Бізнес-навіны
Беларусь і Таджыкістан знайшлі новую сферу ўзаемнага інтарэсу - перапрацоўку скураной сыравіны
Фота з архiва
19 кастрычніка, Мінск /Кар. БЕЛТА/. Беларусь і Таджыкістан знайшлі новую сферу ўзаемнага інтарэсу - перапрацоўку скураной сыравіны. Айчынныя спецыялісты накіроўваюцца ў гэту краіну, каб вывучыць патэнцыял сыравіны і магчымасць стварэння сумеснай вытворчасці. Аб гэтым паведаміла старшыня канцэрна "Беллегпрам" Таццяна Лугіна ў праекце "Па факце: рашэнні Першага" на YouTube-канале БЕЛТА.
Яна звярнула ўвагу, што лёгкая прамысловасць для Таджыкістана з'яўляецца адной з ключавых галін у стратэгіі развіцця краіны. І таджыкскі бок звярнуўся да беларускага з просьбай дапамагчы ў арганізацыі паглыбленай перапрацоўкі скураной сыравіны.
"У бліжэйшы час два беларускія спецыялісты будуць накіраваны ў Таджыкістан. Там правядуць маніторынг, - сказала кіраўнік "Беллегпрама". - Даволі вялікі аб'ём скураной сыравіны ёсць на таджыкскай зямлі - 1,5 тыс. галоў буйной рагатай жывёлы за год, іх шкуры можна выкарыстоўваць як матэрыял".
Аднак глыбокай перапрацоўкі такой сыравіны ў краіне няма. З мінімальнай апрацоўкай шкуры масава адпраўляюць у Кітай. "Таму яны вельмі зацікаўлены наладзіць у сябе вытворчасць па глыбокай перапрацоўцы. Аб гэтым гаварыў і Прэзідэнт Таджыкістана (на сустрэчы з Прэзідэнтам Беларусі Аляксандрам Лукашэнка ў Душанбэ. - Заўвага БЕЛТА). Мы разумеем, што ў беларусаў ёсць кампетэнцыі па перапрацоўцы тавару, таму мы сабе паставілі кароткатэрміновую задачу паглядзець, што за віды шкур, іх якасць і таўшчыню. Паглядзім, ці дапаможам калегам выбудаваць бізнес па перапрацоўцы шкур і давядзенні да гатовага скуртавару. Магчыма, і нам гэта спатрэбіцца для разнастайнасці свайго асартыментнага рада гатовых скур", - адзначыла Таццяна Лугіна.
"Гэта тэма ўзята намі на ўзбраенне, у прапрацоўку і для далейшага ўзаемадзеяння, адпрацоўкі бізнес-мадэлі, калі атрымаецца, з нашымі калегамі", - дадала яна.
Гаворачы ў цэлым аб Таджыкістане, кіраўнік канцэрна падкрэсліла, што беларускіх спецыялістаў там сустракаюць вельмі дружалюбна, з гатоўнасцю да ўзаемадзеяння. Да таго ж беларусы і таджыкі, на яе думку, маюць шэраг падобных рыс - яны добрыя, шчырыя, працавітыя, адкрытыя для супрацоўніцтва, у некаторай ступені наіўныя. "Адкрытасць, цеплыня, даверлівасць і працавітасць таджыкскага народа - яны больш за ўсё падкупляюць. І наша жаданне па развіцці бізнесу, узаемадзеянні з гэтай краінай вельмі вялікая. З такімі людзьмі хочацца будаваць бізнес, разумеючы, што хітрасці там няма", - сказала Таццяна Лугіна.
версія для друку
зрабіць стартавай
дабавіць у выбранае