16 снежня, Мінск /Кар. БЕЛТА/. Новая праграма Беларускага дзяржаўнага цырка "Чароўны сон у зімовую ноч" заснавана на багатай і самабытнай культуры Беларусі. Аб гэтым паведаміў сёння на сустрэчы з журналістамі мастацкі кіраўнік Белдзяржцырка аўтар сцэнарыя і рэжысёр-пастаноўшчык аўтарскай праграмы Вітаўтас Грыгалюнас, перадае карэспандэнт БЕЛТА.
Паводле слоў Вітаўтаса Грыгалюнаса, ідэя беларускай праграмы з'явілася яшчэ паўгода таму. Гэта гісторыя пераходу ў сны, міфалогію Беларусі. Спецыяльна для спектакля было створана дзевяць новых цыркавых нумароў, пашыта больш за 100 касцюмаў. У паказе прымаюць удзел больш за 50 артыстаў Белдзяржцырка. На манеж выйдуць больш за 30 дрэсіраваных жывёл (сабачкі, коні, поні, вярблюды, ламы). Для аўтарскай праграмы Белдзяржцырка было напісана 13 музычных твораў.
Як адзначыла галоўны рэжысёр Белдзяржцырка пастаноўшчык цыркавых нумароў і трукаў Ала Нікалаева-Аліева, у праграме вельмі шмат дэбютных нумароў, якія выконваюць маладыя артысты. Паводле яе слоў, увесь спектакль стане спектаклем адкрыццяў, паколькі ў ім вельмі шмат дэбютантаў. Усе нумары цікавыя і складаныя, іх давялося адаптаваць да гісторыі, што разгортваецца на сцэне. "Для многіх артыстаў гэта быў новы вопыт, таму што гэта вельмі складаныя нумары", - дадала Ала Нікалаева-Аліева.
На манежы беларускага цырка аўтарскі спектакль "Чароўны сон у зімовую ноч" будзе ісці з 17 снежня бягучага года па 14 студзеня будучага года. Плануецца, што праграма адправіцца ў гастролі. Як расказаў дырэктар Белдзяржцырка Уладзімір Шабан, вялікая цікавасць да новага беларускага праекта ёсць у гледачоў у Баку, Кіеве. Кіраўнік цырка выказаў надзею, што беларускія цыркавыя артысты змогуць таксама паказаць сваё майстэрства ў Маскве.
Кошт білетаў на навагоднюю праграму зніжаны ў параўнанні са звычайнымі паказамі. Напрыклад, білеты ў першы рад каштуюць Br250 тыс., у той час як звычайна Br300 тыс.
У канцы студзеня на беларускім манежы будзе паказана незабыўнае шоу гіганцкіх фантанаў.
Пн | Аўт | Сер | Чцв | Пт | Сб | Нядз |
---|