Бізнес-навіны

1 верасня, Мінск /Кар. БЕЛТА/. Беларусь з 1 верасня зніжае экспартныя пошліны на нафту і нафтапрадукты, што вывозяцца за межы мытнай тэрыторыі Мытнага саюза. Гэта прадугледжана пастановай Савета Міністраў ад 27 жніўня 2014 года нумар 837, паведамляе БЕЛТА.

Так, стаўка экспартнай пошліны на сырую нафту з 1 верасня зніжаецца з $388,4 да $367,6 за 1 т. Пошліна на прамагонны бензін і таварныя бензіны цяпер складае $330,8 за 1 т (раней $349,5 за 1 т), на лёгкія, сярэднія дыстыляты - $242,6 за 1 т ($256,3 за 1 т). Такая ж стаўка пошліны дзейнічае цяпер адносна бензолу, талуолу, ксілолаў, мазуту, змазачных і іншых масел, адпрацаваных нафтапрадуктаў, вазеліну і парафіну, нафтавага коксу (акрамя кальцыніраванага) і бітуму.

Пошліна на дызельнае паліва зніжана з $252,4 да $238,9 за 1 т, на звадкаваныя вуглевадародныя газы яна павялічана з $147,4 да $221 за 1 т.

Дакумент уносіць адпаведныя змяненні ў пастанову Савета Міністраў нумар 1932 ад 31 снежня 2010 года, у якой ішла размова аб устанаўленні ставак вывазных мытных пошлін адносна сырой нафты і асобных катэгорый тавараў, выпрацаваных з нафты.