Падзеі, факты, анонсы

Каляндар падзей у Беларусі: ВЕРАСЕНЬ 2021

Сябры! Жыццё вымушае ўносіць карэктывы і ў тыя падзеі, пра якія кожны месяц расказвае каляндар Belarus.by. Успышка каранавіруса ў Еўропе і свеце выклікала закрыццё граніц дзяржаў, абмежаванне міжнароднага перамяшчэння, перанос і адмену масавых мерапрыемстваў. І вядома, самі людзі цяпер гатовы пачакаць з паездкамі, паходамі і забавамі, каб засцерагчы ад небяспекі сябе і блізкіх.

Беларусь сёння прымае ўсе неабходныя меры, каб не дапусціць распаўсюджвання інфекцыі. Краіна не ўвяла жорсткія абмежаванні на перамяшчэнне, аднак заклікае КОЖНАГА ЧАЛАВЕКА праяўляць асаблівую асцярожнасць, выконваць рэкамендацыі СААЗ і ўрачоў, вельмі строга захоўваць правілы асабістай гігіены, а галоўнае – беражліва ставіцца адзін да аднаго. У выпадку прыезду з эпідэміялагічна нестабільных рэгіёнаў і краін, пры самым малым падазрэнні на пагаршэнне самаадчування неабходна звярнуцца да медыкаў і, вядома ж, як мага хутчэй самаізалявацца, каб не стаць разносчыкам любой інфекцыі (не толькі каранавіруса)!

У гэтай сітуацыі адбываюцца адмены і пераносы вялікіх мерапрыемстваў, таму просім загаддзя ўдакладняць інфармацыю. Як анансуюць арганізатары, білеты на ўсе перанесеныя падзеі будуць сапраўдныя. І помніце: галоўнае – быць здаровымі!

Выстава "Тадэвуш Касцюшка як мастак"

4 лютага споўнілася 275 гадоў з дня нараджэння нацыянальнага героя Беларусі, Польшчы і ЗША Тадэвуша Касцюшкі. У гэты дзень на малой радзіме выдатнага ваеннага і палітычнага дзеяча – у мемарыяльным музеі-сядзібе ва ўрочышчы Мерачоўшчына горада Косава – разгарнулася ўнікальная выстава-праект, якая раскрывае знакамітага генерала ў творчай іпастасі. Наведвальнікі могуць убачыць 16 рэпрадукцый работ Касцюшкі, выкананых ім у розныя перыяды жыцця. Тут прадстаўлены і першыя палотны – пераважна копіі работ іншых мастакоў, зробленыя ў час вучобы ў Каралеўскай акадэміі жывапісу і скульптуры ў Францыі, і рэплікі карцін больш позняга перыяду. Нягледзячы на тое, што Тадэвуш Касцюшка звязаў жыццё з ваеннай справай, ён прадаўжаў займацца жывапісам і пасля паўстання 1794 года, а ў Амерыцы набыў славу партрэтыста.

Калі: 4 лютага – 31 снежня
Дзе: Мемарыяльны музей-сядзіба імя Тадэвуша Касцюшкі, Брэсцкая вобласць, Іванаўскі раён, Косава, вул. Т.Касцюшкі, 108
Даведацца падрабязней

Выстава "Мастак і горад" у Мінску

Праект "Мастак і горад" адкрыў 10-ы сезон, атрымаўшы прапіску на Камсамольскай вуліцы, аднак не страціў сваю місію – знаёміць мінчан і гасцей сталіцы з лепшымі прадстаўнікамі сучаснага беларускага мастацтва. На гэты раз у фокусе ўвагі open air выставы – творчасць знакамітага мастака-пейзажыста – Леаніда Шчамялёва. У студзені 2021-га народнага мастака не стала, але яго творы будуць жыць. Карціны захоўваюцца ў многіх музеях, у тым ліку Нацыянальным мастацкім і абласных краязнаўчых. Госці мінскай галерэі пад адкрытым небам азнаёмяцца з гісторыяй стварэння пейзажаў і палотнаў, прысвечаных малой радзіме аўтара, пры дапамозе аўдыягіда.

Калі: з 28 мая
Дзе: бульвар па вул. Камсамольскай, Мінск

Міні-фестываль актуальнай культуры "Погляд з Нідэрландаў"

"Погляд з Нідэрландаў" упершыню прадэманструюць арганізатары міні-фестывалю актуальнага мастацтва гэтай краіны ў Мінску. Адкрыецца форум паказам фільма Ёнатана Элберса "Клуб выродлівых дзяцей" (26-29 жніўня), які ў 2020 годзе атрымаў Гран-пры МКФ дзіцячых фільмаў у Нью-Ёрку. Прадоўжыць эстафету запіс пастаноўкі п'есы Артура Мілера "Від з моста" (1 верасня). "Сланечнікі Ван Гога" (4 верасня) стануць падарункам для аматараў галандскага мастацтва: гэта ўнікальная магчымасць убачыць серыю знакамітых нацюрмортаў у HD якасці. Тэатральнае палатно "Электра/Арэст" (5 верасня) рэжысёра Іва ван Хове пакажа майстэрскае аб'яднанне дзвюх п'ес Эўрыпіда ў аповесці пра зло, якое не мае апраўдання, і помсту, што гняце душу.

Калі: 26 жніўня - 5 верасня
Дзе: Falcon Club Cinema Boutique, пр. Пераможцаў, 20, Мінск

"Шэдэўры Гюстава Дарэ" ў Нацыянальным цэнтры сучасных мастацтваў

Французскі мастак і графік XIX стагоддзя Поль Гюстаў Дарэ ўвайшоў у сусветную гісторыю як геніяльны ілюстратар літаратурных твораў. Спадчына майстра налічвае дзясяткі тысяч работ, многія з якіх уваходзяць у залаты фонд усяго свету. Упершыню беларускія знатакі Дарэ змогуць убачыць больш за 120 ілюстрацый да вядомых твораў. Сярод іх "Боская камедыя" Дантэ Аліг'еры, "Хітрамудры гідальга Дон Кіхот Ламанчскі" Мігеля дэ Сервантэса, "Прыгоды Барона Мюнхгаўзена" Рудольфа Эрыха Распэ…

Калі: 27 жніўня - 24 кастрычніка
Дзе: Нацыянальны цэнтр сучасных мастацтваў, пр. Незалежнасці, 47, Мінск
Даведацца падрабязней

TheatreHD: трансляцыі лепшых сусветных спектакляў у Мінску

У верасні трансляцыі лепшых пастановак са сцэн свету прадоўжацца ў сталічных кіназалах. У праграме - драма, опера, балет, а таксама дакументальнае кіно пра мастацтва і выдатных жывапісцаў - #АртЛекторийВкино.

Калі: з 1 верасня
Дзе: VOKA CINEMA by Silver Screen, кінатэатр "Цэнтральны", Буцік кіно, Мінск

Фестываль мастацтва "Арт-Мінск-2021"

"Арт-Мінск", які з'яўляецца адным з буйнейшых мерапрыемстваў, што прэзентуюць мастацтва Беларусі, чацвёрты раз стане цэнтрам прыцягнення сучасных мастакоў, скульптараў, фатографаў... Як чакаецца, фестываль-2021 збярэ амаль 240 творцаў. Гасцей прымуць галоўная пляцоўка - сталічны Палац мастацтва, а таксама яшчэ сем культурных лакацый, сярод якіх Нацыянальная бібліятэка Беларусі, прастора "Арт-Фабрыка", галерэі "Мастацтва", DK. Знатакоў чакае сустрэча з больш як 800 творамі ў розных мастацкіх напрамках: ад класічнага выяўленчага мастацтва да лічбавых інсталяцый і відэаарта - работы як ужо вядомых аўтараў, так і маладых дэбютантаў праекта.

Калі: 3-26 верасня
Дзе: Палац мастацтва, Нацыянальная бібліятэка Беларусі, прастора "Арт-фабрыка", галерэі "Мастацтва", DK
Даведацца падрабязней

XXVIII Дзень беларускага пісьменства ў Капылі

У 2021-м галоўнае свята нацыянальнага слова прымае капыльская зямля - радзіма 52 знакамітых беларускіх пісьменнікаў. Цяперашні Дзень беларускага пісьменства пройдзе пад знакам аб'яўленага ў краіне Года народнага адзінства, і арганізатары падрыхтавалі для гасцей шмат цікавага. На Фестывалі кнігі і прэсы можна будзе прагуляцца па пяці павільёнах: "Адзінства", "Памяць", "Традыцыі і сучаснасць", "Слова пісьменніка", "Разам з кнігай мы расцём" - у кожным з іх арганізуюць фотазоны, тэматычныя выстаўкі і інтэрактыўныя праграмы. У час свята ўрачыста адкрыецца Алея пісьменнікаў Капыльскага раёна. Там устанавілі інтэрактыўныя лаўкі з QR-кодамі, адсканіраваўшы якія жадаючыя даведаюцца пра біяграфію кожнага аўтара і пазнаёмяцца з яго творамі. А на пляцоўцы "Літаратурны зэдлік" можна будзе адчуць сябе аратарам - прачытаць верш або ўрывак з прозы для вялікай аўдыторыі: анлайн-трансляцыя будзе даступна на YouTube. Самым азартным гасцям свята прапануюць інтэрактыўны пешаходны QR-квэст "Капыльскі рог". Ігракі прадэманструюць інтэлектуальныя здольнасці, паспрабуюць разгадаць загадкі і шмат даведаюцца пра беларускіх пісьменнікаў.

Калі: 4-5 верасня
Дзе: Мінская вобласць, г. Капыль

Гарадскі пікнік Vulitsa Ezha

Шосты сезон папулярнага мінскага пікніка Vulitsa Ezha 2021 завершыцца вялікім гастрасвятам. Каля 50 сталічных устаноў сярод удзельнікаў фуд-корта, 200 страў з кулінарных традыцый розных народаў свету, эксклюзіўнае меню, экапрадукцыя ад фермераў на Local Food Market - дні абяцаюць быць насычанымі. Акрамя таго, у праграме - кінатэатр пад адкрытым небам, майстар-класы і новыя рэцэпты ад шэф-повараў у кулінарнай школе, уручэнне прэміі Ezha Awards лепшаму рэзідэнту фуд-корта, яркія фотазоны, розыгрышы прызоў, займальныя гульні.

Калі: 4-5 верасня
Дзе: Цэнтральны батанічны сад НАН Беларусі, вул. Сурганава, 2в, Мінск

Прэм'ера ў Вялікім тэатры: "Дзікае паляванне караля Стаха"

Прэм'ера опернага спектакля паводле рамана выдатнага беларускага пісьменніка Уладзіміра Караткевіча адкрые 89-ы сезон у Вялікім тэатры. Упершыню нацыянальная класіка прагучала на галоўнай сцэне ў 1989 годзе, калі над пастаноўкай працавалі Уладзімір Солтан і музычны кіраўнік Яраслаў Вашчак. У 1990-м творчы тандэм і выканаўцы галоўных роляў - Наталля Кастэнка, Віктар Скорабагатаў і Уладзімір Экнадыёсаў - былі ўдастоены Дзяржаўнай прэміі БССР. У новым прачытанні спектакль прэзентавала рэжысёр Ганна Маторная. Старадаўнія замкі, гадзіннікі як ідэя адыходзячага часу, шахматы як лейтматыў вечнай гульні, колеры і вобразы слуцкіх паясоў, дэкарацыі, якія адсылаюць да абразоў XV-XVI стагоддзяў - усё гэта стала сімваламі, напоўненымі асаблівым сэнсам, важным для разумення задумы пастаноўкі.

Калі: 8 верасня
Дзе: Нацыянальны акадэмічны Вялікі тэатр оперы і балета, пл. Парыжскай Камуны, 1, Мінск
Даведацца падрабязней

XXV Міжнародны тэатральны фестываль "Белая вежа"

Юбілейны форум, прысвечаны 30-годдзю стварэння Саюза Незалежных Дзяржаў, збярэ 22 тэатры з 7 краін - Беларусі, Арменіі, Грузіі, Казахстана, Малдовы, Расіі і Таджыкістана. У праграме "Белай вежы"-2021 прадстаўлены розныя жанры: балет, музычная камедыя, меладрама, эксперыментальная драма, пластычныя спектаклі, а таксама лялечныя пастаноўкі для дзяцей і дарослых. Сярод удзельнікаў фестывалю - чатыры ўладальнікі Гран-пры папярэдніх форумаў, лаўрэаты Нацыянальнай тэатральнай прэміі Беларусі і расійскай "Залатой маскі". У сувязі з эпідабстаноўкай арганізатары прадугледзелі асаблівую рассадку гледачоў у залах з захаваннем іншых мер бяспекі.
 
Калі: 10-18 верасня
Дзе: Брэсцкі акадэмічны тэатр драмы, Брэсцкі тэатр лялек і абласны Палац культуры прафсаюзаў

"Падарожжа ў свет цырка" ў Мінску

Беларускія цыркавыя артысты запрашаюць мінчан і гасцей сталіцы адправіцца ў дзіўнае падарожжа ў свет цыркавога мастацтва. З самых першых крокаў гледачоў будуць чакаць у фае: тут разгорнуцца выстаўка рэквізіту і касцюмаў, інтэрактыўныя і фотавыставы, а таксама музейная экспазіцыя. Далей наведвальнікаў запрашаюць у залу. Усяго на адзін дзень манеж ператворыцца ў пляцоўку для міні-паказаў, майстар-класаў, стасункаў з артыстамі ў фармаце "пытанне-адказ", а таксама адбудзецца розыгрыш прызоў.

Калі: 11 верасня, сеансы ў 11.00, 14.00, 17.00
Дзе: Беларускі дзяржаўны цырк, пр. Незалежнасці, 32, Мінск

Барыс Грабеншчыкоў і група "Акварыум"

"РАСТА БАСТА!" - так назвалі новую праграму гуру рускага рок-н-рола Барыс Грабеншчыкоў і легендарная група "Акварыум". Ужо больш за 48 гадоў БГ стварае сваю музыку, і за гэты час запісаў больш за 50 альбомаў і каля 1000 песень. Менавіта яму ўдалося "ўзаконіць" паняцце рока і першым з рускіх адаптаваць эстэтыку заходняй музычнай культуры да асаблівасцей роднай мовы. З яго лёгкай рукі на рускай мове загучалі не толькі пецярбургскія рамансы, але і ямайскае рэгі, афрыканскі сукус, амерыканскі фолк і ірландскія балады... Барыс Грабеншчыкоў з'яўляецца не толькі філосафам, кампазітарам і паэтам, ён таксама і культавая фігура рускай культуры, заснавальнік савецкага рока, кумір і ідэолаг моладзі 1970-90-х.

Калі: 12 верасня
Дзе: Prime Hall, пр. Пераможцаў, 65, Мінск

Дзень горада Мінска - 2021

Сваё галоўнае свята беларуская сталіца па традыцыі адзначае ў пачатку каляндарнай восені, запрашаючы гасцей на яркія сустрэчы ў розных кутках горада. І на гэты раз рыхтуецца шырокая шматдзённая праграма, але асноўныя падзеі разгорнуцца 10-12 верасня. Галоўнай пляцоўкай Дня горада Мінска стане тэрыторыя каля Палаца спорту, дзе адкрыецца святочны кірмаш і пройдзе шмат відовішчных мерапрыемстваў. У пятніцу гандаль пачнецца ў 12.00, у суботу - з 11.00, у нядзелю - з 9.00 і будзе доўжыцца да позняга вечара. З поўдня 11 верасня ў шумны гандаль уварвуцца рытмы музычнага маладзёжнага фестывалю. Крыху пазней тут стартуе Міжнародны турнір па сілавым экстрыме Minsk Open Cup 2021, гарачыя спаборніцтвы за званне лепшага правядуць пажарныя-ратавальнікі.

Пляцоўка каля Верхняга горада 11 верасня прыцягне аматараў аўтэнтычнага народнага каларыту - тут пройдзе XII Рэспубліканскі фестываль нацыянальных культур. А вечарам знатакі класікі пачуюць сімфонію гукаў ад Нацыянальнага акадэмічнага канцэртнага аркестра Беларусі. Завершыць асноўны дзень святкаванняў 11 верасня маляўнічы піратэхнічны паказ у скверы Старосцінская Слабада ў 22.00.

Асноўным лейтматывам нядзелі стануць спорт і творчасць для ўсіх. Доўгачаканы Мінскі паўмарафон стартуе ад Палаца спорту ў 9.00 і абяцае быць вельмі масавым. А ў Палацы культуры кіраваць будуць музы мастацтва: тут пройдзе гарадскі фестываль творчасці людзей з абмежаванымі магчымасцямі, але неабсяжнымі марамі, фантазіяй і талентамі - "Мастацтва жыць, тварыць мастацтва".

У кожным адміністрацыйным раёне сталіцы рыхтуюць і свае гулянні. Будзе шмат весялосці і шуму, смачных ласункаў, музыкі, танцаў. У афішах - святы двароў, квест-гульні, дзіцячыя спаборніцтвы на бегавелах, кубак па сілавых відах спорту, конкурсы малюнкаў, фестывалі дзіцячай творчасці, турыстычны спрынт, фотавыставы і выставы мастацкіх рамёстваў.

Акрамя таго, у гэтыя дні сваё 100-годдзе адзначыць галоўная ВНУ краіны - Беларускі дзяржаўны ўніверсітэт.

Калі: 10-12 верасня
Дзе: Мінск, пляцоўкі горада

Мінскі паўмарафон-2021

Мінскі паўмарафон - самы маштабны лёгкаатлетычны забег, які з 2013 года праводзіцца ў святочны Дзень горада, ахопліваючы цэнтральныя праспекты, вуліцы і самыя знакамітыя выдатныя мясціны сталіцы Беларусі. У 2019-м спартыўны форум пабіў уласны рэкорд па колькасці ўдзельнікаў: пяты ў гісторыі марафон сабраў звыш 40 тысяч спартсменаў і аматараў бегу з 68 краін свету. Чакаецца, што ў бягучым годзе на Мінскі паўмарафон збяруцца амаль 10 тысяч удзельнікаў. У сувязі з эпідэміялагічнымі патрабаваннямі ўсім атлетам давядзецца выйсці на старт у масках, а праз 500 м пасля пачатку забегу сродкі аховы можна будзе зняць. Першымі - у 9.00 - стартуюць удзельнікі на дыстанцыях 21,097 км і 10,55 км, а ў 11.45 у лёгкаатлетычны бой адправяцца ўдзельнікі, якія зарэгістраваліся на 5,5 км.

Калі: 12 верасня, 9.00 і 11.45
Дзе: старт забегу - Палац спорту, пр. Пераможцаў, 4, Мінск
Даведацца падрабязней

"Сто мінут вакол свету" ў Белдзяржцырку

Прыгодніцкая праграма адкрые асенні сезон-2021 у Белдзяржцырку: гледачам прапануюць правесці "Сто мінут вакол свету". Не пакідаючы меж беларускай сталіцы, гледачы акунуцца ў атмасферу кругасветнага падарожжа, дзе на кожным кроку іх чакаюць новыя ўражанні, хвалюючыя сустрэчы і падзеі, каларытныя персанажы. Гасцей чакае знаёмства з амерыканскімі каўбоямі на конях, канадскімі пумамі, з велічнымі караблямі пустыні вярблюдамі і свавольнымі ламамі, гарэзлівымі поні, віртуознымі гімнастамі і акрабатамі.

Калі: 18 верасня - 5 снежня
Дзе: Беларускі дзяржаўны цырк, пр. Незалежнасці, 32, Мінск

Джаз з Новага Арлеана: квартэт Грэгары Бойда

На вечары квартэта Грэгары Бойда ў сталічнай філармоніі мінчане і госці горада пачуюць сусветна вядомага амерыканскага вакаліста, голас якога пакарае гледача з першай ноты "харызмай Кэба Кэлаўвея, душэўнасцю Эла Грына і музычнасцю Джымі Хендрыкса". У праграме - аўтарскія сінглы ў лепшых традыцыях афра-амерыканскага джаза, фанка, блюза і соўла, класіка амерыканскага джаза.

Калі: 24 верасня
Дзе: Беларуская дзяржаўная філармонія, пр. Незалежнасці, 50, Мінск

Экалагічнае свята "Жураўлі і журавіны Мёрскага краю" 

Адно з самых каларытных асенніх свят - экасвята "Жураўлі і журавіны Мёрскага краю" - праводзіцца ў знакамітым заказніку "Ельня" ў самы разгар сезона журавін. Менавіта тут, у Мёрскім краі, кожны год збіраюць рэкордную колькасць гэтай ягады, а таксама назіраюць за міграцыяй больш як 4 тысяч шэрых жураўлёў і 10 тысяч гусей! Традыцыйна ў дні свята можна паўдзельнічаць у конкурсе па зборы журавін, пакаштаваць стравы мясцовай кухні на сельскіх падворках, паласавацца нарыхтоўкамі з духмяных журавін, а таксама атрымаць асалоду ад экскурсій і паназіраць за чарадой цудоўных грацыёзных птушак.

Калі: 25 верасня
Дзе: Віцебская вобласць, Мёрскі раён, рэспубліканскі ландшафтны заказнік "Ельня"