Бізнес-навіны

Беларусь і Эфіопія прапрацоўваюць стварэнне сумесных прадпрыемстваў па зборцы сельгастэхнікі

29 ліпеня, Мінск /Кар. БЕЛТА/. Беларусь і Эфіопія прапрацоўваюць стварэнне сумесных прадпрыемстваў па зборцы сельгастэхнікі. Аб гэтым пасля сустрэчы ў Прэзідэнта Беларусі заявіў журналістам міністр замежных спраў Эфіопіі Гедыён Тыматэвас, перадае карэспандэнт БЕЛТА.

"Цяпер паміж нашымі краінамі ідзе канкрэтная прапрацоўка пытання стварэння на тэрыторыі Эфіопіі сумесных прадпрыемстваў па зборцы беларускай сельскагаспадарчай тэхнікі з выкарыстаннем беларускіх абсталявання і тэхналогій. У далейшым мы спадзяёмся, што сабраная на тэрыторыі нашай краіны тэхніка зможа прадавацца ў іншыя краіны Афрыканскага кантынента. Спадзяюся, што перагаворы ў гэтай галіне будуць завершаны ў самым бліжэйшым будучым", - сказаў міністр.

Ён адзначыў, што беларуская тэхніка ў Эфіопіі мае вельмі добрую рэпутацыю. "Гэта тэхніка вельмі надзейная, даўгавечная, лёгкая ў эксплуатацыі. Толькі пазітыўныя водзывы аб вашай тэхніцы ў нашых фермераў", - падкрэсліў Гедыён Тыматэвас.

У Эфіопіі разлічваюць, што супрацоўніцтва паміж кампаніямі дзвюх краін можа прынесці вельмі шмат выгод. Тым больш што Эфіопія з'яўляецца членам Афрыканскага саюза, штаб-кватэра якога знаходзіцца ў сталіцы краіны Адыс-Абебе.

"Па сутнасці, сталіца нашай краіны з'яўляецца дыпламатычнай сталіцай усяго Афрыканскага кантынента. Паміж краінамі Афрыканскага саюза існуюць пагадненні аб свабодным гандлі. Такім чынам тэхніка, якая будзе вырабляцца на тэрыторыі Эфіопіі, будзе свабодна прадавацца ў іншых краінах саюза", - сказаў кіраўнік МЗС Эфіопіі.

Што датычыцца развіцця супрацоўніцтва ў цэлым, бакі маюць намер сканцэнтраваць намаганні на ўмацаванні эканамічных сувязей, інвестыцыйным узаемадзеянні. Эфіопія зацікаўлена ў мадэрнізацыі з дапамогай Беларусі свайго сельскагаспадарчага сектара.

Яшчэ адзін традыцыйны напрамак - развіццё супрацоўніцтва ў галіне навукі і адукацыі. Ужо цяпер у Беларусі вучыцца даволі шмат студэнтаў з Эфіопіі.

версія для друку

зрабіць стартавай

дабавіць у выбранае