Бізнес-навіны

21 лістапада, Мінск /Кар. БЕЛТА/. Беларусь прапануе Туркменістану стварыць вытворчую кааперацыю ў сферы лёгкай прамысловасці. Аб гэтым 20 лістапада ў эфіры тэлеканала "Беларусь 1" заявіў прэм'ер-міністр Беларусі Міхаіл Мясніковіч, які знаходзіцца з візітам у Ашхабадзе, паведамляе БЕЛТА.

"Можна зрабіць глыбокую прамкааперацыю, а лепш, калі гэта будзе сумесная кампанія, гэта значыць некалькі прадпрыемстваў створаць трэцяе і будуць аплачваць энергію 50 на 50. Мы куплялі б (у Туркменістане. - Заўвага БЕЛТА), дапусцім, пражу, палотны, магчыма, штосьці з гатовага, рабілі б у нас другасную апрацоўку і ўваходзілі б разам у Еўропу", - сказаў Міхаіл Мясніковіч. Такім чынам вырашаліся б пытанні рэалізацыі прадукцыі, а прыбытак удзельнікі кааперацыі дзялілі б прапарцыянальна ўкладам, прапанаваў беларускі прэм'ер.