Бізнес-навіны

Беларусь і Расія абмеркавалі супрацоўніцтва ў сферы экспартнага кантролю

16 ліпеня, Мінск /Кар. БЕЛТА/. Сёння ў Маскве адбыліся перагаворы старшыні Дзяржаўнага ваенна-прамысловага камітэта Рэспублікі Беларусь Дзмітрыя Пантуса і дырэктара Федэральнай службы па тэхнічным і экспартным кантролі Расіі Уладзіміра Селіна. Аб гэтым БЕЛТА паведамілі ў Дзяржкамваенпраме.

У ходзе перагавораў з удзелам прадстаўнікоў Дзяржкамваенпрама, ФСТЭК і МЗС Расіі бакі разгледзелі пытанні ўдасканалення механізмаў экспартнага кантролю ў рамках Саюзнай дзяржавы, якія ўяўляюць узаемную цікавасць, а таксама намецілі асноўныя напрамкі супрацоўніцтва на бліжэйшую перспектыву. 

Удзельнікі сустрэчы асобна адзначылі, што за доўгія гады ўзаемадзеяння паміж Дзяржкамваенпрамам і ФСТЭК Расіі склаліся цудоўныя адносіны, якія дазваляюць аператыўна вырашаць узнікаючыя праблемы.

Па выніках праведзеных перагавораў старшынёй Дзяржкамваенпрама Дзмітрыем Пантусам і дырэктарам ФСТЭК Расіі Уладзімірам Селіным падпісаны пратакол да пагаднення паміж урадамі Расійскай Федэрацыі і Рэспублікі Беларусь аб адзіным парадку экспартнага кантролю ад 13 красавіка 1999 года.

Гэты дакумент засноўвае механізм двухбаковых рэгулярных кансультацый па пытаннях экспартнага кантролю - абмен інфармацыяй аб змяненні заканадаўства бакоў; абмен інфармацыяй аб актуальных рызыках і пагрозах пры рэалізацыі канкрэтных знешнегандлёвых аперацый; разгляд пытанняў удасканалення механізмаў экспартнага кантролю і аптымізацыі экспартна-кантрольных патрабаванняў для сумесных праектаў у рамках Саюзнай дзяржавы і інтэграцыйных праграм; актуальнае аказанне дапамогі па абароне законных правоў і інтарэсаў суб'ектаў гаспадарчай дзейнасці.

Падпісанне пратакола дазваляе вывесці супрацоўніцтва паміж нашымі краінамі ў галіне экспартнага кантролю на новы ўзровень.

версія для друку

зрабіць стартавай

дабавіць у выбранае