Бізнес-навіны

Беларусь і Інданезія падпішуць мемарандум аб супрацоўніцтве ў машынабудаўнічай галіне

2 лютага, Мінск /Кар. БЕЛТА/. Мемарандум аб развіцці супрацоўніцтва і ўзаемнай падтрымцы ў развіцці гандлёва-эканамічных адносін падпішуць 3 лютага Нацыянальны цэнтр маркетынгу МЗС Беларусі і аб'яднанне Indonesia Trade, Tourism and Investment Club (ITTIC) у рамках беларуска-інданезійскай відэаканферэнцыі. Аб гэтым БЕЛТА паведамілі ў прэс-службе цэнтра.

Мерапрыемства адбудзецца пры падтрымцы пасольства Беларусі ў Інданезіі і будзе прысвечана пытанням развіцця супрацоўніцтва паміж краінамі ў галіне машынабудавання.

"Інданезія з'яўляецца вельмі важным партнёрам Беларусі ў рэгіёне Паўднёвай Азіі. Дэманструючы ўстойлівыя тэмпы эканамічнага развіцця, гэта краіна ўваходзіць у топ-20 буйнейшых эканомік свету. Акрамя таго, Інданезія займае адну з вядучых пазіцый па аб'ёме ўнутранага рынку з насельніцтвам больш за 200 млн чалавек. Гэта краіна з развітой індустрыяй, і ў нас ужо ёсць вопыт паставак БЕЛАЗаў і іншай тэхнікі на гэты рынак. Наша задача - пашыраць сваю эканамічную прысутнасць у гэтым рэгіёне", - растлумачыў дырэктар Нацыянальнага цэнтра маркетынгу МЗС Валерый Садоха.

Ён адзначыў, што ў Інданезіі знаходзіцца штаб-кватэра АСЕАН, якая аб'ядноўвае 10 краін Паўднёва-Усходняй Азіі. "Гэта пагадненне адкрые для нас магчымасць на прававой аснове актывізаваць кантракты, абменьвацца інфармацыяй па двухбаковых экспартна-імпартных пастаўках і паглыбляць супрацоўніцтва паміж нашымі краінамі", - падкрэсліў дырэктар.

У ходзе відэаканферэнцыі адбудуцца прэзентацыі беларускіх машынабудаўнічых кампаній і іх прадстаўніцтваў у Паўднёва-Усходняй Азіі, такіх як ААТ "АМКАДОР", BELAZIA PTE.LTD (прадстаўніцтва ААТ "БЕЛАЗ"), ТАА СП "МАЗ Азія" (прадстаўніцтва ААТ "МАЗ") і Beltyre Asia Pte. Ltd. (прадстаўніцтва ААТ "Белшына").

версія для друку

зрабіць стартавай

дабавіць у выбранае