Бізнес-навіны

23 чэрвеня, Масква /Эдуард Півавар - БЕЛТА/. Беларусь і Чувашыя будуць развіваць больш цесную прамысловую кааперацыю, у тым ліку паміж вытворцамі спецыяльнага абутку, аўтамабільнай, сельскагаспадарчай, дарожна-будаўнічай і камунальнай тэхнікі. Дамоўленасць аб гэтым дасягнута ў Чэбаксарах на пасяджэнні рабочай групы па пашырэнні навукова-тэхнічных, гандлёва-эканамічных і культурных сувязей паміж Беларуссю і Чувашыяй, паведамілі БЕЛТА ў прэс-службе пасольства Беларусі ў Расіі.

"Беларусь з'яўляецца стратэгічным партнёрам Чувашыі. За апошнія тры гады таварабарот павялічыўся ў 2,5 раза. Паміж прадпрыемствамі Чувашыі і Беларусі склаліся цесныя партнёрскія адносіны", - сказаў на пасяджэнні часова выконваючы абавязкі кіраўніка Чувашыі Міхаіл Ігнацьеў. Ён выказаў гатоўнасць рабіць далейшыя захады па развіцці ўзаемавыгадных канструктыўных адносін.

Міністр прамысловасці Віталь Воўк, які ўзначальваў беларускую дэлегацыю, таксама заявіў аб гатоўнасці беларускага боку да пашырэння гандлёва-эканамічных адносін з Чувашыяй. Ён праінфармаваў аб стварэнні ўмоў для ўмацавання гандлёвых адносін і выказаў упэўненасць, што ў бліжэйшым будучым удасца рэалізаваць усе намечаныя планы.

Акрамя прамкааперацыі перспектыўным напрамкам двухбаковага супрацоўніцтва на пасяджэнні названа лясная гаспадарка. Размова ішла не толькі аб набыцці тэхнікі, але і аб супрацоўніцтве ў навуцы, племянной справе, насенняводстве, селекцыі сельскагаспадарчых культур. "У сельскай гаспадарцы патэнцыял для супрацоўніцтва вялізны: бачу і стратэгічную, і тактычную перспектыву. Чувашыя бачыць у Рэспубліцы Беларусь надзейнага і выгаднага партнёра", - падкрэсліў Міхаіл Ігнацьеў.