13 сакавіка, Мінск /Кар. БЕЛТА/. Імёны прадстаўнікоў Беларусі на конкурсах "Славянскага базару ў Віцебску" стануць вядомы да 10 красавіка, паведамілі карэспандэнту БЕЛТА ў Міністэрстве культуры.
Згодна з палажэннем аб нацыянальным адборы прэтэндэнтаў на міжнародны конкурс выканаўцаў эстраднай песні "Віцебск" і міжнародны дзіцячы музычны конкурс "Віцебск" хутка будзе аб'яўлены прыём заявак, пасля чаго пройдзе вочнае праслухоўванне прэтэндэнтаў на ўдзел у конкурсе.
На XXIV Міжнародным фестывалі мастацтваў "Славянскі базар у Віцебску" пройдуць XXIV Міжнародны конкурс выканаўцаў эстраднай песні "Віцебск-2015" і XIII Міжнародны дзіцячы музычны конкурс "Віцебск-2015".
Пераможцам першага конкурсу выканаўцаў стаў украінскі спявак Алэкса Бэрэст. Міжнароднае журы пад старшынствам народнага артыста СССР, кіраўніка дзяржаўнага ансамбля "Песняры" Уладзіміра Мулявіна тады Гран-пры не прысудзіла, але ўладальнікам I прэміі быў названы Алэкса Бэрэст.
За гады свайго існавання конкурс выканаўцаў мяняў назвы, але нязменнымі заставаліся яго мэты: раскрыццё і падтрымка маладых талентаў, папулярызацыя музычнай культуры і мастацтва, узаемадзеянне і дыялог культур розных краін. У творчым спаборніцтве прымаюць удзел спевакі, якія ўжо сталі лаўрэатамі і дыпламантамі нацыянальных конкурсаў. Выступленне на віцебскім фестывалі яны лічаць для сябе вялікай удачай і магчымасцю паказаць сваё майстэрства дзясяткам тысяч гледачоў і тэлегледачоў. Работа з Нацыянальным акадэмічным канцэртным аркестрам Рэспублікі Беларусь пад кіраўніцтвам народнага артыста Беларусі, прафесара Міхаіла Фінберга, у чыім суправаджэнні маладыя артысты выконваюць свае кампазіцыі, становіцца цудоўнай школай прафесійнага майстэрства.
Як паведамляе афіцыйны сайт фестывалю "Славянскі базар у Віцебску", нацыянальныя адборы для ўдзелу ў конкурсах праходзяць таксама і ў іншых краінах. У прыватнасці, ужо вызначылася са сваімі дэлегатамі Малдова. Пераможцамі адбору і ўладальнікамі пуцёвак у Віцебск сталі Валерыя Паша і Эмілі Істраці.
З 2002 года лаўрэаты конкурсаў атрымліваюць прыз, выкананы віцебскім скульптарам Валерыем Магучым. Гэта скульптура жанчыны з узнятымі да сонца рукамі. У постаці праглядаюцца і сілуэт ліры, і абрыс віцебскай ратушы. Скульптурная кампазіцыя ўвянчана валошкай - паэтычным сімвалам фестывалю. З 2003 года галоўны прыз атрымаў назву "Залатая Ліра".