29 ліпеня, Мінск /Кар. БЕЛТА/. Беларускія піламатэрыялы на $5,1 млн прадалі ў Кітай праз Беларускую ўніверсальную таварную біржу з пачатку года, паведаміў карэспандэнту БЕЛТА прэс-сакратар БУТБ Раман Яніў.
"Па выніках экспартных біржавых таргоў 28 ліпеня ў Кітай рэалізаваны піламатэрыялы агульным аб'ёмам 8,8 тыс. куб.м на суму $1,4 млн. Усяго з пачатку года праз гандлёвую пляцоўку БУТБ на кітайскі рынак рэалізавана 32,3 тыс. куб.м пілапрадукцыі на суму $5,1 млн", - сказаў Раман Яніў.
Арганізацыя рэгулярных паставак беларускіх піламатэрыялаў у Кітай з прымяненнем механізма біржавых таргоў з'яўляецца пілотным праектам БУТБ, УП "Беллесэкспарт" (спецэкспарцёр Міністэрства лясной гаспадаркі) і РУП "Белмытнясэрвіс" (буйны лагістычны аператар). Мэта праекта - забяспечыць непасрэдны доступ беларускіх дрэваапрацоўшчыкаў на кітайскі рынак і аптымізаваць затраты на лагістыку.
"Да нядаўняга часу львіная доля айчыннай пілапрадукцыі трапляла ў Кітай апасродкавана, у асноўным праз краіны Балтыі. Гэта прыводзіла да падаражэння тавару для канчатковага спажыўца, а нашы экспарцёры ў сваю чаргу недаатрымлівалі валютную выручку. Дзякуючы сумеснаму праекту з "Беллесэкспартам" і "Белмытнясэрвісам" дзясяткі беларускіх лясгасаў змаглі без пасрэднікаў рэалізаваць сваю прадукцыю на высокамаржынальны рынак Кітая", - адзначыў начальнік аддзела міжнародных адносін і камунікацый БУТБ Аляксандр Башлій. На яго думку, патэнцыял у гэтага напрамку вельмі высокі.
ААТ "Беларуская ўніверсальная таварная біржа" створана ў 2004 годзе. Першыя таргі прайшлі ў чэрвені 2005 года. БУТБ - адна з буйнейшых таварных бірж ва Усходняй Еўропе. Галоўная функцыя біржы - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаюцца метала-, леса-, сельгаспрадукцыя, прамысловыя і спажывецкія тавары шырокай наменклатуры.