Бізнес-навіны
Аэрапорт Мінск-1 будзе закрыты да 1 ліпеня 2015 года
9 лютага, Мінск /Кар. БЕЛТА/. Аэрапорт Мінск-1, на месцы якога плануецца пабудаваць эксперыментальны шматфункцыянальны комплекс "Мінск-Мір", будзе закрыты да 1 ліпеня 2015 года. Аб гэтым напярэдадні ў эфіры тэлеканала "Беларусь 1" паведаміў старшыня Мінгарвыканкама Андрэй Шорац, перадае карэспандэнт БЕЛТА.
Цяпер аэрапорт Мінск-1 выкарыстоўваецца для абслугоўвання бізнес-авіяцыі, ёсць паласа для авіярамонтнага завода. "Аэрапорт будзе закрывацца ў гэтым годзе да 1 ліпеня, але авіярамонтны завод яшчэ будзе працаваць і частку паласы задзейнічаюць для пасадкі самалётаў, якія будуць прыходзіць на рамонт", - расказаў Андрэй Шорац.
Перад будаўніцтвам комплексу "Мінск-Мір" трэба знесці вялікую колькасць будынкаў і збудаванняў, перанесці сеткі. Паводле сталічнага мэра, інвестар прадставіў ужо канцэптуальны план забудовы. Вызначаны першыя тры кварталы: што там будзе будавацца, якія сеткі неабходны, якія аб'екты трэба выносіць у першую чаргу. Складзены графікі, якія будуць зацверджаны на наступным тыдні.
Андрэй Шорац закрануў таксама будаўніцтва яшчэ аднаго знакавага для Мінска аб'екта - транспартнай развязкі на перасячэнні праспекта Незалежнасці і вуліцы Філімонава і офіснага будынка "Газпрама". "Цяпер актыўна працуем з "Газпрамам" па долевым фінансаванні. Думаю, у бліжэйшы час аб'ёмы работ тут будуць значна павялічаны", - сказаў старшыня Мінгарвыканкама.
версія для друку
зрабіць стартавай
дабавіць у выбранае