Падзеі, факты, анонсы

4 снежня, Мінск /Кар. БЕЛТА/. Беларуская біятланістка Надзея Скардзіна займае трэцяе месца ў агульным заліку Кубка свету пасля першага этапу, паведамляе карэспандэнт БЕЛТА.

У шведскім Эстэрсундзе Надзея стала пераможцай індывідуальнай гонкі, у спрынце была 12-й і заняла 6-е месца ў гонцы праследавання. У выніку ў актыве Надзеі Скардзіна 127 ачкоў. Трохразовая алімпійская чэмпіёнка Дар'я Домрачава знаходзіцца на 33-м месцы (27 ачкоў), Ірына Крыўко займае 39-ю пазіцыю (22), Надзея Пісарава - 52-я (8), Дар'я Юркевіч - на 54-й пазіцыі (5). Агульны залік узначальвае францужанка Жусцін Брэза, у якой 142 ачкі, на другім месцы немка Дэніз Херман.

У мужчын лідарства адразу захапіў дзеючы пераможца Кубка свету, шасціразовы ўладальнік Хрустальнага глобуса француз Мартэн Фуркад. У Эстэрсундзе ён набраў 102 заліковыя балы, на другой пазіцыі нарвежац Ёханес Бо (90), трэцім ідзе яшчэ адзін французскі біятланіст - Кантэн Фіён Мае (83). З беларускіх лыжнікаў, якія страляюць, заліковыя балы мае толькі Раман Елятноў. Іх у яго ўсяго 8, што адпавядае 44-й пазіцыі ў агульным заліку.

Другі этап Кубка свету пройдзе ў бліжэйшы ўік-энд у аўстрыйскім Хохфільцэне. У яго праграму ўключана 6 стартаў:

8 снежня - спрынтарскія гонкі (мужчыны - 10 км, жанчыны - 7,5 км);

9 снежня - гонкі праследавання (мужчыны - 12,5 км, жанчыны - 10 км);

10 снежня - эстафеты (мужчыны - 4х7,5 км, жанчыны - 4х6 км).