Бізнес-навіны

БМЗ пераарыентаваўся і накіраваў грузапатокі з Адэсы і Клайпеды ў парты РФ

Фота з архiва

21 лютага, Гомель /Кар. БЕЛТА/. Беларускі металургічны завод змог пераарыентавацца і накіраваць свае грузапатокі з Адэсы і Клайпеды ў расійскія парты. Аб гэтым расказаў намеснік генеральнага дырэктара па знешнеэканамічных сувязях, збыце і кіраванні тавараправоднай сеткай ААТ "БМЗ - кіруючая кампанія холдынга "БМК" Уладзімір Чавус на сустрэчы з калектывам аднаго з цэхаў, паведамілі БЕЛТА ў прэс-службе прадпрыемства.

Паводле слоў намесніка гендырэктара, складаны 2022 год прадпрыемства адпрацавала даволі паспяхова. "І сёння нам даводзіцца працаваць у няпростых умовах для арганізацыі загрузкі вытворчасці і забеспячэння заказамі. Мы змаглі пераарыентавацца і накіраваць свае грузапатокі ў іншыя парты. У прыватнасці, сышлі з Адэсы і Клайпеды і пачалі супрацоўнічаць з расійскімі партамі", - адзначыў Уладзімір Чавус.

Ён агучыў і вынікі работы завода за студзень. Так, папярэдне, выплаўлена больш за 160 тыс. т сталі, выраблена звыш 140 тыс. т металапракату, больш за 9,5 тыс. т трубы, звыш 10 тыс. т метызнай прадукцыі.

"БМЗ па ступені аўтаматызацыі займае лідзіруючае месца на постсавецкай прасторы. Мы маем вельмі вялікую колькасць кантрольна-вымяральных прыбораў і аўтаматыкі. На кожнага супрацоўніка ўскладаецца каласальная нагрузка. Ад вашай згуртаванасці залежыць бесперабойная работа ўсяго завода. Вялікі дзякуй кожнаму - разам з кіраўніцтвам вы выдатна спраўляецеся", - сказаў Уладзімір Чавус.

ААТ "БМЗ - кіруючая кампанія холдынга "БМК" - высокатэхналагічнае прадпрыемства металургічнай галіны. Структурна складаецца са звязаных адным тэхналагічным ланцужком сталеплавільнай, пракатнай, трубнай, метызнай вытворчасцей і цэхаў інфраструктуры.

версія для друку

зрабіць стартавай

дабавіць у выбранае