Бізнес-навіны

15 жніўня, Бабруйск /Сяргей Кулягін - БЕЛТА/. ААТ "Белшына" (Бабруйск) неабходна ў 2015 годзе завяршыць комплексную мадэрнізацыю. Такую задачу паставіў перад кіраўніцтвам прадпрыемства прэм'ер-міністр Міхаіл Мясніковіч. Ён сёння азнаёміўся з ходам тэхпераўзбраення асноўнай вытворчасці, перадае карэспандэнт БЕЛТА.

На думку кіраўніка ўрада, толькі бездакорнае выкананне планаў мадэрнізацыі прадпрыемства дапаможа яму выйсці з крызісу і пачаць стабільна працаваць, нарошчваючы аб'ём вытворчасці. Пакуль эканамічная сітуацыя на беларускім шынным гіганце вымушае жадаць лепшага - спад аб'ёму вытворчасці, скарачэнне экспарту, вялікія складскія запасы гатовай прадукцыі і вялікая дэбіторская запазычанасць.

Фактычна атрымалася накладка трох праблем на гэтым прадпрыемстве, лічыць прэм'ер-міністр. Па-першае, больш за трыццаць гадоў тут ніхто як мае быць не займаўся мадэрнізацыяй. І толькі апошнія 2-2,5 года было прынята ўрадам прынцыповае рашэнне, каб мадэрнізаваць адразу тры заводы: буйнагабарытных шын, масавых шын і звышбуйнагабарытных шын. Год таму былі зацверджаны ўсе графікі і планы. На жаль, па некаторых пазіцыях пакуль ёсць адставанне.

"Што датычыцца другой групы праблем, то гэта ўплыў сусветнага крызісу, - адзначыў Міхаіл Мясніковіч. - Асабліва гэта відаць на заводзе звышбуйнагабарытных шын, які "абувае" ў асноўным кар'ерную тэхніку. Плюс да гэтага дыяганальная шына, што выпускаецца на прадпрыемстве, сёння ўжо не канкурэнтаздольная. І трэцяя праблема, што вельмі вялікая запазычанасць перад "Белшынай" трактара- і машынабудаўнікоў, якія пакуль не могуць разлічыцца з прадпрыемствам з-за ўнутраных эканамічных праблем. Таму сёння адна з галоўных задач - вырашэнне фінансавых праблем, каб аблягчыць работу прадпрыемства".

У цэлым прадпрыемства працуе пакуль дрэнна, выказаў сваё меркаванне прэм'ер-міністр. Аб'ём вытворчасці за студзень-ліпень у грашовым выражэнні склаў 70 працэнтаў адносна аналагічнага перыяду мінулага года. Таму вельмі важна ў вызначаныя ўрадам тэрміны завяршыць мадэрнізацыю трох асноўных вытворчасцей прадпрыемства і забяспечыць канкурэнтаздольнасць ААТ на ўнутраным і знешнім рынках.

Агульны аб'ём інвестыцый у мадэрнізацыю ў бліжэйшыя гады складзе амаль $430 млн. З іх $320 млн - толькі па заводзе звышбуйнагабарытных шын. "Пакуль у мяне няма сумненняў, што планы мадэрнізацыі кіраўніцтвам прадпрыемства будуць выкананы дакладна ў тэрмін, але калі гэтага не адбудзецца, - даравання нікому не будзе", - папярэдзіў кіраўнік урада.

"Акрамя таго, прадпрыемству трэба навучыцца прадаваць сваю прадукцыю, - звярнуў увагу Міхаіл Мясніковіч. - Тут апярэджваюць "Белшыну" канкурэнты, яны працуюць больш паспяхова. Таму кіраўніцтву акцыянернага таварыства трэба як мага хутчэй укараняць сучасныя маркетынгавыя тэхналогіі, каб больш актыўна папулярызаваць уласную прадукцыю на знешнім рынку".