Бізнес-навіны

Беларускія прадукты харчавання прадстаўлены на выстаўцы UzFood ва Узбекістане

Фота з архiва

29 красавіка, Мінск /Кар. БЕЛТА/. Экспазіцыя "Беларусь - смак прыроды" прадстаўлена на міжнароднай выстаўцы UzFood, якая праходзіць у Ташкенце. Экспазіцыя дэманструе інавацыйныя прадукты сямі беларускіх прадпрыемстваў харчовай галіны, паведамілі БЕЛТА на выставачным прадпрыемстве "Белінтэрэкспа" Беларускай гандлёва-прамысловай палаты.

Перадавыя распрацоўкі айчынных тэхнолагаў прадставілі на выстаўцы кіруючая кампанія холдынга "Канцэрн Брэстмясамалпрам" і яго падведамныя прадпрыемствы - адкрытыя акцыянерныя таварыствы "Лунінецкі малочны завод" і "Кобрынскі масларобна-сыраробны завод". ААТ "Бабуліна крынка" прэзентуе новыя віды сыроў з натуральнымі напаўняльнікамі. Прадпрыемствы гэтага холдынга перапрацоўваюць 85 працэнтаў малака, якое атрымліваюць у Магілёўскай вобласці, - больш за 72 тыс. т за месяц. Аб'ём штомесяц выпускаемай холдынгам малочнай прадукцыі - звыш 60 тыс. т.

Мяса ялавічыны і субпрадукты, каўбасныя вырабы і паўфабрыкаты дэманструе на выстаўцы ААТ "Ваўкавыскі мясакамбінат", а ААТ "Гродзенскі мясакамбінат" - сыравяленую каўбасу, вырабленую па эксклюзіўных італьянскіх рэцэптурах, а таксама сыравэнджаную каўбасу з чарнаслівам.

У рамках экспазіцыі "Беларусь - смак прыроды" таксама прадстаўлена абсталяванне для харчовай і перапрацоўчай прамысловасці ад ААТ "БРЭСТМАШ".

Беларускую экспазіцыю наведалі Надзвычайны і Паўнамоцны Пасол Беларусі ва Узбекістане Леанід Марыніч, Надзвычайны і Паўнамоцны пасол Турцыі ва Узбекістане Олган Бекар, намеснік міністра сельскай гаспадаркі Узбекістана Алішэр Тураеў, генеральны дырэктар кампаніі Iteca Exhibitions - арганізатара выстаўкі UzFood Нігора Хасанава і інш.

У рамках выстаўкі UzFood запланаваны шэраг кангрэсна-дзелавых мерапрыемстваў. Будзе працаваць рэтэйл-цэнтр - спецыялізаваная пляцоўка для сустрэч вытворцаў прадуктаў харчавання з закупшчыкамі і рэтэйлерамі з Узбекістана і іншых краін, якія прымаюць удзел у выстаўцы.

Арганізатар экспазіцыі "Беларусь - смак прыроды" - выставачнае ўнітарнае прадпрыемства "Белінтэрэкспа" Беларускай гандлёва-прамысловай палаты.

UzFood - найбуйнейшая харчовая выстаўка Узбекістана. У гэтым годзе ў ёй прымаюць удзел больш за 150 кампаній з 26 краін. Выстаўка прадоўжыць работу да 30 красавіка.

версія для друку

зрабіць стартавай

дабавіць у выбранае