Падзеі, факты, анонсы

Каляндар падзей у Беларусі: СТУДЗЕНЬ 2023

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

Выставачны праект "Музей ёлачных цацак" у Нацыянальным гістарычным музеі

"Музей ёлачных цацак" напярэдадні Новага года зноў расчыніць дзверы для аматараў арыгінальных упрыгажэнняў. Усяго ў калекцыі, якая кожны год папаўняецца незвычайнымі рарытэтамі, сабрана больш за 2 тысячы цацак з 70 краін свету. Тут кожны прадмет расказвае пра асаблівасці свайго часу, а выстава выбудавана так, каб наведвальнікі даведаліся пра гісторыю стварэння шкляных шароў і іншых упрыгажэнняў з сярэдзіны XIX стагоддзя да нашых дзён. Госці могуць убачыць цудоўныя вінтажныя цацкі, а таксама набыць або нават зрабіць сваімі рукамі падарунак для блізкіх.

Калі: 6 лістапада 2022 – 7 лютага 2023
Дзе: Нацыянальны гістарычны музей, вул. Карла Маркса, 12, Мінск
Даведацца падрабязней

Выстава "Дакрануцца да мінулага" ў Доме-музеі Ваньковічаў

"Дакрануцца да мінулага" заклікае беларускі мастак-ілюстратар Павел Татарнікаў, работы якога вядомы чытачам твораў такіх сусветна вядомых аўтараў, як Уільям Шэкспір, Аляксандр Дзюма, Роберт Льюіс Стывенсан, браты Грым... Ён прайшоў шлях ад першага малюнка да звання выдатнага аўтара, уладальніка вышэйшай еўрапейскай узнагароды "Залаты яблык". Сёння Татарнікаў супрацоўнічае з беларускімі, еўрапейскімі, японскімі і кітайскімі выдавецтвамі…

Калі: 9 лістапада 2022 – 10 студзеня 2023
Дзе: філіял НММ Беларусі "Музей "Дом Ваньковічаў. Культура і мастацтва першай паловы XIX ст.", вул. Інтэрнацыянальная, 33а, Мінск

"Сусветны поп-арт: ад Уорхала да Бэнксі"

Нацыянальны цэнтр сучасных мастацтваў і галерэя FARBA прадстаўляюць новы выставачны праект "Сусветны поп-арт: ад Уорхала да Бэнксі". Публіка ўбачыць каля 80 твораў – ад самых папулярных серый "Мэрылін" і бляшанак супу "Кэмпбэл" Эндзі Уорхала да такіх бліскучых, але спрэчных сучасных прадаўжальнікаў поп-арту, як Рычард Раян і ікона стрыт-арту Бэнксі. Работы выкананы ў розных тэхніках, кожная з якіх лічылася мастаком дастойнай гледача. Тут і графіка, і афішы, і постары, і аб'екты, сабраныя ў прыватных калекцыянераў і ў галерэях. Арганізатары адзначылі, што цяпер поп-арт атрымаў другое дыханне – адраджаецца цікавасць да яго феномену. Выстава прадстаўляе і работы беларускіх аўтараў, творчасць якіх дапаўняе экспазіцыю. Таксама гасцям прапануюць прайсці тэматычны квест, які дазволіць у займальнай форме азнаёміцца з тэмай. У прасторы выставы можна знайсці арыгінальныя фотазоны і зрабіць кадр на памяць.

Калі: 25 лістапада 2022 – 22 студзеня 2023
Дзе: Нацыянальны цэнтр сучасных мастацтваў, пр. Незалежнасці, 47, Мінск

Зімовыя святы ў Белавежскай пушчы

Знакаміты рэліктавы лес Еўропы – а ў беларускай частцы гэта нацыянальны парк "Белавежская пушча" – прымае гасцей круглы год. Але зімой гэта месца становіцца асабліва прыцягальным! Бо акрамя любавання непаўторным хараством заснежанай прыроды і знаёмства з дзікімі насельнікамі пушчы, тут можна правесці дзіўны час у самай казачнай рэзідэнцыі краіны – маёнтку беларускага Дзеда Мароза.

Сезон зімовых свят пачнецца 3 снежня з традыцыйнага і любімага многімі мерапрыемства – прыезду Снягурачкі. У казачным маёнтку яна з'явіцца разам з Матухнай Зімой і яе дочкамі – Завірухай, Сцюжай і Мяцеліцай. У гэты дзень госці стануць удзельнікамі адразу двух займальных фестываляў. "Агні зімы" збяруць сольных выканаўцаў і самадзейныя калектывы, якія будуць выступаць у рэжыме нон-стоп на адкрытай пляцоўцы. Героямі фестывалю "Добрыя чарадзеі" будуць аніматары, якія пераўвасобяцца ў казачных персанажаў. Кульмінацыяй свята па традыцыі стане цырымонія ўключэння агнёў на белавежскай навагодняй ёлцы.

Вядома, з пачаткам зімы колькасць гасцей рэзідэнцыі галоўнага навагодняга чарадзея краіны значна павялічваецца. Бывае, што па маёнтку праходзяць да 6 тысяч чалавек на працягу дня. Як жыве ў гэты мітуслівы час Дзед Мароз, вы можаце даведацца ў новым рэпартажы з пушчы. Дарэчы, зімовыя памочніцы – Снягурачка і Матухна Зіма з дочкамі – будуць у маёнтку Дзеда Мароза да завяршэння Масленіцы (26 лютага 2023).

Калі: з 3 снежня
Дзе: в. Каменюкі, Камянецкі раён, Брэсцкая вобласць, Нацыянальны парк "Белавежская пушча", маёнтак Дзеда Мароза

"Навагодняе падарожжа" ў Белдзяржцырку

Напярэдадні зімовых свят Белдзяржцырк прэзентуе новую праграму. Разам з галоўнымі героямі госці адправяцца ў "Навагодняе падарожжа" па загадкавай Поўначы, дзе сустрэнуць мудрых шаманаў, таямнічых будаўнікоў паветранага карабля, пазмагаюцца з хітрымі і каварнымі разбойнікамі, пазнаёмяцца з паўночным Дзедам Марозам і нават убачаць сапраўдных насельнікаў вечнай мерзлаты – гіганцкіх мамантаў! Гледачоў чакае сапраўдная зімовая казка, напоўненая святочнай атмасферай, авантурнымі прыгодамі і захапляльнымі нумарамі ў выкананні беларускіх артыстаў. У праграме – нумары гімнастаў на лятяючых мачтах і паветранай трапецыі, жанглёраў з бярвёнамі, а таксама на манежы выступяць дрэсіраваныя поні і вартавыя палярнай ночы – беласнежныя тыгры.

Калі: 17 снежня 2022 – 15 студзеня 2023
Дзе: Беларускі дзяржаўны цырк, пр. Незалежнасці, 32, Мінск

Прэм'ера оперы "Гісторыя Кая і Герды (Снежная каралева)" у Вялікім тэатры Беларусі

Прэм'ера оперы Сяргея Баневіча "Гісторыя Кая і Герды" ў пастаноўцы рэжысёра Ганны Маторнай стане яшчэ адным падарункам публіцы ў юбілейным 90-м сезоне Вялікага тэатра Беларусі. Вядомая не аднаму пакаленню дзяцей па ўсім свеце гісторыя пра каварства і жорсткасць Снежнай Каралевы і цудоўную і выратавальную любоў Кая і Герды ўвасобіцца на сцэне галоўнага тэатра краіны ў казачнай оперы для гледачоў любога ўзросту. Дарэчы, сярод тых, хто прыме ўдзел у сямейным конкурсе на лепшую навагоднюю цацку па 20 снежня і прадставіць свой выраб, прысвечаны новай пастаноўцы, разыграюць спецыяльны прыз.

Калі: 24 і 27 снежня 2022; 3, 4, 28, 29 студзеня 2023
Дзе: Вялікі тэатр Беларусі, пл. Парыжскай Камуны, 1, Мінск

Галоўная ёлка краіны: "Сузор'е зубра, або Як выратаваць Новы год"

Кульмінацыяй дабрачыннай акцыі "Нашы дзеці" стане Галоўная ёлка краіны-2022, якая па традыцыі будзе прымаць гасцей у Палацы Рэспублікі. На гэты раз гледачы ўбачаць гісторыю пра юных Раду і Алеся, якія прыязджаюць з бацькамі ў вясковы дом недалёка ад рэзідэнцыі Дзеда Мароза ў Белавежскай пушчы. Там героі даведаюцца пра легенду аб Зорным зубры і зорцы жаданняў, якая здзяйсняе ўсе дзіцячыя мары ў навагоднюю ноч. Аднак нешта здараецца ў Сузор'і зубра – і ўсе зоркі ў ім гаснуць, таму Дзед Мароз пасылае Раду і Алеся дапамагчы Зорнаму зубру. Дзяцей чакае падарожжа ў пошуках таямнічага Выкрадальніка навагодніх зорак, у час якога яны наведаюць розныя свяцілы – навагодніх ласункаў, забаў, традыцый і падарункаў, а таксама пазнаёмяцца з іх захавальнікамі.

Калі: 24 снежня 2022 – 5 студзеня 2023
Дзе: Палац Рэспублікі, Кастрычніцкая плошча, 1, Мінск

Навагоднія святы ў Мінску

З 25 снежня да 7 студзеня – ад Раства каталіцкага да Раства праваслаўнага – горад будзе жыць у асабліва насычаным рытме ўрачыстасцей, сюрпрызаў і сяброўскіх сустрэч. У навагоднюю ноч гулянні разгорнуцца на 22 пляцоўках у розных раёнах горада.

Галоўнымі месцамі святкаванняў у цэнтры сталіцы стануць пляцоўкі ля Палаца спорту, ля Ратушы на плошчы Свабоды і ў Ракаўскім прадмесці.

Тэрыторыя ля Палаца спорту, дзе адновяць атмасферу старадаўняга Мінска:

• з 25 снежня па 7 студзеня кожную гадзіну з 14:00 – інтэрактыўныя паказы з Дзедам Марозам і Снягурачкай;
• з 25 снежня па 7 студзеня ў 19:00–19:45 – інтэрактыўнае тэатралізаванае шоу "Казка ў моманце";
• 25 снежня з 19:30 да 22:00 – забаўляльная праграма "Шчодры вечар" з традыцыйнымі і сучаснымі каляднымі песнямі і танцамі, эстраднымі хітамі;
• 1 студзеня з 00:30 да 4:00 – танцавальнае шоу "Новы год для ўсіх" з дыджэямі і эстраднымі выканаўцамі;
• 7 студзеня з 19:30 да 22:00 – канцэрт для ўсёй сям'і "З Калядамі і Новым годам".

Верхні горад і плошча Свабоды

У адпаведнасці з тэмай пляцоўкі захавальнік навагодніх тайн ратушы раскажа гісторыю пра даўнія традыцыі правядзення Новага года ў Верхнім горадзе. Адной з іх быў навагодні баль, таму з 25 снежня па 2 студзеня ў 17:00 і 20:00 тут будуць праходзіць паўгадзінныя інтэрактыўныя паказы "Баль навагодніх жаданняў".

Пляцоўка на вуліцы Ракаўскай, 25

З 20 снежня па 8 студзеня тут будзе працаваць навагодні кірмаш у суправаджэнні інтэрактыўнай праграмы з казачнымі персанажамі, конкурсамі, караоке, бяспройгрышнай латарэяй, паказам навагодніх фільмаў. Кожны дзень у 18:00−19:00 на сцэне будуць выступаць творчыя калектывы.

Буйнейшыя калядныя кірмашы Мінска адкрыюцца 17 снежня. Самы вялікі размесціцца ля Палаца спорту і будзе працаваць да 15 студзеня. Кірмаш на Кастрычніцкай плошчы будзе адкрыты па 7 студзеня. У навагоднюю ноч яны прадоўжаць прымаць гасцей да 4 гадзін раніцы. У Верхнім горадзе кірмаш прадоўжыцца з 25 снежня па 7 студзеня. Акрамя таго, святочныя гандлёвыя рады з'явяцца ў кожным раёне сталіцы.

Міжнародны праваслаўны фестываль "Радасць" у Мінску

Праваслаўны фестываль "Радасць" аб'яднае ўдзельнікаў з розных краін, у тым ліку Беларусі, Расіі, Босніі і Герцагавіны, Грэцыі, Сербіі, Чарнагорыі, Палесціны. Цэнтрам прыцягнення стане святочны кірмаш, дзе наведвальнікі змогуць набыць абразы і рэдкія кнігі, падарункі і сувеніры ручной работы, аўтарскую кераміку, натуральную касметыку і прадукцыю для здароўя. Дапамогуць стварыць атмасферу адзінства сустрэчы са свяшчэннаслужыцелямі, урачамі, літаратарамі і музыкантамі, выставы, канцэрты і кінапаказы. У дні фестывалю адбудуцца "Калядныя дыялогі", удзельнікі якіх пагутараць з выдатнымі людзьмі краіны – народным артыстам Беларусі Аляксандрам Яфрэмавым, заслужанай артысткай Беларусі Ірынай Нарбекавай, мастачкай Святланай Жыгімонт.

Калі: 22 снежня 2022 – 6 студзеня 2023
Дзе: культурны духоўна-асветны цэнтр "Каўчэг", Далгінаўскі тракт, 164, Мінск

Дзіцячы Калядны баль у Мірскім замку

Калядны баль для дам і кавалераў ад 6 да 12 гадоў, які ўжо стаў традыцыйным, у бягучым годзе адбудзецца ў Партрэтнай зале. Першыя крокі на паркеце юным гасцям дапамогуць зрабіць прафесіяналы. Акрамя асноўнай праграмы, удзельнікі балю засвояць асновы прыдворнага этыкету і прадэманструюць майстэрства ў старадаўніх танцах, а таксама ўволю нагуляюцца і загадаюць самыя запаветныя жаданні. На заканчэнне свецкага вечара кожнае дзіця атрымае падарунак ад арганізатараў.

Калі: 7 студзеня, 12.00 і 15.00
Дзе: Мірскі замак, вул. Чырвонаармейская, 2, г.п. Мір, Гродзенская вобласць

Этапы Кубка Садружнасці па біятлоне ў Раўбічах

У верасні 2022 года ў Рэспубліканскім цэнтры алімпійскай падрыхтоўкі "Раўбічы" адбыўся другі летні этап Кубка Садружнасці па біятлоне, які сабраў больш за 50 мацнейшых атлетаў з Беларусі і Расіі. Асеннія спаборніцтвы для нашых спартсменаў былі шчодрымі на вынікі. Усяго беларускія страляючыя лыжнікі заваявалі 5 узнагарод – 2 залатыя, 2 сярэбраныя і 1 бронзавую. Характэрна, што ўсе медалі – у актыве Антона Смольскага і Дзінары Алімбекавай. Пасля снежаньскага этапу ў Разанскай вобласці, дзе ў жаночым мас-старце на 12,5 км роўных не было алімпійскай чэмпіёнцы Пхёнчхана-2018 Дзінары Алімбекавай, турнір вернецца ў Раўбічы: тут адбудуцца адразу два зімовыя этапы.

Калі: 17–22 студзеня, 23–30 студзеня
Дзе: Рэспубліканскі цэнтр алімпійскай падрыхтоўкі па зімовых відах спорту "Раўбічы", п. Раўбічы, Мінскі раён

XXXV Міжнародны фестываль "Студзеньскія музычныя вечары"

Візітка беларускага Брэста – Міжнародны фестываль класічнай музыкі "Студзеньскія музычныя вечары" – 35-ы раз збярэ таленавітых выканаўцаў і паклоннікаў. На гэты раз у горад прыедуць майстры з 10 краін – Беларусі, Арменіі, Балгарыі, Венгрыі, Грузіі, Італіі, Кітая, Расіі, Сербіі і Сірыі. Знатакоў высокага мастацтва чакаюць вечар джазавай музыкі і канцэрт Маскоўскай аперэты, сольныя выступленні кіраўніка расійскай гільдыі гітарыстаў Дзмітрыя Барадаева і італьянскага флейтыста Антоніа Амендуні. Адкрыюць фестываль Дзяржаўны акадэмічны сімфанічны аркестр Беларусі і народны артыст Беларусі прафесар Ігар Алоўнікаў. Таксама ў афішы форуму – выступленне сімфанічнага аркестра Маладзечанскага дзяржаўнага музычнага каледжа імя М.К. Агінскага. Канцэрт аркестра народных інструментаў Брэсцкага музычнага каледжа пройдзе перад цудоўным Калядным балем, які адбудзецца на трэці дзень фестывалю...

Калі: 9–12 студзеня
Дзе: Брэсцкі акадэмічны тэатр драмы, Брэсцкі дзяржаўны музычны каледж імя Р. Шырмы, Брэст

"Музыка Галівуда. Джон Уільямс" у Вялікім тэатры Беларусі

У 2022-м сусветная музычная і кінаіндустрыя адзначыла 90-годдзе амерыканскага кампазітара і дырыжора Джона Уільямса, які з'яўляецца пяціразовым лаўрэатам прэміі "Оскар", аўтарам музыкі да чатырох Алімпіяд, мноства тэлесерыялаў і канцэртных нумароў. "Адзін дома", "Сківіцы", "Супермен", "Індыяна Джонс: У пошуках страчанага каўчэга", "Спіс Шындлера", "Парк Юрскага перыяду", "Зорныя войны", "Гары Потэр", "Капітан Крук", "Мемуары Гейшы" – толькі невялікая частка карцін, у якіх гучаць музычныя кампазіцыі Джона Уільямса. Менавіта яны сталі асновай для вечара ў Вялікім тэатры Беларусі: паклоннікі маэстра змогуць пачуць вядомыя тэмы з любімых фільмаў у выкананні аркестра пад кіраўніцтвам Вільгельма Кайтэля (Германія).

Калі: 10 і 11 студзеня
Дзе: Вялікі тэатр Беларусі, пл. Парыжскай Камуны, 1, Мінск

Фестываль-кірмаш "Берасцейскія сані-2023" у Баранавічах

Абласны фестываль-кірмаш "Берасцейскія сані", які дэбютаваў у студзені 2022-га, перамесціцца з Брэста ў Баранавічы. Лагатып "Берасцейскіх саней"-2023 стварыла мясцовая жыхарка Алена Матылевіч: аўтар аб'яднала матывы герба Баранавіч з зімовай тэматыкай фестывалю. Форум прадставіць сем пляцовак, якія разгорнуцца ў цэнтры горада, і ў асноўны дзень – 14 студзеня – зойме пляцоўкі каля мясцовых кінатэатраў. Чакаецца, што на працягу трох дзён гасцей фестывалю будуць забаўляць артысты з розных куткоў рэгіёна, а за ласункамі і прэзентамі можна адправіцца на дэгустацыі прадукцыі ад вядучых прадпрыемстваў Брэсцкай вобласці.

Калі: 13–15 студзеня
Дзе: бульвар Штокерау, плошча і вуліца Леніна, Баранавічы

Вялікі навагодні баль у Вялікім тэатры Беларусі

Вялікі тэатр Беларусі запрашае ў ноч з 13 на 14 студзеня акунуцца ў атмасферу цудоўных баляў XIX стагоддзя з захаваннем дрэс-коду і свецкага этыкету. Галоўная тэма студзеня-2023 – "Чароўныя казкі Новага года". Удзельнікаў вечара ў Вялікім чакае насычаная праграма: традыцыйныя балі – Каралеўскі і Венскі, вялікі канцэрт на галоўнай сцэне і яркія праграмы ў Музычнай гасцёўні (Камернай зале), караоке з зоркамі і майстар-класы – па танцах, стварэнні лялькі-абярэга і роспісе салодкіх пернікаў. У час балю госці змогуць зрабіць прагулку па "Млечным Шляху", апынуцца ў "Зале эльфаў", наведаць таямнічую "Гатычную залу", акунуцца ў "Шакаладны фантан", пачуць "Казкі Балівуда" і апынуцца ў непаўторнай "Духмянай казцы Усходу"... Завершыцца баль відовішчным шоу на вуліцы ад тэатра вогненных і светлавых паказаў.

Калі: 13 студзеня, 19.30
Дзе: Вялікі тэатр Беларусі, пл. Парыжскай Камуны, 1, Мінск

Калядны баль у Мірскім замку

Цудоўная рэзідэнцыя князёў Святаполк-Мірскіх запрашае правесці Стары Новы год у атмасферы XVIII стагоддзя. На свята ў Партрэтнай зале Мірскага замка збяруцца кавалеры ў строгіх касцюмах і дамы ў шыкоўных уборах адпаведных свецкаму грамадству таго часу. Таямнічыя маскі і сілуэты, тэматычныя дэкарацыі і жывая інструментальная музыка – усё гэта не толькі створыць асаблівую атмасферу, але і падорыць святочны настрой! Гасцей чакаюць свецкія гутаркі, прыдворны этыкет, забавы ў духу прапанаванай эпохі Асветы – старадаўнія настольныя і рухавыя гульні, танцавальныя майстар-класы, прыемныя сюрпрызы...

Калі: 14 студзеня, 19.00
Дзе: Мірскі замак, вул. Чырвонаармейская, 2, г.п. Мір, Гродзенская вобласць

"Штраус-ГАЛА. Казкі Венскага лесу" ў Белдзяржфілармоніі

Стары Новы год у мінскай філармоніі стане падарункам для знатакоў творчасці аўстрыйскага кампазітара, дырыжора і скрыпача Іагана Штрауса, прызнанага ва ўсім свеце "каралём вальса". Госці вечара зробяць падарожжа ў Аўстрыю XIX стагоддзя. Знакамітыя вальсы і полькі, галопы і маршы, арыі і, вядома ж, мелодыі з аперэт прагучаць у суправаджэнні Дзяржаўнага акадэмічнага сімфанічнага аркестра Рэспублікі Беларусь пад кіраўніцтвам дырыжора Юрыя Караваева. Канцэрт адбудзецца пры ўдзеле салістаў Нацыянальнай оперы і чэмпіёнаў Беларусі па спартыўных бальных танцах, якім трэба будзе перадаць настрой музыкі ў вакале і руху.

Калі: 14 студзеня
Дзе: Беларуская дзяржаўная філармонія, пр. Незалежнасці, 50, Мінск

CINEMA MEDLEY: шоу саўндтрэкаў у Мінску

Пачуць знакамітую тэму з "Зорных войнаў", адправіцца ў музычны свет "Піратаў Карыбскага мора", пабываць на "Чорнай жамчужыне" з капітанам Джэкам Вараб'ём, пачуць арган Дэві Джонса – усё гэта змогуць гледачы эксклюзіўнага шоу саўндтрэкаў Cinema Medley ў "Мінск-Арэне". Лепшыя музычныя тэмы XX і XXI стагоддзяў і іх сімфанічныя сюіты (medley) прагучаць у выкананні сімфанічнага аркестра, аргана і зорных салістаў. Маштабы шоу ўражваюць – 80 віртуозных музыкантаў на адной сцэне, сучаснае візуальнае шоу, магчымасць за адзін вечар пачуць музыку з 16 фільмаў, сярод якіх "Прывід оперы", "Парк Юрскага перыяду", "Пачатак", "Інтэрстэлар", "Гульня прастолаў", "Бэтмен", "Гладыятар"…

Калі: 21 студзеня
Дзе: "Мінск-Арэна", пр. Пераможцаў, 111, Мінск

"Юнона і Авось": аўтарская версія спектакля ў Мінску

Легендарная рок-опера "Юнона і Авось", прэм'ера якой адбылася ў 1981-м на сцэне маскоўскага "Ленкама", упершыню паўстане на мінскай сцэне ў пастаноўцы Маскоўскай дзяржаўнай творчай майстэрні пад кіраўніцтвам народнага артыста Расіі кампазітара Аляксея Рыбнікава. У новай аўтарскай версіі оперы злучыліся традыцыі рускай духоўнай музыкі, народны фальклор і жанры масавай "гарадской" музыкі з вобразнымі, ідэйнымі і эстэтычнымі прыярытэтамі кампазітара.

Калі: 28 студзеня
Дзе: Палац Рэспублікі, пл. Кастрычніцкая, 1, Мінск