сваім анлайн-прывітанні на цырымоніі ахвяравання капсул "Цын'і" ад ТАА "Новаэра Біятэх" Саюзу жанчын і Асацыяцыі прамысловасці Ганконга, паведамілі БЕЛТА ў прэс-службе Мінэканомікі.

"У канцы мінулага года ў Беларусі зарэгістраваны прэпарат кітайскай традыцыйнай медыцыны - капсулы "Цын'і". Гэта лякарства прызначана для прафілактыкі і лячэння наступстваў каранавіруса", - адзначыла Таццяна Бранцэвіч.

Намеснік міністра эканомікі нагадала, што фармацэўтыка і медыцынскія паслугі вызначаны ў якасці новых прыярытэтаў дзейнасці ў "Вялікім камені". Паскораны і спрошчаны парадак рэгістрацыі лякарстваў, правядзення клінічных выпрабаванняў разам з развітой сістэмай падрыхтоўкі медыцынскіх кадраў і выгаднымі прэферэнцыямі для вытворцаў даюць магчымасць сфарміраваць у парку фармацэўтычны кластар.

"Выбудоўванне ў рамках эканамічнага пояса Шаўковага шляху такіх цэнтраў і кластараў дасць магчымасць эфектыўна размяркоўваць і прымяняць існуючыя рэсурсы краін і іх кампетэнцыі, развіваць новыя тэхналогіі ў галіне медыцыны і фармацэўтыкі, забяспечваць даступнасць лякарстваў, умацоўваць грамадскае здароўе ў цэлым", - рэзюмавала Таццяна Бранцэвіч.

версія для друку

зрабіць стартавай

дабавіць у выбранае