16 чэрвеня, Мінск /Кар. БЕЛТА/. Свяцейшы Патрыярх Маскоўскі і ўсяе Русі Кірыл адкрые Духоўна-адукацыйны цэнтр Беларускай праваслаўнай царквы ў Мінску. Візіт настаяцеля РПЦ у Беларусь адбудзецца 20-22 чэрвеня, паведамілі БЕЛТА ў Беларускім Экзархаце.
Патрыярх Кірыл прыбудзе ў Мінск 20 чэрвеня. У гэты дзень ён ушануе памяць загінуўшых герояў Вялікай Айчыннай вайны, усклаўшы вянок да абеліска на плошчы Перамогі. Вечарам прадстаяцель правядзе ўрачыстае богаслужэнне ў Свята-Духавым кафедральным саборы. Ключавой падзеяй першага дня візіту стане цырымонія адкрыцця Духоўна-адукацыйнага цэнтра Беларускай праваслаўнай царквы. У сценах комплексу, узведзенага пры актыўнай дапамозе беларускай дзяржавы, будуць размяшчацца Мінская духоўная акадэмія, задачай якой з'яўляецца падрыхтоўка багаслоўскіх кадраў вышэйшай навуковай кваліфікацыі, і памяшканні профільных структур Беларускага Экзархата. Плануецца, што Цэнтр стане базай для рэалізацыі асветных, культурных, маладзёжных і іншых праграм.
У свята Сабора Беларускіх святых, 21 чэрвеня, уладыка раздзеліць радасць малітвы з жыхарамі і гасцямі Брэста. Прадстаяцель РПЦ адслужыць Боскую літургію ў Васкрасенскім саборы Брэста.
У дзень пачатку Вялікай Айчыннай вайны, 22 чэрвеня, Патрыярх наведае Брэсцкую крэпасць і правядзе памінальную літыю па воінах-вызваліцелях у Нікольскім гарнізонным храме. Свяцейшы Патрыярх Кірыл таксама прыме ўдзел у жалобным мітынгу-рэквіеме на плошчы Цырыманіялаў, пасля чаго накіруецца ў Маскву.
Візіт уладыкі на беларускую зямлю прымеркаваны да 1000-годдзя са дня спачыну святога роўнаапостальнага вялікага князя Уладзіміра - Хрысціцеля Русі, а таксама да святкавання памяці Сабора Беларускіх Святых і да 70-годдзя гадавіны Перамогі ў Вялікай Айчыннай вайне.