Афіцыйны сайт Рэспублікі Беларусь
Бізнес
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Бізнес | Бізнес-навіны

Бізнес-навіны

26 Aug 2021

Арабскі інвестар Махамед Алі Алабар заявіў аб будаўніцтве ў Мінску аднаго з лепшых праектаў у свеце

Арабскі інвестар Махамед Алі Алабар заявіў аб будаўніцтве ў Мінску аднаго з лепшых праектаў у свеце

26 жніўня, Мінск /Кар. БЕЛТА/. Кампанія Emaar Properties рэалізуе ў Мінску адзін з лепшых праектаў у свеце. Аб гэтым заявіў журналістам заснавальнік кампаніі Махамед Алі Алабар, які наведаў беларускую сталіцу, перадае карэспандэнт БЕЛТА.

Старшыня Мінгарвыканкама Уладзімір Кухараў і Махамед Алі Алабар абмеркавалі сёння пытанні будаўніцтва ў Мінску разумнага горада "Паўночны бераг". "У час сустрэчы абмеркавалі развіццё праекта, азнаёмілі з дэталямі дызайну, хутка прадставім усю праграму, - расказаў Махамед Алі Алабар. - Вялікую ўвагу ўдзялілі абмеркаванню якасці жыцця ў комплексе. Кожны можа пабудаваць жыллё, але стварыць ідэальныя ўмовы не толькі ў аб'екце, але і за яго межамі - задача больш сур'ёзная. Пры рэалізацыі праекта прыменім лепшыя тэхналогіі, убудуем штучны інтэлект, максімальна дружалюбна паставімся да навакольнага асяроддзя. На тэрыторыі людзі змогуць знайсці адпачынак на любы густ - музыку, тэатр, нават пляж. За апошнія 25 гадоў мы рэалізавалі шмат праектаў, але гэты будзе адным з лепшых у свеце".

Як адзначыў Уладзімір Кухараў, юрыдычныя тонкасці праекта спецыялісты адпрацавалі, сёння ўвагу ўдзялілі практычнай рэалізацыі праекта. У прыватнасці, абмеркавалі ўзвядзенне адміністрацыйных будынкаў і збудаванняў, выставачнага цэнтра і цэнтра фінансавых тэхналогій. "Цяпер на тэрыторыі праводзяць разведвальныя работы. У бліжэйшы час прадставяць 3D-канцэпцыі па ўсіх будынках на пляцоўцы. Тады можна будзе пачынаць непасрэдна ўзвядзенне аб'ектаў", - падкрэсліў кіраўнік сталіцы.

Комплекс "Паўночны бераг" размесціцца ў межах МКАД - пр.Пераможцаў - вул.Арлоўская - Цнянскае вадасховішча. Кошт рэалізацыі праекта складзе $4 млрд. У склад комплексу ўвойдуць жылыя дамы з усёй неабходнай інжынернай і транспартнай інфраструктурай, сацыяльныя аб'екты і аб'екты грамадскага прызначэння агульнай плошчай большай за 6 млн кв.м. Прадугледжваецца таксама ўзвядзенне Нацыянальнага выставачнага цэнтра, Інстытута штучнага інтэлекту, Мінскага цэнтра міжнароднага гандлю. Рэалізаваць праект плануюць на працягу 2021-2040 гадоў.

Махамед Алі Алабар лічыцца адным з найбольш вядомых і паспяховых бізнесменаў ААЭ. Ён ідэйны натхняльнік і выканаўца канцэпцыі стварэння сучаснага Дубая, саўладальнік вядомых міжнародных кампаній у галіне электроннага гандлю, грамадскага харчавання, моды і дызайну.

Кампанія Emaar Properties - адзін з вядомых у свеце дэвелапераў і інвестараў у галіне будаўніцтва. Валодае больш як 60 даччынымі кампаніямі і прысутнічае на рынках больш як 35 краін на Блізкім Усходзе, у Паўночнай Афрыцы, Азіі, Еўропе і Паўночнай Амерыцы. Спецыялізуецца на гасцінічным бізнесе, гандлёва-забаўляльнай інфраструктуры, здачы ў арэнду камерцыйнай нерухомай маёмасці, развіцці інфармацыйна-камунікацыйных тэхналогій і паслуг для розных сфер бізнесу, інвесціраванні і абслугоўванні нерухомай маёмасці.

Emaar Properties рэалізавала буйнейшыя будаўнічыя праекты ў Дубаі, уключаючы самы высокі ў свеце будынак Бурдж-Халіфа, а таксама адзін з буйнейшых гандлёвых цэнтраў "Дубай Мол". Акрамя таго, кампанія забудоўвае Эканамічны горад караля Абдалы ў Саудаўскай Аравіі плошчай 168 кв.км, які ўключае ў сябе марскі порт, прамысловую зону, дзелавы, курортны і жылы раёны, адукацыйныя і медыцынскія ўстановы, гандлёвыя аб'екты.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі