Бізнес-навіны

Беларускія прадпрыемствы прэзентуюць патэнцыял на выстаўцы пражы і валакна ў Стамбуле

Фота УП "Белінтэрэкспа" БелГПП

26 лютага, Мінск /Кар. БЕЛТА/. Беларускія прадпрыемствы прэзентуюць патэнцыял на выстаўцы пражы і валакна Yarn Fair у Стамбуле, паведамілі карэспандэнту БЕЛТА ва УП "Белінтэрэкспа" БелГПП.

Флагманы нафтахімічнай галіны Беларусі прадстаўлены ў рамках аб'яднанага стэнда канцэрна "Белнафтахім", арганізаванага "Белінтэрэкспа".

Сярод беларускіх удзельнікаў Yarn Fair - буйнейшы вытворца нафтапрадуктаў ААТ "Нафтан", лідары ў вытворчасці тэкстыльнай прадукцыі і прадукцыі тэхнічнага прызначэння ААТ "СветлагорскХімвалакно" і ААТ "Магілёўхімвалакно", вытворца шкловалакна і прадукцыі на яго аснове ААТ "Полацк-Шкловалакно", профільнае прадпрыемства па выпуску мінеральных угнаенняў ААТ "Гродна Азот".

Айчынныя кампаніі на выстаўцы экспануюць лінейку сінтэтычных валокнаў і ніцей, палімерныя кампазіцыйныя матэрыялы, тэрмаўстойлівыя ніці, якія не маюць аналагаў у свеце, шкловалакно і прадукцыю на яго аснове, акрылавыя і поліэфірныя валокны, што выкарыстоўваюцца пры вытворчасці пражы і штучнага футра.

Дзякуючы вялікай аўдыторыі прафесійных наведвальнікаў з Еўропы, Азіі і Балкан, стамбульскі кірмаш пражы заслужана з'яўляецца буйнейшым месцам сустрэчы сусветных галіновых вытворцаў.

У рамках выстаўкі для ўдзельнікаў беларускай экспазіцыі запланаваны дзелавыя сустрэчы з прадстаўнікамі асацыяцый хімічнай і тэкстыльнай прамысловасці Турцыі, В2В-сесіі з замежнымі партнёрамі.

У перыяд з 26 па 28 лютага 2025 года стамбульскі кірмаш пражы аб'ядноўвае больш за 500 кампаній, звыш 20 тыс. спецыялістаў і прадстаўнікоў галіновых вытворцаў, якія прэзентуюць шырокі асартымент пражы і сыравіны для тэкстыльных вырабаў, тэхнічных праектаў і рашэнняў, у тым ліку экалагічна чыстыя ніткі з арганічнай бавоўны і перапрацаваных матэрыялаў. На выстаўцы шырока прадстаўлены кампаніі з Германіі, Італіі, Кітая, Расіі. Усяго ў выстаўцы прымаюць удзел вытворцы з больш як 80 краін свету.

версія для друку

зрабіць стартавай

дабавіць у выбранае