Бізнес-навіны

Беларускія экспарцёры будуць прадстаўлены на выстаўцы Gulfood у Дубаі

17 лютага, Мінск /Кар. БЕЛТА/. Беларуская экспазіцыя будзе арганізавана на буйнейшай у свеце штогадовай выстаўцы прадуктаў харчавання і напіткаў Gulfood, якая пройдзе ў Дубаі (ААЭ) з 21 па 25 лютага. Аб гэтым паведамілі БЕЛТА на выставачным прадпрыемстве "Белінтэрэкспа" БелГПП, якое з'яўляецца арганізатарам экспазіцыі.

"Нацыянальны павільён Беларусі адкрываецца на выстаўцы ў Дубаі шосты год запар пад нязменным слоганам "Беларусь - смак прыроды". У 2021 годзе плошча беларускай экспазіцыі павялічылася ў паўтара раза, уключыўшы ў сябе стэнды 25 кампаній - экспарцёраў мясной і малочнай прадукцыі, вырабаў з мяса птушкі і яек, бакалейнай і кандытарскай прадукцыі", - адзначылі ў выставачнай кампаніі. Прадпрыемствы, якія будуць прадстаўлены на выстаўцы, маюць міжнародныя сертыфікаты адпаведнасці патрабаванням ISO па сістэме менеджменту якасці і бяспекі прадуктаў харчавання, а дэманструемая прадукцыя мае сертыфікаты "Халяль". Шэраг з іх працуе ўжо на рынках краін Персідскага заліва, астатнія прыбываюць у ААЭ ў пошуку надзейных партнёраў, дадалі ў "Белінтэрэкспа".

Як паведамілі арганізатары экспазіцыі, новаўвядзеннем у бягучым годзе стане гібрыдны фармат нацыянальнага павільёна Беларусі. Так, для зручнасці наведвальнікаў створана анлайн-платформа - своеасаблівае віртуальнае люстэрка экспазіцыі, дзе прадстаўлены стэнды прадпрыемстваў-удзельнікаў. На гэтай платформе наведвальнікі выстаўкі могуць убачыць, што на той час ёсць на стэндзе, якія менавіта тавары і прадукты прадстаўлены, звязацца з прадстаўніком кампаніі і назначыць сустрэчу, а таксама ў анлайн-рэжыме сачыць за навінамі мерапрыемства.

Дзелавая праграма беларускай дэлегацыі акрамя работы непасрэдна на выстаўцы ўключае ўдзел у бізнес-брыфінгу, арганізаваным Гандлёва-прамысловай палатай Дубая, кансультацыі з агенцтвам Dubai Exports, удзел у канферэнцыі Gulfood Innovation Summit, перагаворы з Агенцтвам па стандартызацыі і метралогіі ААЭ, прэзентацыі і перагаворы з прадстаўнікамі гандлёвых сетак і імпарцёраў з дзясяткаў краін свету.

У склад беларускай дэлегацыі ўвойдуць старшыня Беларускай гандлёва-прамысловай палаты Уладзімір Улаховіч, намеснік міністра сельскай гаспадаркі і харчавання Ігар Брыло, намеснік старшыні канцэрна "Белдзяржхарчпрам" Аляксандр Якаўчыц, а таксама прадстаўнікі кіраўніцтва беларускіх прадпрыемстваў.

Выстаўка Gulfood з'яўляецца адным з самых прадстаўнічых аглядаў дасягненняў сусветнай індустрыі прадуктаў харчавання. Штогод у ёй удзельнічае каля 5 тыс. кампаній з 85 краін, а колькасць наведвальнікаў складае амаль 100 тыс. чалавек з усяго свету.

Экспазіцыя праводзіцца пры падтрымцы Беларускай гандлёва-прамысловай палаты, пасольства Беларусі ў Аб'яднаных Арабскіх Эміратах, Гандлёва-прамысловай палаты Дубая, Міністэрства сельскай гаспадаркі і харчавання Беларусі і канцэрна "Белдзяржхарчпрам".

версія для друку

зрабіць стартавай

дабавіць у выбранае