Бізнес-навіны

Беларуская тэкстыльная прадукцыя ўпершыню прададзена ва Узбекістан на біржавых таргах

Фота з архiва

10 снежня, Мінск /Кар. БЕЛТА/. Першая здзелка па продажы тэкстыльнай прадукцыі ва Узбекістан заключана на Беларускай універсальнай таварнай біржы, паведамілі БЕЛТА ў прэс-службе БУТБ.

Першапраходцам стаў беларускі вытворца трыкатажных вырабаў, які рэалізаваў на біржавых таргах чысташарсцяныя ачоскі - пабочны прадукт прадзення, які складаецца з кароткіх валокнаў шэрсці. Аб'ём здзелкі склаў 107 т, а пакупніком выступіла ўзбекістанскае прадпрыемства тэкстыльнай прамысловасці. Характэрна, што раней гэта кампанія ўдзельнічала ў біржавых таргах выключна як прадавец, пастаўляючы на беларускі рынак баваўняную пражу.

"Пашырэнне наменклатуры тавараў, што рэалізуюцца на экспартных біржавых таргах, уваходзіць у лік прыярытэтных напрамкаў знешнегандлёвай стратэгіі біржы. Таму з'яўленне новай таварнай пазіцыі ў структуры біржавога экспарту ў Узбекістан - гэта, безумоўна, станоўчая падзея ў кантэксце развіцця біржавога гандлю паміж нашымі краінамі. У бягучым годзе праз біржу на ўзбекскі рынак актыўна пастаўляюцца піламатэрыялы, мяса і мясныя субпрадукты, сухое малако, сметанковае масла, а цяпер і тэкстыльная прадукцыя. Па выніках 11 месяцаў сума здзелак па продажы беларускіх тавараў ва Узбекістан вырасла больш чым у два разы і склала $107 млн. Разам з тым доля імпартных кантрактаў ва ўзаемным тавараабароце пакуль не перавышае 1 працэнт. У асноўным гэта закупка розных відаў пражы", - расказалі ў прэс-службе таварнай біржы.

Па стане на 10 снежня 2025 года на БУТБ былі акрэдытаваны 250 рэзідэнтаў Узбекістана - з пачатку года пул узбекістанскіх карыстальнікаў беларускай біржавой пляцоўкі папоўніўся 73 кампаніямі.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае