Бізнес-навіны

Банк развіцця і Беларускі інавацыйны фонд падпісалі пагадненне аб супрацоўніцтве

Дзяніс Каржыцкі і Андрэй Жышкевіч

8 верасня, Мінск /Кар. БЕЛТА/. Банк развіцця і Беларускі інавацыйны фонд падпісалі пагадненне аб супрацоўніцтве. Пад дакументам свае подпісы паставілі старшыня праўлення банка Андрэй Жышкевіч і дырэктар фонду Дзяніс Каржыцкі, перадае карэспандэнт БЕЛТА.

"ДКНТ і Беларускі інавацыйны фонд - вельмі важныя інстытуты ў краіне, якія працуюць з фінансаваннем новых інавацыйных праектаў, што часта патрабуюць значных фінансавых рэсурсаў. Банк развіцця як буйнейшы інстытут, што дазваляе прыцягваць менавіта інвестыцыйныя крэдыты прадпрыемствам, дасць магчымасць ДКНТ і інавацыйнаму фонду фінансаваць больш праектаў", - сказаў кіраўнік банка Андрэй Жышкевіч.

Ён адзначыў, што гэта таксама перспектыўна для Банка развіцця, паколькі нядаўнія змяненні ў мандат банка даюць магчымасць працаваць не толькі з праектамі, уключанымі ў дзяржпраграмы, але і самастойна выбранымі праектамі. "Таму мы таксама цяпер зацікаўлены ў пошуку і атрыманні ва ўласны партфель перспектыўных і цікавых праектаў. Важна, каб гэты дакумент не застаўся ў выглядзе мемарандума на паперы, а стаў сапраўды асновай для практычных крокаў", - падкрэсліў старшыня праўлення банка.

Андрэй Жышкевіч расказаў, што яны будуць узаемадзейнічаць як два незалежныя суб'екты, пры неабходнасці аб'ядноўваючы свае магчымасці ў фінансаванні канкрэтных праектаў. "Акрамя саўдзелу ў фінансаванні праектаў, пагадненне таксама прадугледжвае інфармацыйнае ўзаемадзеянне, сумесную работу па ўдасканаленні заканадаўства. Банк развіцця актыўна прапрацоўвае магчымасць пачатку фінансавання венчурнай дзейнасці, а Беларускі інавацыйны фонд з'яўляецца ўнікальным інстытутам, які мае практычны вопыт у рамках беларуска-расійскага венчурнага фонду. Цяпер гэта адзіная пляцоўка, дзе ёсць практычны вопыт работы з венчурнымі інвестыцыямі, і ён вельмі важны для нас", - падкрэсліў старшыня праўлення.

Дырэктар Беларускага інавацыйнага фонду Дзяніс Каржыцкі ў сваю чаргу паведаміў, што ў фонду з Банкам развіцця і раней былі сумесныя праекты, якія фінансаваліся паралельна дзвюма структурамі. "Але сістэмнай работы па ўзаемадзеянні як інстытутаў развіцця не было. Падпісаўшы пагадненне, мы плануем пачаць работу з іншага боку і наладзіць абмен экспертызамі. Банк развіцця мае дастаткова якасную фінансавую экспертызу, наш фонд - навукова-тэхнічную экспертызу. Фонд прызначаны развіваць інавацыйнае прадпрымальніцтва ў Беларусі, і думаю, што ад нашага ўзаемадзеяння інавацыйнае прадпрымальніцтва толькі выйграе", - лічыць кіраўнік фонду.

Беларускі інавацыйны фонд выкарыстоўвае сродкі рэспубліканскага цэнтралізаванага інавацыйнага фонду для фінансавання праектаў на зваротнай аснове. Як правіла, штогадовы аб'ём фонду складае амаль Br20 млн. "Цяпер вядзецца работа па павелічэнні фінансавання інавацыйных праектаў, паколькі інавацыйнае прадпрымальніцтва лічыцца адным з ключавых напрамкаў дзейнасці. Яно стварае дабаўленую вартасць у краіне, таму пашырэнне гэтага фінансавання прапрацоўваецца", - паведаміў Дзяніс Каржыцкі.

версія для друку

зрабіць стартавай

дабавіць у выбранае