Бізнес-навіны

17 сакавіка, Мінск /Кар. БЕЛТА/. Аман зацікаўлены ў стварэнні сумесных зборачных вытворчасцей беларускай грузавой і сельгастэхнікі на сваёй тэрыторыі. Размова аб гэтым ішла на перагаворах 17 сакавіка ў час візіту беларускай дэлегацыі на чале з міністрам гандлю Уладзімірам Калтовічам у Султанат Аман, паведамілі БЕЛТА ў прэс-службе МЗС.

У ходзе сустрэчы Уладзіміра Калтовіча з міністрам гандлю і прамысловасці Амана Алі аль-Сунаідзі абмеркаваны ўвесь спектр пытанняў развіцця гандлёва-эканамічнага супрацоўніцтва паміж дзвюма краінамі. "Аманскі бок выказаў зацікаўленасць у стварэнні сумесных зборачных вытворчасцей беларускай грузавой і сельскагаспадарчай тэхнікі на сваёй тэрыторыі, імпарце прадуктаў харчавання і ўдзеле беларускіх прадпрыемстваў у рэалізацыі праграмы харчовай бяспекі Амана", - праінфармавалі ў прэс-службе.

Кіраўнік Мінгандлю таксама правёў сустрэчу з генеральным сакратаром МЗС Амана Саідам Бадрам аль-Бусаідзі, на якой размова ішла аб стварэнні міжурадавай камісіі па развіцці супрацоўніцтва ў гандлёва-эканамічнай, навукова-тэхнічнай і гуманітарнай галінах.

У час сустрэчы Уладзіміра Калтовіча са старшынёй Аманскай гандлёва-прамысловай палаты Саідам аль-Кіюмі дасягнута дамоўленасць аб арганізацыі візіту ў Беларусь вялікай групы прадстаўнікоў дзелавых колаў Султаната.

Беларуская дэлегацыя таксама правяла перагаворы з дырэктарам па інвестыцыях Дзяржаўнага рэзервовага фонду Амана Мульгамам аль-Джарфам, абмяркоўваліся пытанні развіцця двухбаковага інвестыцыйнага супрацоўніцтва.

Акрамя таго, у Аманскай гандлёва-прамысловай палаце адбылася бізнес-сустрэча прадстаўнікоў дзелавых колаў дзвюх краін.