Бізнес-навіны

Беларусь і Ізраіль плануюць правесці ў Мінску форум па ІКТ, бія- і нанатэхналогіях

Фота з архiва

30 жніўня, Мінск /Кар. БЕЛТА/. Беларусь і Ізраіль плануюць правесці ў Мінску першы форум высокіх тэхналогій і інавацый па інфармацыйна-камунікацыйных тэхналогіях, інавацыйных матэрыялах, бія- і нанатэхналогіях. Такую ініцыятыву выказаў старшыня Дзяржаўнага камітэта па навуцы і тэхналогіях Беларусі Аляксандр Шумілін у час сустрэчы з Надзвычайным і Паўнамоцным Паслом Ізраіля Алексам Гольдман-Шайманам, паведамілі БЕЛТА ў прэс-службе ДКНТ.

Плануецца, што ў рабоце беларуска-ізраільскага форуму прымуць удзел нашы вучоныя, прадстаўнікі ВНУ і навуковых цэнтраў.  Асаблівую ўвагу на форуме плануецца ўдзяліць перспектыўным напрамкам навуковага супрацоўніцтва і пашырэнню навукаёмістай прадукцыі. "Цяпер завяршаецца рэалізацыя 4 беларуска-ізраільскіх навукова-тэхнічных праектаў у галіне лічбавай сельскай гаспадаркі, а таксама ў сферы распрацоўкі метадалогіі і мадэлей для кіравання навукова-тэхнічнымі працэсамі", - расказалі ў прэс-службе.

Улічваючы поспехі Ізраіля як сусветнага лідара ў венчурнай дзейнасці, бакі абмеркавалі развіццё супрацоўніцтва па гэтым напрамку, а таксама магчымасці прымянення ізраільскага вопыту пры пабудове венчурнай экасістэмы ў Беларусі.

Акрамя таго, у сустрэчы прыняў удзел генеральны дырэктар Нацыянальнага цэнтра інтэлектуальнай уласнасці Уладзімір Рабаволаў. Былі абмеркаваны і пытанні пашырэння супрацоўніцтва з ізраільскімі калегамі ў сферы інтэлектуальнай уласнасці.

Беларуска-ізраільскае навукова-тэхнічнае ўзаемадзеянне развіваецца ў адпаведнасці з міжурадавым пагадненнем аб супрацоўніцтве ў галіне адукацыі, навукі і культуры і пагадненнем паміж ДКНТ Беларусі і Міністэрствам навукі і тэхналогій Ізраіля ад 21 мая 2018 года.

версія для друку

зрабіць стартавай

дабавіць у выбранае