Бізнес-навіны

22 мая, Мінск /Юлія Огнева - БЕЛТА/. Беларусь зацікаўлена ў пашырэнні наменклатуры экспарту прадукцыі ў М'янму. Аб гэтым заявіў сёння прэм'ер-міністр Андрэй Кабякоў на сустрэчы з парламенцкай дэлегацыяй М'янмы, перадае карэспандэнт БЕЛТА.

"Мы зацікаўлены ў далейшым пашырэнні наменклатуры экспарту сваёй прадукцыі ў М'янму, у тым ліку за кошт мінеральных угнаенняў, кар'ернай тэхнікі, металапрадукцыі, дызель-генератараў, радыёэлектронных тавараў, шын, вырабаў нафтахімічнага комплексу, харчовай і фармацэўтычнай прадукцыі", - адзначыў Андрэй Кабякоў. Паводле яго слоў, прапрацоўваюцца магчымасці паставак беларускай грузапасажырскай і дарожна-будаўнічай тэхнікі для патрэб адпаведных галін народнай гаспадаркі, спецтэхнікі і абсталявання, лекавых сродкаў. Прэм'ер-міністр канстатаваў, што перспектыўным напрамкам ва ўзаемадзеянні паміж Беларуссю і М'янмай таксама з'яўляецца ваенна-тэхнічнае супрацоўніцтва. На думку Андрэя Кабякова, інтарэс для беларускіх экспарцёраў можа мець прадукцыя, якая з'яўляецца асновай экспарту М'янмы: рыс, бабовыя, морапрадукты, каўчук, каляровыя металы, каштоўныя камяні.

Прэм'ер-міністр адзначыў, што супрацоўніцтва з М'янмай развіваецца дынамічна. Нягледзячы на тое, што аб'ём узаемнага тавараабароту невялікі, тым не менш, ёсць тэндэнцыя яго росту. Назіраецца актывізацыя беларуска-м'янманскага супрацоўніцтва ў шэрагу перспектыўных галін, вывучаецца магчымасць удзелу беларускіх спецыялістаў у праектах у сферы энергетыкі, прамысловай распрацоўкі радовішчаў карысных выкапняў, супрацоўніцтва ў галіне інавацыйных тэхналогій, сельскай гаспадаркі.

"Мы бачым сваю задачу ў тым, каб актывізаваць узаемавыгаднае супрацоўніцтва ва ўсіх галінах. Пры гэтым падкрэсліваю, што развіццё адносін з нашай краінай - гэта і выхад М'янмы на рынак Еўразійскага эканамічнага саюза (ЕАЭС). Ужо цяпер наша інтэграцыйнае аб'яднанне вядзе перагаворы аб стварэнні свабоднай зоны гандлю з членамі АСЕАН праз В'етнам", - канстатаваў кіраўнік беларускага ўрада.

Андрэй Кабякоў выказаў надзею, што ўсе дамоўленасці, дасягнутыя ў час візіту, будуць рэалізаваны ў поўным аб'ёме, урад Беларусі гатовы аказаць ўсебаковую падтрымку м'янманскаму боку па любых праектах. "Выказваю ўпэўненасць у тым, што М'янма стане для Беларусі надзейным і ўплывовым стратэгічным партнёрам у рэгіёне Паўднёва-Усходняй Азіі. Мы гатовы абмеркаваць любыя пытанні, якія цікавяць", - адзначыў Андрэй Кабякоў.