Падзеі, факты, анонсы

Каляндар падзей у Беларусі: ЖНIВЕНЬ 2022

Праграма "Водпуск Без Шкарпэтак?!" у Белдзяржцырку

Напярэдадні летняга сезона і самых доўгіх дзіцячых канікулаў артысты Белдзяржцырка запрашаюць гледачоў атрымаць асалоду ад новай праграмы "Водпуск Без Шкарпэтак?!" Адметнасць шоу – яркае клоўнскае трыа "Без шкарпэтак" – уладальнікі мноства ўзнагарод прэстыжных цыркавых фестываляў у Венгрыі, Францыі, Расіі, Ізраілі, Іспаніі, а таксама знакамітага форуму ў Монтэ-Карла. Акрамя іскрамётнага гумару ад прадстаўнікоў камічнага жанру, гледачы ўбачаць арыгінальныя цыркавыя нумары паветраных гімнастаў, канатаходцаў, наезнікаў на конях, сабачак на скейтбордах, незвычайную гульню ў більярд, вышэйшую школу верхавой язды і нават бокс з кенгуру ад дрэсіроўшчыка Антона Светлакова.

Калі: 14 мая – 7 жніўня
Дзе: Беларускі дзяржаўны цырк, пр. Незалежнасці, 32, Мінск

Музычна-турыстычны сезон у Верхнім горадзе

Новы турыстычны сезон, прысвечаны 955-годдзю Мінска і Году гістарычнай памяці, стартаваў у сталічным Верхнім горадзе 21 мая. Кожную суботу да верасня ён будзе радаваць гасцей яркімі падзеямі. У праграме-2022 – вечары джаза, праект "Класіка ля Ратушы", канцэрт акадэмічнага ансамбля "Харошкі". Акрамя таго, у гэтым сезоне ля атэля "Манастырскі" адкрыецца тэатральны дворык, дзе будуць выступаць студэнцкія і прафесійныя калектывы. Госці і жыхары сталіцы таксама змогуць наведаць кінапаказы пад адкрытым небам і ўбачыць папулярныя карціны кінастудыі "Беларусьфільм". А яшчэ сталічныя бібліятэкі арганізуюць творчую пешаходку, дзе можна азнаёміцца з навінкамі літаратуры і сустрэцца з пісьменнікамі.

Калі: 21 мая – 17 верасня
Дзе: плошча Свабоды, Верхні горад, Мінск

Гарадскі пікнік Vulitsa Ezha 2022 у Мінску

Сёмы сезон Vulitsa Ezha адзначыць адразу трыма фестывалямі. У маляўнічым месцы на тэрыторыі сталічнага Батанічнага саду госці змогуць прадэгуставаць спецыяльнае меню фуд-корта, зазірнуць у кактэйльныя бары з чылаўт-зонай, наведаць Local Food Market са свежай фермерскай прадукцыяй, навучыцца гатаваць новыя стравы ў шэфаў, набыць унікальныя рэчы на дызайнерскім маркеце. Акрамя таго, гасцям прапануюць атрымаць асалоду ад цікавых фільмаў у кінатэатры пад адкрытым небам, DJ-сэтамі і канцэртамі жывой музыкі. Будуць арганізаваны забавы ў зонах актывацый і яркія лакацыі для інста-фотасесій.

Калі: 18–19 чэрвеня, 23–24 ліпеня, 3–4 верасня
Дзе: Цэнтральны батанічны сад НАН Беларусі, вул. Сурганава, 2В, Мінск

Фестываль "Вытокі. Крок да Алімпу" ў Беларусі

Культурна-спартыўны фестываль "Вытокі. Крок да Алімпу", які заявіў пра сябе ў 2021-м, набірае абароты. У другім сезоне ён зноў ахапіў шэсць гарадоў краіны – на гэты раз у спісе Рэчыца, Столін, Навагрудак, Горкі, Полацк і Капыль. Канцэпцыя фестывалю заключаецца ў тым, каб кожны – і дзіця, і дарослы – мог знайсці сабе забаву даспадобы. Дзясяткі спартыўных лакацый, захапляючыя экскурсіі, канцэрты маладых вакалістаў і папулярных артыстаў, выстаўкі-продажы "Беларускія брэнды", паказы дызайнераў, фуд-корты са стравамі нацыянальнай кухні – праграма надзвычай насычаная. Акрамя таго, у Год гістарычнай памяці кожны горад імкнецца цікава расказаць пра сябе, таму гасцям прапаноўваюць экскурсіі па знакавых славутых мясцінах, тэатралізаваныя пастаноўкі, гістарычныя квесты. Галоўны арганізатар праекта "Вытокі. Крок да Алімпу" – Нацыянальны алімпійскі камітэт Беларусі – запрашае актыўна ўдзельнічаць ва ўсіх спартыўных спаборніцтвах свята. Дарэчы, у кожным горадзе-ўдзельніку робяць акцэнт на тыя віды спорту, якія паспяхова развіваюцца ў канкрэтным рэгіёне.

Калі, дзе:
22–23 ліпеня, Горкі, Магілёўская вобласць
12–13 жніўня, Полацк, Віцебская вобласць
26–27 жніўня, Капыль, Мінская вобласць

Праект "Мастак і горад. Міхаіл Савіцкі" ў Мінску

Праект "Мастак і горад" 11-ы год запар прадаўжае знаёміць мінчан і гасцей сталіцы з выдатнымі прадстаўнікамі беларускага мастацтва. З мінулага года выставачная экспазіцыя размяшчаецца на пешаходнай вуліцы Камсамольскай у цэнтры Мінска. У гэтым летнім сезоне куратары запрашаюць далучыцца да творчасці Героя Беларусі народнага мастака Міхаіла Савіцкага, 100-годдзе з дня нараджэння якога адзначаецца ў 2022 г. Тут прадстаўлены 34 работы, з іх 15 – аўтарства самога жывапісца, а 19 – выпускнікоў Творчых акадэмічных майстэрняў жывапісу, графікі і скульптуры, якія ў 1981-м з'явіліся ў Мінску дзякуючы намаганням майстра. Удзельнікі экспазіцыі – вядомыя мастакі краіны Віктар Альшэўскі, Ігар Бархаткоў, Уладзімір Ганчарук, Віктар Дубрава, Раман Заслонаў, Уладзімір Кожух, Юрый Крупянкоў.

Калі: 30 чэрвеня – 30 верасня
Дзе: вул. Камсамольская, Мінск

Выстава "Прыгажосць і мода. ХХ стагоддзе" ў Гродне

Гісторыя галавакружных узлётаў і падзенняў ХХ стагоддзя, адлюстраваня ў аксесуарах, упрыгажэннях, уборах, абутку і нават парфумерыі, прадстаўлена на выставе ў гродзенскім Новым замку. У аснове экспазіцыі – прадметы з рэтракалекцыі беларускі Таццяны Фядосавай. Паводле слоў уладальніцы, каштоўнасць кожнага экспаната не ў дарагіх тканінах або майстэрстве дызайнераў, а ў гісторыях, якія расказваюць сукенкі, сумачкі або флаконы, з'яўляючыся сведкамі ХХ стагоддзя. Сярод жамчужын збору – вясельны касцюм з батысту 1918 года, сукенка кінадзівы Галівуда 1930-х Кэй Фрэнсіс, капялюшык 1930-х з пёраў маскоўскай птушкафабрыкі імя Крупскай, капялюшык з конскім воласам ад Скіяпарэлі 1950-х, сукенка з гардэроба амерыканскага сямейства Прат 1920-х, "трафейныя" сукенкі 1940-х з Германіі. Асаблівы гонар – вячэрняя сукенка брытанскага мадэльера Мюрэя Арбейда, які ствараў сукенкі для прынцэсы Дзіяны.

Калі: 20 ліпеня – 23 кастрычніка
Дзе: Новы замак, Сенатарская зала, вул. Замкавая, 20, Гродна

TheatreHD: трансляцыі лепшых сусветных спектакляў у Мінску

У жніўні трансляцыі лепшых пастановак са сцэн свету прадоўжацца ў сталічным кінатэатры "Цэнтральны". У праграме – драма, опера, балет, а таксама дакументальнае кіно пра мастацтва і выдатных жывапісцаў – #АртЛекторийВкино.

Калі: жнівень
Дзе: VOKA CINEMA by Silver Screen, кінатэатр "Цэнтральны", Falcon Club буцік Кіно, Мінск

Міжнародны фестываль SPRAVA 2022

Міжнародны фестываль-узаемадзеянне SPRAVA, які пройдзе ў кемпінгу на паўвостраве Чарэйскага возера, на два дні аб'яднае людзей творчых прафесій – музыкантаў, мастакоў, архітэктараў, гісторыкаў, рамеснікаў. Паводле задумы арганізатараў, такім чынам тут кожны год нараджаецца новая культурная прастора. У маляўнічых мясцінах недалёка ад руін аднаго з першых уніяцкіх храмаў у Беларусі і зарадзілася ідэя стварэння незвычайнага фэсту. Хараство прыроды, лекторыі, ёга, практыкі свабоднага перамяшчэння, майстар-класы па маляванні, спектаклі і канцэрты – усё гэта чакае гасцей летняга фестывалю SPRAVA.

Калі: 5–7 жніўня
Дзе: Чарэйскае возера, в. Белая Царква, Чашніцкі раён, Віцебская вобласць

Свята "Смак мёду" ў Зэльвенскім раёне

Незвычайны фэст, прысвечаны лету і карыснаму салодкаму ласунку, пройдзе ў аграгарадку Бародзічы Зэльвенскага раёна. Напярэдадні Мядовага Спаса – аднаго з прыгожых традыцыйных свят жніўня – пчаляры пачалі ўжо збіраць мёд лета-2022 і будуць дзяліцца з гасцямі яго непаўторнымі водарамі і густамі. Стартуюць урачыстасці з гімна пчаляроў. А далей Пчаляр, Пчолка Мая і казачніца Ганна сустрэнуць удзельнікаў у сваім дворыку песнямі і цікавымі гісторыямі, пачастуюць мядовымі напіткамі і ласункамі, дамашнімі нарыхтоўкамі. Рамеснікі правядуць майстар-класы па вырабе драўлянай скульптуры мядзведзя з бочачкай, а майстрыхі-рукадзельніцы навучаць, як ствараць сувенірных пчолак з бісеру і фааміну.

Калі: 6 жніўня
Дзе: аграгарадок Бародзічы, Зэльвенскі раён, Гродзенская вобласць

Фестываль "Ільняная карусель"-2022

Лён – не толькі традыцыйны сімвал Беларусі, які ў наш час упрыгожвае герб краіны, але сапраўды нацыянальны здабытак. Тканіны, адзенне, ручнікі, лялькі-абярэгі – мноства самабытных вырабаў ствараюць беларусы з "паўночнага шоўку". А летам у яго гонар праходзіць асаблівы фестываль. У праграме "Льняной каруселі"-2022 – выставы, кірмашы-продажы і майстар-класы ад народных майстроў дэкаратыўна-прыкладной творчасці, экспазіцыя музея лёну пад адкрытым небам, тэматычныя падворкі, ільняны парад і дэфіле, ільняныя пачастункі. Галоўным персанажам фестывалю ў Карме стала міфалагічная палявая гаспадыня – Клюсымка.

Калі: 6–7 жніўня
Дзе: г.п. Карма, Гомельская вобласць

Фестываль "Гальшанскі замак"

Гістарычны фестываль 11-ы раз пройдзе ля сцен знакамітага замка, які стаў містычным героем дэтэктыўнага рамана класіка беларускай літаратуры Уладзіміра Караткевіча "Чорны замак Альшанскі". На гэты раз сустрэча адбудзецца пад дэвізам "З мінулага ў сучаснае". Пачнецца праграма з канцэрта арганнай музыкі ў касцёле Святога Іаана Хрысціцеля і тэатралізаванага шэсця ад цэнтра Гальшан да яго жамчужыны – былой рэзідэнцыі роду Сапегаў, якая год таму пасля рэстаўрацыі расчыніла дзверы для турыстаў. Урачыстае адкрыццё запланавана на 17.00. Прадоўжаць фестываль інтэрактыўныя праграмы клубаў гістарычнай рэканструкцыі "Клан МакВітан" і "Веруш", выступленне групы Nevrida, коннае шоу ад клуба "Секерж", канцэртная праграма ўдзельнікаў шоу "Х-Фактар Беларусь" і піратэхнічнае шоу "Магія агню". На працягу ўсяго свята гасцей чакаюць тэматычныя інтэрактыўныя пляцоўкі, фуд-корты, дзіцячая забаўляльная зона, а таксама аглядныя экскурсіі па Паўночнай вежы замка і выдатных мясцінах Гальшан.

Калі: 6 жніўня
Дзе: Гальшанскі замак, аграгарадок Гальшаны, Ашмянскі раён, Гродзенская вобласць
Даведацца больш

Фестываль "Палескі ўюн"

Гастранамічны і экалагічны фестываль "Палескі ўюн", які ў гэтым годзе пройдзе ўпершыню, запрашае гасцей у Пінскі раён, дзе размешчаны ландшафтныя заказнікі рэспубліканскага значэння "Сярэдняя Прыпяць" і "Прастыр". Для мерапрыемства выбралі пляцоўку ў вёсцы Гарадзішча на базе эколага-турыстычнага комплексу "Цішыня". Назва новага фестывалю вельмі цікавая. Уюн – спрадвечна палеская рыба, якая для палешукоў была разменнай манетай. Цяпер ён знаходзіцца на мяжы знікнення, і адна з мэт – прыцягнуць увагу да гэтага факта, расказаць пра беражлівае стаўленне да прыроды. На фестывалі арганізуюць "бітву на чарпаках": дзесяць каманд раёна паспаборнічаюць у майстэрстве гатавання юшкі, але гатаваць страву будуць, вядома, не з уюна, а са шчупака, плоткі, карася, карпа і іншай рачной рыбы. Таксама госці змогуць наведаць майстар-класы, выставу-кірмаш рамеснікаў і мастакоў, пакатацца на лодках і байдарках. Публіку будуць забаўляць творчыя калектывы, запланаваны шоу-праграма ад МНС і "Жывыя статуі", дыскатэка, на канцэрце выступіць беларускі дзяржаўны ансамбль "Песняры". Для дзяцей будуць працаваць гульнявыя зоны і канатны гарадок.

Калі: 6 жніўня
Дзе: в. Гарадзішча, Пінскі раён, Брэсцкая вобласць

Фестываль вясковай культуры "Бакштаўскі каларыт"

Далучыцца да вытокаў, святочных і штодзённых традыцый беларусаў запрашае фестываль "Бакштаўскі каларыт". Госці змогуць акунуцца ў атмасферу беларускай вёскі з яе побытам, аўтэнтычнымі абрадамі і каларытнай культурай – народнымі песнямі, танцамі, рукатворнай творчасцю, спрадвечнымі рамёствамі. Праграма свята-2022 насычаная і цікавая: гасцей чакаюць тэатралізаваны паказ "Сёння ў нашай хаце свята", канцэрт фальклорных калектываў раёна "Гучы, родная песня", забаўляльна-гульнявая праграма "Гульнёвы кірмаш", майстар-клас "Танцы народнага побыту", кірмаш народнай творчасці "З крыніц прыгажосці", выстава прадметаў народнага побыту "Зроблена рукамі землякоў".

Калі: 7 жніўня
Дзе: в. Бакшты, Іўеўскі раён, Гродзенская вобласць

Баль пад адкрытым небам у гонар 880-годдзя Гомеля

Прыгожую юбілейную дату Гомель маштабна адзначыць у Дзень горада 10 верасня, але падарункі і незвычайныя мерапрыемствы ў гонар дня нараджэння ён атрымлівае ўжо многія месяцы. Напрыклад, у адзін з вечароў жніўня жыхароў і гасцей Гомеля чакае баль пад адкрытым небам. Атмасфернае дзейства разгорнецца на набярэжнай ракі Сож. У "залу" для свецкага раўту ператворыцца пляцоўка ля знакамітай Лебядзінай сажалкі, якая калісьці была рэчышчам старажытнага ручая Гамяюк. Недалёка размешчана і галоўная выдатная мясціна горада – палац Румянцавых і Паскевічаў, дзе стагоддзі таму праводзілі раскошныя балі. Урэшце, сучасны раўт абяцае стаць не менш уражальным. Дамы павінны апрануцца ў бальныя сукенкі, кавалеры – у класічныя касцюмы. Праграма балю складаецца з двух аддзяленняў. Танцавальная карта ўключыць такія пазіцыі, як "Гранд-марш", "Вальс знаёмстваў", "Акварэль", "Вальс-прагулка з пераходам", "Фігурны вальс", "Дунайскія хвалі", "Падэграс", "Багемская полька", "Полька-тройка", "Падэспань", "Аўстралійскі вальс", "Рускі вальс", "Свецкі ручаёк", "Паказальныя танцы", а таксама творчыя выступленні.

Калі: 10 жніўня
Дзе: набярэжная ракі Сож, Гомель

Аграэкафестываль "Спораўскія сенажаці"-2022

Самабытны фестываль 15-ы раз аб'яднае лепшых касцоў з розных краін на запаведных землях Прыпяцкага Палесся ў рэспубліканскім біялагічным заказніку "Спораўскі". Місіяй фэсту з'яўляецца вяртанне да вытокаў, а таксама прыцягненне ўвагі да праблемы зарастання балот. Напрыклад, для вяртлявай чарацянкі, уключанай у нацыянальную Чырвоную кнігу, гэта стварае вялікія цяжкасці, і рэдкая птушка перастае гнездавацца ў гэтай мясцовасці. Дарэчы, арганізатары запрашаюць паўдзельнічаць у фестывалі не толькі вопытных касцоў – паспрабаваць свае сілы могуць і навічкі. Трэба толькі выканаць галоўную ўмову: у камандзе павінны быць два чалавекі. У сваю чаргу ў футбол на балоце змогуць згуляць да дзесяці каманд.

Калі: 13 жніўня
Дзе: в. Высокае, Бярозаўскі раён, Брэсцкая вобласць
Даведацца больш

"Свята мора"-2022 на Аўгустоўскім канале

Аўгустоўскі канал уяўляе сабой унікальнае гідратэхнічнае збудаванне і з'яўляецца любімым месцам для адпачынку жыхароў Гарадзеншчыны і шматлікіх гасцей рэгіёна. З 1920 года летам у раёне шлюза Дамброўка праводзілася "Свята мора" – гістарычная рэканструкцыя гулянняў, арганізаваных яшчэ ў часы Стафана Баторыя. Пасля аднаўлення традыцыі ў 2017-м тут праходзяць спаборніцтвы ў плаванні "На чым папала". Пры гэтым удзельнікі спаборнічаюць не толькі ў хуткасці, але і арыгінальнасці судна, касцюмах і вобразах. Уражваюць і "сухапутныя" забавы. Напрыклад, у турніры па балотным футболе мужчынскія і жаночыя каманды змагаюцца на полі, дзе бруд можа даходзіць да калена.

Калі: 13 жніўня
Дзе: Аўгустоўскі канал, Гродзенскі раён

Міжнародны фестываль этнакультурных традыцый "Кліч Палесся"

Амаль 5 тысяч гасцей чакае ў бягучым годзе "Кліч Палесся", які, паводле задумы рэжысёра, разгорнецца на тэрыторыі музея пад адкрытым небам у Ляскавічах. Дамашнія прысмакі і стравы мясцовай кухні прадставяць падворкі Гомельскай і Брэсцкай абласцей. Навінка сезона – этназаафэст з элементамі кантактнага заапарка. Асобная пляцоўка пад назвай "Партызанскі край" прысвечана Году гістарычнай памяці. Госці змогуць таксама атрымаць асалоду ад воднай прагулкай на цеплаходзе або лодцы па Прыпяці. Упершыню на фестывалі з'явяцца "лятаючыя людзі": госці з Ніжняга Ноўгарада прадставяць воднае шоу. За званне "Самы моцны паляшук" пазмагаюцца больш за 10 моцных удальцоў, тэатралізаваная лінія будзе звязана з пошукам... сэрца Палесся. Не абыдзецца без конкурсу прыгажосці і грацыі – візітнай карткі краю: за карону "Палескай прыгажуні" ў гэтым сезоне будуць спаборнічаць 11 жыхарак Прыпяцкага Палесся.

Калі: 20 жніўня
Дзе: Нацыянальны парк "Прыпяцкі", аграгарадок Ляскавічы, Петрыкаўскі раён, Гомельская вобласць

Свята "Ружанская брама"

Легендарны Ружанскі палац роду Сапегаў, які калісьці параўноўвалі з Версалем, з 2008 года адраджаецца, становячыся ўсё больш прывабным музейна-турыстычным аб'ектам. Тут адноўлены ўязная брама са скульптурай святой Ганны, усходні і заходні флігелі, дзе з 2011 года працуе музей. Цяпер на тэрыторыі комплексу актыўна ідзе рэстаўрацыя Усходняга корпуса, дзе ў будучым размесцяцца тэатр, гасцініца і рэстаран. Усё гэта можна ўбачыць, прыехаўшы на традыцыйнае свята "Ружанская брама". У афішы – канцэрт калектываў і салістаў Брэсцкай вобласці "Ружаны запрашаюць", тэатралізаваная праграма "У будучыню праз стагоддзі", рыцарскае шоу, канцэрт фіналістаў тэлепраекта "Х-фактар Беларусь", выступленні ансамбля "Бяседа" і групы "Дразды", Горад майстроў, вогненнае шоу і шоу барабаншчыкаў, экскурсіі па музеі і святочны феерверк над "беларускім Версалем".

Калі: 20 жніўня
Дзе: Ружанскі палацавы комплекс роду Сапегаў, г.п. Ружаны, Пружанскі раён, Брэсцкая вобласць