Прамовы і інтэрв’ю

12 ліпеня, Мінск /Кар. БЕЛТА/. Выказаная Прэзідэнтам Беларусі Аляксандрам Лукашэнкам ініцыятыва аб запуску новага Хельсінкскага працэсу заслугоўвае абмеркавання. Такое меркаванне выказаў сёння журналістам удзельнік ХІХ Сусветнага кангрэса рускай прэсы, памочнік Прэзідэнта Расіі Ігар Шчогалеў, перадае карэспандэнт БЕЛТА.

"Аляксандр Рыгоравіч - чалавек неардынарны, заўсёды выступае з вельмі яркімі ініцыятывамі, і, вядома, гэта ініцыятыва заслугоўвае абмеркавання. Вельмі правільна, што яна была агучана ў асяроддзі журналістаў (перад удзельнікамі ХІХ Сусветнага кангрэса рускай прэсы. - Заўвага БЕЛТА)", - лічыць Ігар Шчогалеў.

Паводле яго слоў, цяпер перад прадстаўнікамі масмедыя стаіць задача аб'ектыўна расказаць пра гэта сваім чытачам, гледачам, слухачам. "У гэтым галоўнае прызначэнне журналістаў. Думаю, яны з гэтай задачай справяцца і гэту ініцыятыву данясуць", - заўважыў памочнік Прэзідэнта РФ.

Ён выказаў меркаванне, што ўдзельнікі кангрэса сабраліся ў Мінску, каб у камфортнай абстаноўцы, якую заўсёды прадастаўляе Беларусь, пагаварыць аб праблемах, якія стаяць перад журналісцкай супольнасцю ў цэлым. "Цяпер традыцыйным СМІ даводзіцца думаць, як ствараць сваю будучыню, як выжываць у свеце інтэрнэту, калі кожны карыстальнік, у якога ёсць смартфон, фотаапарат, відэакамера, можа, па-сутнасці, прэтэндаваць на тое, каб стаць журналістам. Ці не згубіцца прафесія на фоне гэтага вала непрафесійнай аматарскай інфармацыі, ці ёсць у яе шанц на выжыванне? Як будаваць дыялог са сваімі чытачамі, слухачамі, гледачамі, як зарабляць грошы?" - абазначыў найбольш важныя пытанні кангрэса Ігар Шчогалеў.

Памочнік Прэзідэнта РФ таксама звярнуў увагу на вострую праблему размывання адказнасці ў масмедыя. "Магчымасці тэхнічныя ёсць, а падрыхтоўкі і ўсведамлення таго, што ёсць не толькі правы, а яшчэ і абавязкі, хапае на заўсёды", - заўважыў ён. Пры гэтым Ігар Шчогалеў прызнаўся, што, у яго ўяўленні, перавага журналістыкі ўсё ж такі заключаецца ў запатрабаванасці якаснай інфармацыі - праверанай і адказнай. "І ў гэтых умовах нам трэба шукаць шляхі, як змагацца з недакладнымі публікацыямі, што ім проціпаставіць. І ўсё ж мне здаецца, што самім фактам існавання традыцыйныя якасныя СМІ даюць адказ на гэта пытанне - выклікаюць да сябе значна больш даверу падрыхтоўкай і адказнасцю супрацоўнікаў", - дадаў ён.

ХІХ Сусветны кангрэс рускай прэсы "Партнёрства ў імя будучыні: прыярытэты сучаснай цывілізацыі" прадоўжыцца ў Беларусі да 15 ліпеня. Увогуле ў мерапрыемстве прымаюць удзел прадстаўнікі СМІ больш як 50 дзяржаў.

Арганізатарамі ХІХ Сусветнага кангрэса рускай прэсы выступаюць Сусветная асацыяцыя рускай прэсы, інфармацыйнае агенцтва ТАСС, Міністэрства інфармацыі Беларусі, Фонд супрацоўніцтва з рускамоўнай прэсай - Фонд САРП.