Прамовы і інтэрв’ю

"Гэта мой першы візіт у Беларусь, і я ўжо заўважыў, які цудоўны Мінск і людзі, якія тут жывуць. Паток турыстаў у Беларусь пастаянна павялічваецца, пацвярджаючы факт, што ў краіне многае робіцца для развіцця турызму. Думаю, што ў павышэнні турыстычнай прывабнасці ёсць уклад і чэмпіянату свету па хакеі, які праводзіўся ў Мінску ў 2014 годзе", - адзначыў кіраўнік ЮНВТО.

Талеб Рыфаі выказаў надзею, што ўзаемадзеянне ЮНВТО з Беларуссю ў бліжэйшы час будзе пашырана. "Колькасць міжнародных турысцкіх прыбыццяў у свеце будзе павялічвацца, і Беларусь не выключэнне. Ваша краіна можа шмат расказаць свету аб сваіх выдатных мясцінах і славутасцях. Гісторыя і культура Беларусі зацікавяць турыстаў ва ўсіх кутках планеты", - упэўнены ён.

Першы віцэ-прэзідэнт Нацыянальнага алімпійскага камітэта, памочнік Прэзідэнта Беларусі па пытаннях фізічнай культуры, спорту і развіцця турызму Максім Рыжанкоў у сваю чаргу адзначыў, што Беларусь гатова да супрацоўніцтва з Сусветнай турысцкай арганізацыяй і рэалізацыі сумесных праектаў. "Роля і значэнне турызму як эканамічнага інструмента ў нашай краіне пастаянна ўзрастае. У Беларусі павялічваецца колькасць гасцініц, развіваецца аграэкатурызм, вялікая ўвага ўдзяляецца захаванню прыроднай спадчыны, нацпаркаў, запаведнікаў, таму мы гатовы не толькі прымаць рэкамендацыі ЮНВТО, але і падзяліцца сваім вопытам, напрыклад, у развіцці аграэкатурызму", - сказаў ён.

Мэтай канферэнцыі з'яўляецца распаўсюджванне міжнароднага вопыту і вопыту Беларусі ў галіне мясцовага эканамічнага развіцця праз устойлівы турызм, умацаванне дзяржаўна-прыватнага партнёрства ў турызме, а таксама распаўсюджванне ведаў і вопыту аб выкарыстанні сучасных тэхналогій для развіцця турысцкіх кластараў.

У рабоце канферэнцыі прымаюць удзел больш як 250 чалавек. У час першага тэматычнага блока "Турызм і рэгіянальнае эканамічнае развіццё" эксперты ЮНВТО раскажуць аб сусветных тэндэнцыях развіцця экатурызму. Таксама сярод запланаваных для абмеркавання тэм - супрацоўніцтва дзяржавы і бізнесу ў сферы экатурызму і міжнародны вопыт далучэння да яго мясцовай супольнасці. Спецыялісты галіны абмяркуюць і перспектывы аграэкатурызму ў Беларусі, эканамічнае развіццё рэгіёнаў краіны. Другі тэматычны блок будзе прысвечаны турысцкім кластарам: іх фарміраванню, інавацыйным метадам развіцця, даступнасці экатурысцкіх прадуктаў для людзей з абмежаванымі фізічнымі магчымасцямі.

Арганізатары мерапрыемства - Міністэрства спорту і турызму Беларусі, праект USAID "Мясцовае прадпрымальніцтва і эканамічнае развіццё", што рэалізуецца ПРААН.