Бізнес-навіны

19 чэрвеня, Масква /Кар. БЕЛТА/. Беларусь і дзяржкарпарацыя "Расатам" абмеркавалі сумесную работу для запуску першага энергаблока будуемай у Астраўцы атамнай электрастанцыі ў 2019 годзе. Аб гэтым паведаміў сёння журналістам намеснік прэм'ер-міністра Беларусі Уладзімір Сямашка па выніках сустрэчы з генеральным дырэктарам "Расатаму" Аляксеем Ліхачовым на палях форуму "Атамэкспа" ў Маскве, перадае карэспандэнт БЕЛТА.

Першы энергаблок плануецца ўвесці ў эксплуатацыю ў 2019 годзе (з улікам інцыдэнту з корпусам рэактара ў 2016 годзе), другі - у 2020-м, нагадаў віцэ-прэм'ер. "На сённяшняй сустрэчы абмяркоўвалі, як ідзе работа, каб блокі былі ўведзены ў эксплуатацыю ў гэтыя тэрміны. Мы сышліся, што трэба ўзмацняць работу на першым блоку", - растлумачыў Уладзімір Сямашка.

У бліжэйшы час на пляцоўцы будаўніцтва станцыі ў Астраўцы пройдзе пасяджэнне штаба, на якім з удзелам расійскага боку будуць абмяркоўвацца ход будаўніцтва, тэрміны пастаўкі абсталявання. У прыватнасці, размова будзе ісці аб работах на ключавых аб'ектах, якія вызначаюць тэрміны ўводу энергаблокаў у эксплуатацыю.

Беларуская АЭС будуецца па расійскім праекце АЭС-2006 за 18 км ад Астраўца (Гродзенская вобласць). Яна будзе складацца з двух энергаблокаў магутнасцю 1200 МВт кожны. Першы энергаблок плануецца ўвесці ў эксплуатацыю ў 2019 годзе, другі - у 2020-м.