Бізнес-навіны

Беларусь паступова дыверсіфікуе экспарт тавараў у Францыю

5 жніўня, Парыж /Аліна Грышкевіч - БЕЛТА/. Беларусь паступова дыверсіфікуе экспарт тавараў у Францыю. Як паведамілі карэспандэнту БЕЛТА ў пасольстве Беларусі ў Францыі, калі ў пачатку года назіралася падзенне экспарту, то ў другой палове пачалося яго павелічэнне.

Дыверсіфікацыя экспарту - важны напрамак нарошчвання ўзаемнага тавараабароту. У гэтым годзе пачаты пастаўкі ў Францыю бясшвовых труб з чорных металаў, драўнянага вугалю, ёмістасцей з чорных металаў для сціснутага і звадкаванага газу, калійных угнаенняў, частак машын для апрацоўкі інфармацыі, паветраных і вакуумных помпаў, кампрэсараў і вентылятараў, жаночага трыкатажнага адзення.

У мэтах стварэння перадумоў для павелічэння тавараабароту значна актывізаваны кантакты паміж дзелавымі коламі Францыі і Беларусі. У прыватнасці, у студзені адбыўся візіт у адказ дэлегацыі беларускіх дзелавых колаў у Францыю на чале з першым намеснікам прэм'ер-міністра Уладзімірам Сямашкам. Сведчаннем росту цікавасці французскіх дзелавых колаў да супрацоўніцтва з Беларуссю з'яўляецца той факт, што ў сустрэчы ў асацыяцыі французскіх прадпрымальнікаў МЕДЕФ прынялі ўдзел 45 кампаній і арганізацый гэтай краіны. У выніку праведзенай работы ў лютым гэтага года Беларусь была ўключана ў групу краін, на якія распаўсюджваюцца гарантыі французскага ўрада па экспартных рызыках у памеры 500 млн. еўра. Дзякуючы гэтаму падпісана рамачнае пагадненне паміж французскай кампаніяй і Мінгарвыканкамам аб будаўніцтве бальніцы на 1200 ложкаў і шэрага спартыўных збудаванняў.

Прынятыя меры далі магчымасць забяспечыць устойлівую дынаміку росту экспарту ў Францыю. Пры гэтым у дыпмісіі адзначылі, што з улікам значнасці тавараў лёгкай прамысловасці для Беларусі, ёмістасці і спецыфікі французскага рынку патрабуецца рэгулярны ўдзел беларускіх прадпрыемстваў у гэтай галіне ў вядучых выставачных мерапрыемствах у Францыі. Акрамя таго, немалыя магчымасці існуюць для нарошчвання паставак беларускай дрэваапрацоўчай і сельскагаспадарчай прадукцыі, прасоўванню якой на французскі рынак таксама не ў малой ступені садзейнічаў бы ўдзел у буйных міжнародных выстаўках.

версія для друку

зрабіць стартавай

дабавіць у выбранае