28 лютага, Мінск /Кар. БЕЛТА/. Беларусь паставіць у Зімбабвэ абсталяванне для апрацоўкі алмазаў на $30 млн, паведамляе БЕЛТА са спасылкай на газету The Herald.
Абсталяванне будзе пастаўлена ў адрас кансалідаванай алмазнай кампаніі Зімбабвэ (ZCDC) у бліжэйшы час. Пастаўка ажыццяўляецца па крэдытным дагаворы праз Рэзервовы банк Зімбабвэ і накіравана на мадэрнізацыю алмазаздабыўной прамысловасці.
"Гэта адна з некалькіх пазык, якія Зімбабвэ атрымлівае ад Беларусі для падтрымкі вытворчага сектара", - адзначаецца ў The Herald. Дадатковае абсталяванне дасць магчымасць перапрацоўваць алмазы, здабытыя не толькі на россыпных, але і на карэнных радовішчах. "Здзелка праведзена ўжо, і хутка на месца прыбудзе каманда спецыялістаў з Беларусі, каб ацаніць, як яны будуць устанаўліваць абсталяванне", - піша газета са спасылкай на топ-менеджара ZCDC Рэгі Ньяшану.
У Беларусі ёсць уласныя магутнасці па агранцы натуральных і штучных алмазаў на прадпрыемстве "Крышталь" у Гомелі. Сыравіна для яго пастаўляецца з-за мяжы.