9 чэрвеня, Масква /Эдуард Півавар - БЕЛТА/. Намеснік міністра сельскай гаспадаркі і харчавання Беларусі Аляксей Багданаў не лічыць сур'ёзнай пагрозай магчымае ўвядзенне Еўрасаюзам санкцый адносна паставак беларускіх прадуктаў харчавання. Аб гэтым ён сказаў сёння журналістам на Беларуска-азіяцкім форуме, які праходзіў у пасольстве Беларусі ў Маскве, перадае карэспандэнт БЕЛТА.
"Мы не страцілі ніякі рынак, дзякуй богу, пакуль у нас усё добра, - так адрэагаваў Аляксей Багданаў на пытанне аб пагрозе санкцый з боку ЕС. - Еўрапейскі рынак займае ў нас невялікую долю, мы лёгка заменім яго пастаўкамі на рынкі ў іншыя рэгіёны".
Паводле яго слоў, адным з такіх альтэрнатыўных рынкаў можа стаць азіяцкі. У прыватнасці, ён паведаміў, што толькі за першыя чатыры месяцы бягучага года ў параўнанні з аналагічным перыядам мінулага года Беларусь павялічыла пастаўкі прадуктаў харчавання ў краіны Азіі на 60 працэнтаў.