Падзеі, факты, анонсы

Каляндар падзей у Беларусі: ЖНIВЕНЬ 2025

Прэм'ера фільма "Чорны замак" па матывах рамана Уладзіміра Караткевіча

"Чорны замак" – гэта сучасная экранізацыя гістарычнага дэтэктыўнага рамана Уладзіміра Караткевіча "Чорны замак Альшанскі". Пры гэтым з моманту яго першай экранізацыі мінула ўжо 40 гадоў: у 1984-м на экранах прэзентавалі аднайменны фільм кінарэжысёра Міхаіла Пташука, зняты ў жанры гістарычнага дэтэктыва. На гэты раз за пераасэнсаванне рамана ўзяліся сцэнарыст Глеб Шпрыгаў і рэжысёр Кірыл Кузін. Яшчэ да афіцыйнай прэм'еры ў Мінску фільм "Чорны замак" быў удастоены спецпрыза журы конкурсу ігравых фільмаў і спецпрыза Выканкама СНД "Кіно без меж" на ММКФ "Лістапад-2024". Згодна з сюжэтам гістарычнай драмы, малады прафесар Антон Косміч (Яўген Шварц) аказваецца ў бядзе пасля таго, як старадаўняе Евангелле, якое належала роду Альшанскіх, трапляе ў яго антыкварны магазін. Каб выратаваць сябе і разгадаць тайны мінулага, ён адпраўляецца ў Альшаны... У экранізацыі аднаго з самых вядомых твораў беларускай літаратуры прынялі ўдзел Настасся Красоўская, Яўген Стычкін, Яўген Шварц і Віталь Кішчанка.

Калі: 12 снежня 2024 – 2 снежня 2025
Дзе: кінатэатры гарадоў Беларусі

Выставачны праект "За мірнае неба!" у Нацыянальнай бібліятэцы Беларусі

Выставачны праект, прысвечаны 80-годдзю Перамогі савецкага народа ў Вялікай Айчыннай вайне, аб'яднаў на адной пляцоўцы экспанаты з 14 музеяў краіны. Наведвальнікі азнаёмяцца з гісторыяй у адваротным храналагічным парадку – ад Парада Перамогі да пачатку вайны. У экспазіцыі прадстаўлены прадметы акопнай творчасці, асабістыя рэчы герояў, самаробная зброя партызан, рэчы вязняў канцлагераў, самаробныя кнігі і дзённікі, медалі, архіўныя дакументы, артыкулы і нарысы пра подзвігі на палях бітваў. Сярод самых яркіх экспанатаў – арыгінал уваходнага білета на парад 1945 года, фатаграфіі салдат ля купала Рэйхстага і каля Брандэнбургскіх варот…

Калі: 27 лютага – 21 верасня
Дзе: Нацыянальная бібліятэка Беларусі, пр. Незалежнасці, 116, Мінск

Выстава "Космас наш!" у НЦСМ

Выстава, прысвечаная Міжнароднаму дню касманаўтыкі і першаму ў гісторыі суверэннай рэспублікі палёту жанчыны-касманаўта – Героя Беларусі Марыны Васілеўскай, з'яўляецца працягам міжнароднага праекта "Сто ўсмешак Гагарына", створанага да 90-годдзя Юрыя Гагарына. У экспазіцыі прадстаўлены некалькі соцень фатаграфій з 30 краін і творы беларускіх мастакоў на тэму космасу з "яго здольнасцю змяшчаць бясконцы сусвет і адначасова пранізваць унутраны свет кожнага з нас". Сярод аўтараў работ – Галіна Васільева, Аляксандр Забаўчык, Сяргей Крыштаповіч, Анатоль Кузняцоў, Леанід Хобатаў...

Калі: 12 красавіка – 21 верасня
Дзе: Нацыянальны цэнтр сучаснага мастацтва, вул. Някрасава, 3, Мінск

Выстава "Кожная роля – галоўная" да 120-годдзя з дня нараджэння Стэфаніі Станюты

Выстава, прысвечаная 120-годдзю з дня нараджэння народнай артысткі Беларусі і СССР Стэфаніі Станюты, раскрывае яе жыццёвы і творчы шлях. У экспазіцыі прадстаўлены фотаздымкі, тэксты роляў, рукапісы, малюнкі, перапіскі з роднымі і знаёмымі, водгукі крытыкаў і паклоннікаў, дакументы. Наведвальнікі музея могуць убачыць фатаграфіі выдатнай артысткі з сынам-пісьменнікам Аляксандрам, які прысвяціў ёй кнігу, дакументы, звязаныя з Другім беларускім драматычным тэатрам у Віцебску, дзе многія беларускія артысты пачыналі свой шлях пасля навучання ў 1920-я ў вялікіх майстроў у Маскве. Стэфанія Станюта ў 1931-м пасля вяртання са студыі ММТ паступіла ў трупу Першага драматычнага тэатра (цяпер – Купалаўскага), дзе праслужыла 70 гадоў, выканаўшы каля 200 роляў і стаўшы сапраўднай легендай!

Калі: з 13 мая 2025 года
Дзе: Беларускі дзяржаўны архіў-музей літаратуры і мастацтва, вул. Кірыла і Мяфодзія, 4, Мінск
Даведацца больш

Летні музычна-турыстычны сезон у Мінску

У гістарычным цэнтры Мінска – Верхнім горадзе, Траецкім і Ракаўскім прадмесцях – 24 мая стартаваў летні музычна-турыстычны сезон, які прадоўжыцца да верасня. Мерапрыемствы будучых месяцаў будуць аб'яднаны тэмай "Мы светлай памяццю адзіныя" і прымеркаваны да 80-годдзя Вялікай Перамогі. Ва ўжо любімым праекце публікі "Класіка каля Ратушы" прагучаць выключна творы вялікіх кампазітараў, якія ўвайшлі ў залаты фонд музычнай культуры. Знатакоў класікі 2 жніўня чакае канцэрт-настальгія "Знаёмыя мелодыі" ад Нацыянальнага акадэмічнага народнага аркестра Беларусі імя Іосіфа Жыновіча, а 9 жніўня на канцэрт "Музыканты жартуюць" запрашае Музычная гасцёўня Таццяны Старчанка.

У рамках музычнага праекта "Беларусы свету" 16 і 23 жніўня адбудуцца канцэрты ў выкананні Дзяржаўнага камернага аркестра Беларусі і Нацыянальнага акадэмічнага канцэртнага аркестра імя М.Я. Фінберга. "Класіка сустракае рок" прадставіць 30 жніўня і 6 верасня два канцэрты ад Акадэмічнага ансамбля песні і танца Узброеных Сіл Беларусі і Сімфанічнага аркестра Белтэлерадыёкампаніі. Завершыць летні музычны сезон у Верхнім горадзе 13 верасня праграма "Музыка любімага горада" ад Прэзідэнцкага аркестра Беларусі.

Калі: 24 мая – 13 верасня
Дзе: гістарычны цэнтр Мінска, гарадская Ратуша

Фестываль духоўнай і акадэмічнай арганнай музыкі ARS MAGNA ORGANI 2025

Фестываль ARS MAGNA ORGANI 2025 "Вялікае мастацтва аргана" праводзіцца пяты раз ужо. У новым сезоне ён аб'яднае 68 канцэртаў, якія будуць выкананы на 5 гістарычных арганах Беларусі, адным сучасным і адным электрааргане. Першы канцэрт і ўрачыстае адкрыццё адбыліся ў пінскім кафедральным касцёле Ушэсця Найсвяцейшай Дзевы Марыі, дзе адзначаецца 100-годдзе Пінскай епархіі. Тут пасля рэстаўрацыі зноў загучаў другі па гістарычнай значнасці арган Беларусі. Кожны тыдзень на працягу трох месяцаў лепшыя музыканты з Беларусі, Расіі, Венгрыі будуць выступаць з канцэртамі ў каталіцкіх храмах Брэсцкай і Гродзенскай абласцей.

Калі: 25 мая – 28 верасня
Дзе: Пінск, Мядзведзічы, Ружаны, Лагішын, Іванава, Навагрудак, Іўе

Праграма "БРАВА, ЦЫРК!": "Белдзяржцырк" на гастролях па Беларусі

Белдзяржцырк адкрыў летні сезон гастролямі ў Гродне, а далей адправіцца з новай праграмай "БРАВА, ЦЫРК!" па гарадах заходніх рэгіёнаў краіны. Гледачоў чакае шоу, у якім будуць эквілібрысты на пераходных лесвіцах, акрабаты на батуце і падкідной дошцы, сілавы атлет, здольны падымаць зубамі цяжар і гнуць цвікі, гімнастка з хула-хупамі і, вядома, клоўнскі гумар! Разам з артыстамі на манеж выйдуць дрэсіраваныя сабачкі, японскія хіны, якія выконваюць акрабатычныя трукі і танцуюць, велічныя і наравістыя мэйн-куны, а таксама любімцы публікі – малпачкі-капуцыны, якія па-майстэрску іграюць на музычных інструментах, дэманструюць вакальныя здольнасці, ездзяць на веласіпедзе і нават лятаюць на дырыжаблі!

Дзе, калі:
Брэст: 21 чэрвеня – 20 ліпеня
Пінск: 26 ліпеня – 10 жніўня
Баранавічы: 16 – 24 жніўня
Ліда: 30 жніўня – 7 верасня

Культурна-турыстычны праект "Замкавы гасцінец" у Лідзе

Правесці выхадныя на "Замкавым гасцiнцы" запрашае жыхароў і гасцей Ліды культурна-турыстычны праект, які разгортваецца на пешаходнай вуліцы Замкавай і ў двары знакамітай славутасці. Кожны ўік-энд летняга сезона-2025 тут праходзяць фестывалі, канцэрты выканаўцаў розных жанраў, выставы, рамесныя кірмашы, працуюць дзіцячыя гульнявыя пляцоўкі. Адкрыў праект маштабны ў пачатку чэрвеня фестываль агню і святла, але наперадзе яшчэ шмат цікавага!

Калі: кожную суботу і нядзелю з 10.00 да 19.00
Дзе: Лідскі замак, вул. Замкавая, 1, Ліда

Vulitsa Ezha: летні сезон-2025 у Мінску

Летні фестываль Vulitsa Ezha з’яўляецца 28-м па ліку за 10 гадоў і ў гэтым сезоне прадстаўляе тры гарадскія пікнікі. У праграме фэсту-2025 – фотавыстава з гістарычнай рэтраспектывай, уручэнне прэміі Ezha Awards, вулічны кінатэатр для прагляду  любімых фільмаў пад адкрытым небам, лекторый, кулінарная школа са смачнымі і карыснымі майстар-класамі ад топавых шэфаў і зорных гасцей, крафтавыя маркеты, фестывальны мерч-шоп, дзе можна набыць брэндзіраванае адзенне. Цэнтрам прыцягнення стане фуд-корт з алеяй фуд-тракаў, дзе звыш 40 устаноў прадставяць свае меню, а таксама барныя лакацыі ARARAT, Lillet, Havana Club і Ready to Drink з тэматычнымі фотазонамі, майстар-класамі і летнімі напіткамі.

Калі: 19-20 ліпеня, 30-31 жніўня, 12.00–22.00
Дзе: Цэнтральны батанічны сад НАН Беларусі, вул. Сурганава, 2в, Мінск

Экскурсіі па Верхнім горадзе ў Мінску

Мінчан і гасцей горада запрашаюць на бясплатныя пешаходныя экскурсіі па Верхнім горадзе ў рамках праекта "Культурныя традыцыі сталіцы". Тэмы мяняюцца кожны тыдзень і прысвечаны розным перыядам ад старажытнага часу да падзей Вялікай Айчыннай вайны і сучаснасці. Шэраг экскурсій, напрыклад, "Гісторыя Верхняга горада праз прызму часу", уключаюць наведванне падвалаў былой царквы Св. Духа. Расказваюць пра беларускую сталіцу прафесійныя гіды – супрацоўнікі Музея гісторыі горада Мінска. Гранічная колькасць чалавек у групе – 30, папярэдні запіс не патрабуецца.

2 жніўня, 13 верасня – "Шлях Перамогі па вуліцах Мінска"
9 жніўня – "Спадчына старога горада: вуліца Кірыла і Мяфодзія і вуліца Герцэна"
16 і 30 жніўня – "Гісторыя Верхняга горада праз прызму часу"
23 жніўня, 6 верасня – "Спадчына старога горада: Плошча Свабоды і вуліца Ракаўская"

Калі: кожная субота ў жніўні і верасні (13.00)
Дзе: збор каля галоўнага ўвахода ў гарадскую Ратушу, пл. Свабоды, 2а, Мінск

Выстава "Спадчына Дударава: словы, кадр, сцэна" ў Мінску

Выстава, прысвечаная 75-годдзю з дня нараджэння выдатнага беларускага драматурга і празаіка Аляксея Дударава, раскрывае ўклад майстра ў нацыянальную культуру. Яго творы вызначаліся глыбінёй прапрацоўкі персанажаў, сацыяльным кантэкстам і вострым пачуццём гумару, што зрабіла іх запатрабаванымі як у тэатры, так і ў кіно. Творчая спадчына Дударава налічвае каля 20 п'ес, у тым ліку "Вечар", "Радавыя", увасабленне якіх стала значным для культурнага жыцця краіны. Па сцэнарыях Дударава на экраны выйшлі такія вядомыя фільмы, як "Белыя росы", "Суседзі", "Асеннія сны", "Брэсцкая крэпасць" (суаўтарства). Госці выставы змогуць акунуцца ў свет Аляксея Дударава і прасачыць, наколькі пераплятаюцца яго літаратурныя і кінематаграфічныя дасягненні. У экспазіцыі прадстаўлены рэдкія рукапісы, афішы тэатральных пастановак, сцэнарыі і фатаграфіі са здымак фільмаў.

Калі: да 31 жніўня
Дзе: Музей гісторыі беларускага кіно, вул. Свярдлова, 4, Мінск

Міжнародны "Мінскі трыятлон"-2025

За восем гадоў "Мінскі трыятлон" ператварыўся ва ўплывовы турнір і па ўзроўні, і па колькасці ўдзельнікаў – ад 300 да больш як 2 тысяч! У бягучым годзе атлетаў чакаюць новаўвядзенні: стартуюць спаборніцтвы ў маляўнічай лакацыі комплексу "Асторыя Рыверсайд", а таксама зменены эстафетныя фарматы на алімпійскай дыстанцыі і павялічана дыстанцыя жаночага забегу – да 5 км. У ліку асноўных дысцыплін: "Палавінка" (1,9 км плаванне + 90 км велагонка + 21 км бег), "Алімпік" (1000 м плаванне + 45 км велагонка + 10,5 км бег), "Спрынт" (500 м плаванне + 22 км велагонка + 5,25 км бег), жаночы забег Minsk Lady run і эстафеты. Праграма спартыўнага турніру ўпершыню прадугледжвае дзіцячы забег, які адбудзецца напярэдадні і збярэ 500 юных зорак трыятлона – максімальную колькасць у намінацыі.

Калі: 1–2 жніўня
Дзе: комплекс "Асторыя Рыверсайд" – Палац спорту, Мінск

Гарадскі музычны фестываль FESTIWOW! у Мінску

Адной з самых гарачых падзей мінскага лета абяцае стаць фестываль FESTIWOW!, які збярэ каля 22 тысяч паклоннікаў на сталічным стадыёне "Дынама". Арганізатары заяўляюць яркі калейдаскоп выканаўцаў у розных жанрах і сучасных напрамках – рок, рэп, хіп-хоп, поп – і электронная музыка. Сярод хэдлайнераў – The Hatters, Zoloto, Cream Soda, Toxi$, а таксама AY YOLA, MARKUL і ТРЫ ДНІ ДАЖДЖУ. Публіку чакаюць магутныя электронныя рытмы, жывыя гітарныя партыі, чароўныя гукі незвычайных нацыянальных інструментаў і, вядома, вакал артыстаў, якія пакарылі сэрцы паклоннікаў і верхнія радкі вядомых чартаў.

Калі: 2 жніўня
Дзе: Нацыянальны алімпійскі стадыён "Дынама", вул. Кірава, 8, Мінск

"Гранд кірмаш у Палацы "Кветкі Нясвіжа"-2025

Ужо стала цудоўнай традыцыяй у першую суботу жніўня ўпрыгожваць цэнтральны двор Нясвіжскага палацава-паркавага ансамбля кветкамі і фларыстычнымі кампазіцыямі. Наведвальнікаў мерапрыемства ў былой рэзідэнцыі князёў Радзівілаў чакаюць фларыстычныя майстар-класы, паказы адзення беларускіх дызайнераў, кірмаш рамеснікаў і многае іншае. Таксама ў праграме першага дня – выступленне дзіцячай школы балета, а 3 жніўня разгорнуцца майстар-класы па сярэдневяковых танцах і адбудзецца падвядзенне вынікаў конкурсу па фларыстыцы "Кубак Нясвіжа". На працягу свята ўсе жадаючыя змогуць зрабіць арыгінальныя памятныя фота каля фларыстычных кампазіцый з жывых кветак.

Калі: 2–3 жніўня, 11.30–17.00
Дзе: двор Нясвіжскага палацава-паркавага ансамбля, вул. Замкавая, 2, Нясвіж

XIII рэгіянальны фестываль "Гальшанскі замак"-2025

Каля сцен містычнага Гальшанскага замка, апетага класікам Уладзімірам Караткевічам у рамане "Чорны замак Альшанскі", разгорнецца 13-ы рэгіянальны фестываль. Гасцей чакае акунанне ў сярэдневяковую гісторыю адной з самых загадкавых мясцін у Гродзенскім краі. У праграме – экскурсіі па Паўночнай вежы, выстава-продаж работ рамеснікаў, майстар-класы, інтэрактыўныя і гульнявыя пляцоўкі, фотазоны, а таксама выступленні беларускіх выканаўцаў і музычных калектываў, у тым ліку народнага струннага ансамбля "Кантрасты", групы "Брэнд. Бай". Хэдлайнер фестывалю – суперфіналістка тэлевізійнага праекта "Х-фактар Беларусь", прадстаўніца Беларусі на конкурсе "Інтэрбачанне-2025" Насця Краўчанка.

Калі: 2 жніўня, 18.00
Дзе: Гальшанскі замак, аг. Гальшаны, Ашмянскі раён, Гродзенская вобласць

Свята сярэдневяковай культуры "Рыцарскі фэст. Мсціслаў-2025"

Знакаміты рыцарскі фестываль у старажытным Мсціславе ў бягучым годзе разгорнецца не толькі на Замкавай гары, але і на асноўных гарадскіх вуліцах. Госці ўбачаць паказы вулічнай батлейкі, прымуць удзел у квестах і інтэрактыўных гульнях, наведаюць выставы народных умельцаў, атрымаюць асаладу ад музычных імправізацый і краявідаў з пляцоўкі на Пажарнай каланчы. Традыцыйна ў цэнтры ўвагі будуць тэматычныя пляцоўкі: "Старажытная кавадла", "Формула сярэдневяковай кухні", "Зброя пяці стагоддзяў" (выстава ваеннага зброевага арсенала), "Элегантная гісторыя" (выстава прадметаў эвалюцыі жаночай моды і прыгажосці)... Самымі відовішчнымі падзеямі фестывалю стануць тактычныя бугурты, баі пешых рыцараў, паказальныя выступленні конна-гістарычных клубаў, турнір лучнікаў, масавыя бітвы. Кульмінацыяй стане тэатралізаваны штурм замка і фаер-шоу тэатра агню "Атамаоры".

Калі: 2–3 жніўня, 11.00
Дзе: Мсціслаў, Магілёўская вобласць

Фестываль нямога кіно і сучаснай музыкі "КІНЕМО XII" у Мінску

Ужо 12-ы сезон адкрые праект "КІНЕМО" – адзіны ў Беларусі штогадовы фестываль, які ставіць задачай пераасэнсаванне класікі нямога кіно сродкамі сучаснай музыкі. Кампазітары ствараюць музычнае суправаджэнне да фільмаў праграмы і прадстаўляюць яго ўжывую ў рамках фестывальных перформансаў, якія аб'ядноўваюць кінапаказ і канцэрт. Open air фестываль у жніўні прадставіць шэдэўры 20-х гадоў ХХ стагоддзя ад мэтраў сусветнага кінематографа. У праграме – "Паравоз "Генерал" (7 жніўня), "Кот і канарэйка" (14 жніўня), "Цені: начная галюцынацыя" (21 жніўня).

Калі: 7, 14, 21 жніўня, 21.00
Дзе: скульптурны дворык Музея-майстэрні З.І. Азгура, вул. Азгура, 8, Мінск

Фестываль славянскай міфалогіі "Шлях Цмока"-2025 у Бярэзінскім запаведніку

Адзін з самых незвычайных падзейных брэндаў краіны – фестываль "Шлях Цмока" – запрашае акунуцца ў спрадвечна славянскую культуру і міфалогію, а таксама даведацца падрабязней пра гісторыю Лепельшчыны праз мясцовыя міфы і легенды. Шосты раз фестываль разгорнецца ў Бярэзінскім біясферным запаведніку. У праграме-2025 – тэматычныя пляцоўкі міфічных персанажаў, дзённая і начная імерсіўныя экскурсіі па экасцежцы, выстава #нейраМіфы ад галерэі FARBA, створаная пры дапамозе ШІ, тэатральныя пастаноўкі, інтэрактыўныя праграмы, майстар-класы, квесты, выступленні музычных груп "Стокс", "KaS", NEVIKA і начная танцавальная дыджэй-праграма.

Калі: 9–10 жніўня
Дзе: Бярэзінскі біясферны запаведнік, в. Домжарыцы, Лепельскі раён, Віцебская вобласць

Экалагічны фестываль"Спораўскія сенажаці"-2025

Экафестываль у біялагічным заказніку "Спораўскі" 18-ы раз збярэ лепшых касцоў з усёй краіны на чэмпіянат па ручной касьбе. Удзельнічаць могуць каманды мужчынскія, жаночыя, змешаныя. Правілы спаборніцтва застаюцца нязменнымі: камандзе з двух чалавек прапануецца скасіць паласу даўжынёй 100 м (па 1,5 м на кожнага), а затым удзельнікі (як мужчыны, так і жанчыны) з лепшымі вынікамі пазмагаюцца ў асабістым першынстве. Аўтэнтычнасць і складанасць фестывальнага турніру ў тым, што яго ўдзельнікі косяць ручнымі косамі, а такі інструмент трэба ўмець адкляпаць і натачыць! Фестываль прыцягвае ўвагу да праблемы зарастання балот, а таксама дазваляе захаваць беларускую традыцыю, якая ў вёсках перадавалася з пакалення ў пакаленне. Таксама ў рамках свята адбудуцца спаборніцтвы па футболе на балоце, дзе за званне мацнейшых пазмагаюцца 12 маладзёжных каманд.

Калі: 9 жніўня
Дзе: Рэспубліканскі біялагічны заказнік "Спораўскі", в. Высокае, Бярозаўскі раён, Брэсцкая вобласць

Фестываль-выстава "Кераміка Крэва"-2025

Крэўская зямля славіцца не толькі багатай гісторыяй, але і каштоўнымі радовішчамі чырвонай гліны. Пра старажытныя традыцыі сведчыць і раптоўная знаходка аднаго з жыхароў аграгарадка – пласт керамікі XVII стагоддзя, ганчарныя інструменты, манеты таго перыяду, а таксама ўнікальныя для рэгіёна артэфакты – кукуці – гліняныя свістулькі. Абласны фестываль-выстава ў Крэве, прысвечаны кераміцы і народнай творчасці, збярэ майстроў з розных куткоў Беларусі, якія прадэманструюць публіцы свае новыя работы, паспаборнічаюць у рамястве паміж сабой, а таксама падзеляцца сакрэтамі стварэння вырабаў з гліны на майстар-класах.

Калі: 9 жніўня, 12.00–18.00
Дзе: аг. Крэва, Смаргонскі раён, Гродзенская вобласць

Гастранамічнае свята "Іўеўскі памідор"-2025

Самы смачны і яркі фестываль жніўня – "Іўеўскі памідор" – адкрыецца тэатралізаваным шэсцем па вуліцах "таматнай сталіцы" з выхадам на набярэжную сажалкі, дзе адбудзецца адкрыццё. Эстафету прадоўжаць тэматычныя мерапрыемствы: конкурс на лепшы карнавальны касцюм "Чэры-2025", дзіцячае забаўляльнае шоу "Тамаці-Паці", конкурс па плаванні "Плаў-тамат", памідорнае шоу-бітва і памідорны рынг "Іўе-дэ-таматэйра". У забаўляльнай праграме фэсту-2025 – розыгрыш латарэі, шоу, канцэрты мясцовых артыстаў і музычных калектываў, гумарыстычная праграма, фаер-шоу, а таксама – упершыню! – начны флайдборд-шоу.

Калі: 9 жніўня, 15.00
Дзе: набярэжная г. Іўе, Гродзенская вобласць

Міжнародны фестываль "Мотальскія прысмакі"-2025

Адзін з самых папулярных гастрафестываляў Беларусі – "Мотальскія прысмакі" – за 18 гадоў вырас з утульнага мясцовага свята ў яркі праект міжнароднага ўзроўню. Дарэчы, Моталь вядомы яшчэ і як малая радзіма першага прэзідэнта Ізраіля Хаіма Вейцмана. На гэты раз фэст, прысвечаны папулярызацыі і захаванню рэгіянальнай культуры і кулінарных традыцый, запрашае пабываць на... "мотальскім вяселлі". У праграме – выставы вясельных убораў, прыгатаванне мясцовых вясельных страў і кулінарны конкурс на лепшую вясельную страву сярод прадстаўнікоў розных дыяспар, якіх, як правіла, запрашалі на гэта сямейнае свята.

Калі: 9–10 жніўня
Дзе: аг. Моталь, Іванаўскі раён, Брэсцкая вобласць

Minsk Open Fest 2025 у Мінску

Маштабны трохдзённы гарадскі фестываль – Minsk Open Fest 2025 – разгорнецца на стадыёне "Дынама" і іншых пляцоўках сталіцы, аб'яднаўшы спартыўныя спаборніцтвы міжнароднага ўзроўню і відовішчную канцэртную праграму. Асноўныя напрамкі мерапрыемства – Fonbet Кубак Мінска па хакеі пад эгідай НАК Беларусі (11–17 жніўня) і Міжнародны турнір па настольным тэнісе International Grands Cup (12–15 жніўня). Акрамя таго, кульмінацыяй кожнага вечара стануць жывыя open air выступленні папулярных артыстаў і трыб'ют-груп, прысвечаныя самым яркім музычным жанрам – Rap Day, Tribute Day, Rock Day. Госці мінскага стадыёна "Дынама" змогуць паглядзець спартыўныя спаборніцтвы ў live фармаце. Тут жа разгорнуцца фудкорт, лаўнж-зоны для камфортнага адпачынку і прагляду канцэртаў, інтэрактыўныя пляцоўкі.

Калі: 11–17 жніўня
Дзе: стадыён "Дынама", Falcon Club Arena, "Чыжоўка-Арэна", "Алімпік-Арэна", Мінск

IV каравай-фэст "Бацькава булка" ў Свіслачы

Гісторыя каларытнага свята ў Свіслачы пачалася... са свежаспечанай духмянай пляцёнкі, якая нагадала Прэзідэнту Беларусі Аляксандру Лукашэнку смак дзяцінства ў час яго рабочага візіту ў горад у чэрвені 2021 года. З таго часу фестываль, сімвалічна названы "Бацькава булка" і прысвечаны пякарскаму майстэрству, пашырае геаграфію і набірае абароты. Тэмай чацвёртага каравай-фэсту будзе 80-годдзе Перамогі ў Вялікай Айчыннай вайне. Урачыстае адкрыццё – "З вайны спяшаўся зноў дадому салдат і рупны гаспадар" – узновіць вяртанне салдата дадому з вайны. Асобным эпізодам стане стварэнне "хлебнай карты Беларусі", якую выкладуць маленькімі "бацькавымі" булачкамі як сімвал хлебнай і гасцінна-хлебасольнай краіны. Захапляльнае відовішча абяцае "Трактар-Булка-шоу": як адзначаюць арганізатары, "калі прыйшоў доўгачаканы мір, многія франтавікі пераселі з танкаў на трактары, каб вырошчваць збожжа, таму трактар заслужана становіцца адным з герояў каравай-фэсту". Таксама ў праграме-2025 – выстава вырабаў ад прадпрыемстваў, "Гаспадар-шоу", выставы работ прафесійных пекараў і аматараў "Матулін каравай" і многае іншае.

Калі: 16 жніўня, 14.00
Дзе: Свіслач, Гродзенская вобласць

III Міжнародная спецыялізаваная экалагічная выстаўка Ecology Expo 2025

Маштабная міжнародная выстаўка Ecology Expo, прысвечаная пытанням экалогіі і ўстойлівага развіцця, адбудзецца трэці раз і збярэ ў беларускай сталіцы прадстаўнікоў розных кампаній, арганізацый і дзяржаўных устаноў, зацікаўленых у падтрыманні экалагічна чыстых тэхналогій і практык. Выстаўка з'яўляецца буйнейшай пляцоўкай для абмеркавання ключавых пытанняў развіцця зялёнай эканомікі, абмену перадавым вопытам і дэманстрацыі дасягненняў у галіне аховы навакольнага асяроддзя і рацыянальнага выкарыстання прыродных рэсурсаў. Сярод напрамкаў – экалагічныя тэхналогіі ў развіцці, адходы і другасная сыравіна, экатранспарт, экахарчаванне, турызм, рацыянальнае выкарыстанне водных рэсурсаў і іншае.

Калі: 19–21 жніўня
Дзе: Мінскі міжнародны выставачны цэнтр, вул. П.Мядзёлкі, 24, Мінск

Праект "Музыкатэрапія. Дзэн": канцэрт пад адкрытым небам у Мінску

Навінкай лета-2025 у Мінску стане open air мультысэнсарны канцэрт, у якім класічная музыка, тэрапеўтычныя гукі і магія зорнага неба зліюцца ў адзінае цэлае. Маштабны праект "Музыкатэрапія. Дзэн" упершыню разгорнецца на адкрытай арэне ў цэнтры сталіцы і дазволіць стварыць прастору глыбокага расслаблення, унутранага балансу і абсалютнай музычнай прысутнасці. Усяго ў спісе – 10 кампазіцый, падабраных для дасягнення стану ўнутранай раўнавагі і прымірэння. У праграму ўвайшлі творы такіх кампазітараў, як Бах, Франк, Моцарт, Штраус, Пахельбель, Чайкоўскі, Дэбюсі, Гендэль, Шуберт…

Калі: 21 жніўня, 20.00
Дзе: Нацыянальны алімпійскі стадыён "Дынама", вул. Кірава, 8, Мінск

Свята "Ганненскі кірмаш"-2025 у Зэльве

"Ганненскі кірмаш" у Зэльве – унікальны падзейны брэнд Гродзенскага краю і Беларусі. Яго гісторыя ўзыходзіць да ХVI стагоддзя: кожны год тут разгортваўся адзін з буйнейшых кірмашоў у Еўропе па гандлі коньмі. У 1501 годзе першы прывілей на правядзенне атрымала ўдава былога гаспадара мястэчка Ганна Улініч, у 1720-м такі дакумент быў ужо выдадзены прадстаўніку роду Сапегаў. Паводле некаторых даных, у сярэдзіне XIX стагоддзя кірмаш у Зэльве каціраваўся як другі ў Еўропе пасля Лейпцыгскага. Сюды прыязджалі купцы з Гродзенскай, Мінскай, Віленскай, Віцебскай, Маскоўскай, Камянец-Падольскай, Казанскай губерняў, суседняй Польшчы, Галіцыі, Бесарабіі. Традыцыйна гандаль пачынаўся 25 ліпеня ў дзень святой Ганны і доўжыўся цэлы месяц... У наш час кірмаш адрадзіўся ў фармаце каларытнага свята. У гэтым сезоне ён адкрыецца тэатралізаваным паказам з касцюміраваным шэсцем: акцёры адновяць адну са сцэн кірмашу ХVIII стагоддзя. У цэнтры ўвагі будуць коні розных парод. Госці ўбачаць шоу ад коннага клуба, змогуць пракаціцца на коннай павозцы, брычцы і карэце, павучыцца верхавой яздзе. Таксама ў праграме – "Холі батл", конкурс карцін з пяску, "Фіш-фестываль", спаборніцтвы па гіравым спорце "Андрэй збірае сяброў!", адкрыты пленэр па саломапляценні "Саламяны цуд".

Калі: 22–23 жніўня
Дзе: Зэльва, Гродзенская вобласць

VintageDay 2025: выстаўка рэтрааўтамабіляў у Мінску

Адна з буйнейшых выставак рэтрааўтамабіляў VintageDay дазволіць зрабіць займальнае падарожжа ў часе – ад грукату рухавікоў 20-х гадоў ХХ стагоддзя да вытанчанага дызайну і плаўнага ходу сучасных аўто. Усяго ў экспазіцыі на пляцоўцы каля сталічнага Футбольнага манежа размесціцца звыш 400 шэдэўраў аўтамабільнай гісторыі. Наведвальнікі выстаўкі ўбачаць натхняльныя калекцыі, у якіх прадстаўлены і класічныя рарытэтныя ўзоры транспарту, і культавыя аўтамабілі канца ХХ стагоддзя. Акрамя аўтавыстаўкі, гасцей чакаюць сустрэчы з уладальнікамі эксклюзіўных аўто і аднадумцамі, фотасесіі на фоне вінтажных і рэтрамадэлей айчыннага і замежнага аўтапрама, майстар-класы, а таксама фудтракі, розыгрышы прызоў і падарункаў.

Калі: 30–31 жніўня
Дзе: Футбольны манеж, пр. пераможцаў, 20/2, Мінск