25 лютага, Мінск /Кар. БЕЛТА/. Нацыянальны гісторыка-культурны музей-запаведнік "Нясвіж" і французскія музеі-замкі ў будучым годзе маюць намер абмяняцца часткай экспанатаў для іх часовай дэманстрацыі. Такое рашэнне прынята па выніках візіту дэлегацыі музея-запаведніка "Нясвіж" на чале з дырэктарам Сяргеем Клімавым у Францыю, паведамілі БЕЛТА ў пасольстве Беларусі ў Францыі.
Прадстаўнікі беларускага музея ў час знаходжання ў Францыі з 16 па 22 лютага наведалі замкі Шамбор, Рашкот, Мантрэзор, Шанціі, дзе правялі перагаворы. Дасягнуты дамоўленасці аб абмене экспазіцыямі і дэлегацыямі экспертаў.
Былі праведзены сустрэчы з праўнучкамі Марыі Дароты дэ Кастэлян Радзівіл. Музею-запаведніку "Нясвіж" перададзена кніга з замка Рашкот.
Візіт беларускай дэлегацыі арганізаваны пры падтрымцы беларускага пасольства ў Францыі, беларускай мастачкі Ірыны Котавай, якая пражывае ў Францыі, і французскага пісьменніка Крыстофа Левалуа, які працуе над кнігай-біяграфіяй Марыі дэ Кастэлян Радзівіл. Кніга-біяграфія ў 2015 годзе плануецца да выдання музеем-запаведнікам "Нясвіж".