Прамовы і інтэрв’ю

14 мая, Мінск /Кар. БЕЛТА/. Ініцыятыва па выпуску сацыяльных плакатаў "Кветкі Вялікай Перамогі" павінна атрымаць прадаўжэнне. Такое меркаванне выказаў карэспандэнту БЕЛТА генеральны дырэктар агенцтва міжнароднай інфармацыі Trend (Азербайджан) Ільгар Гусейнаў.

"У Мінску я ўбачыў гэтыя цікавыя плакаты. Маладое і старое пакаленне на іх разам. Думаю, што гэта вельмі важнае пачынанне, - сказаў гендырэктар Trend. - Яно яшчэ больш прыцягне моладзь да таго, што трэба ўважліва ставіцца да сваіх бацькоў, да сваіх дзядоў і бабуль, быць з імі побач. Лічу, што такое пачынанне павінна быць падхоплена іншымі і паўсюдна ўкараняцца".

Ільгар Гусейнаў таксама адзначыў: "Любы чалавек павінен памятаць свае карані. Тое, што ён робіць сёння, - гэта прадаўжэнне таго, што рабілі бацькі. Я сам успамінаю свайго дзеда, які прайшоў паўвайны і атрымаў раненне. Яго дэмабілізавалі. Ён увесь час мне расказваў аб сапраўдным мужчынскім сяброўстве, аб тым, як у перыяд вайны людзі былі побач адзін з адным, абаранялі адзін аднаго. Ён заўсёды вучыў, што трэба быць надзейным таварышам".

Як паведамлялася, плакаты "Кветкі Вялікай Перамогі" з выявамі вядомых людзей не так даўно з'явіліся на вуліцах Мінска. Гэта частка аднайменнага рэспубліканскага патрыятычнага праекта, прысвечанага 71-годдзю Перамогі ў Вялікай Айчыннай вайне. На плакатах - вядомыя людзі нашай краіны, а таксама іх сваякі, якія прымалі ўдзел у баявых дзеяннях у гады той вайны.

У праекце прынялі ўдзел алімпійскія чэмпіёнкі Дар'я Домрачава і Вікторыя Азаранка, футбаліст БАТЭ і нацыянальнай зборнай Ігар Стасевіч, саліст Вялікага тэатра Ілья Сільчукоў, прыма-балерына Вялікага тэатра Ірына Яромкіна, лідар групы: J:Морс Уладзімір Пугач, хакеіст нацыянальнай зборнай Аляксей Калюжны, урач-трансплантолаг Алег Румо, тэлевядучая АНТ Марына Грыцук, рэкардсмен Кнігі рэкордаў Гінеса Кірыл Шымко. Героі праекта, як і ўсе мы, наследнікі Перамогі, перапоўнены пачуццём гордасці за здзяйсненні нашых продкаў, глыбокай павагі і ўдзячнасці ім.