Бізнес-навіны

Беларусь і Чэлябінская вобласць плануюць развіваць супрацоўніцтва ў прамысловай рабатызацыі

11 жніўня, Мінск /Кар. БЕЛТА/. Беларусь і Чэлябінская вобласць плануюць развіваць супрацоўніцтва ў прамысловай рабатызацыі. Аб гэтым пасля сустрэчы з Прэзідэнтам Беларусі заявіў журналістам губернатар Чэлябінскай вобласці Аляксей Тэкслер, перадае карэспандэнт БЕЛТА.

Як расказаў губернатар, на сустрэчы з кіраўніком дзяржавы абмяркоўваліся новыя напрамкі супрацоўніцтва паміж Беларуссю і Чэлябінскай вобласцю. У прыватнасці, размова ішла аб прамысловай рабатызацыі. Паводле слоў Аляксея Тэкслера, Чэлябінская вобласць з'яўляецца адной з лідзіруючых у гэтай сферы.

"На базе чэлябінскага ўніверсітэта створаны адпаведныя кафедры, якія рыхтуюць спецыялістаў. Ёсць цэнтры кампетэнцый, якія дапамагаюць рабіць аўдыт і ўкараняць прамысловую робататэхніку ў любых прамысловых прадпрыемствах", - падкрэсліў ён.

На думку Аляксея Тэкслера, патэнцыял супрацоўніцтва Чэлябінскай вобласці і Беларусі ў гэтай сферы даволі высокі: "Мы дамовіліся, што будзем прыцягваць партнёраў з Беларусі спачатку для інтэграцыі ў вытворчасць нашых робатаў, а потым, магчыма, і для зборкі робатаў у Рэспубліцы Беларусь".

Губернатар назваў і іншыя напрамкі супрацоўніцтва гэтага расійскага рэгіёна з Беларуссю. Размова ішла аб самым шырокім спектры сфер, у якіх варта развіваць узаемадзеянне. "Нам ёсць чым дапоўніць адзін аднаго ў частцы ўзаемадзеяння ў сельскай гаспадарцы. Мы нарошчваем пастаўкі прадуктаў харчавання з Рэспублікі Беларусь, адпаведнага абсталявання, развіваем нашы малочныя фермы", - назваў адзін з перспектыўных напрамкаў Аляксей Тэкслер.

Кіраўнік расійскага рэгіёна абмяркоўваў з беларускім лідарам і гуманітарнае супрацоўніцтва. У прыватнасці, абмяркоўваліся культурны абмен і ўзаемадзеянне ВНУ. Паміж Беларуссю і Чэлябінскай вобласцю наладжаны прамыя авіязносіны. "Гэта дае магчымасць нашым людзям актыўна ўзаемадзейнічаць - і ў частцы бізнесу, і ў турыстычнай частцы. Таму запрашаем усіх жыхароў Рэспублікі Беларусь да нас, у Чэлябінскую вобласць", - сказаў Аляксей Тэкслер. Акрамя таго, дадаў ён, адзначаецца рост колькасці турыстаў, якія прыбываюць у Беларусь з Чэлябінскай вобласці.

версія для друку

зрабіць стартавай

дабавіць у выбранае