Падзеі, факты, анонсы
Прэзентацыя знойдзенага партрэта Адама Міцкевіча пэндзля Івана Хруцкага адбудзецца ў Полацку
18 мая, Віцебск /Алёна Ціханава - БЕЛТА/. Прэзентацыя работы вядомага беларускага жывапісца Івана Фаміча Хруцкага "Партрэт А. Міцкевіча" адбудзецца сёння ў Мастацкай галерэі Нацыянальнага Полацкага гісторыка-культурнага музея-запаведніка, паведамілі БЕЛТА ва ўстанове.
Размова ідзе аб палатне, якое было знойдзена ў Полацку ў 2010 годзе. У фондах Нацыянальнага Полацкага гісторыка-культурнага музея-запаведніка ў складзе калекцыі жывапісных і графічных работ праўнучкі жывапісца Ядвігі Мацяеўскай (захоўваецца ў фондах з 1997 года) быў знойдзены партрэт пэндзля самога Івана Хруцкага. І вось у Дзень музеяў пасля праведзеных навуковых даследаванняў палатна і рэстаўрацыі карціна будзе прадстаўлена гледачам. Выстаўка будзе праходзіць толькі пяць дзён - з 18 па 22 мая.
У музеях Беларусі, Расіі, Украіны, Літвы і Польшчы цяпер захоўваецца больш як 100 палотнаў Івана Хруцкага.
Выдатны беларускі мастак-партрэтыст, майстар нацюрморта і пейзажа Іван Хруцкі нарадзіўся ў Віцебскай губерні ў 1810 годзе. 200-годдзе з дня яго нараджэння было ўнесена ў каляндар памятных дат ЮНЕСКА.
версія для друку
зрабіць стартавай
дабавіць у выбранае