13 сакавіка, Мінск /Кар. БЕЛТА/. Перад заключнай у гэтым сезоне жаночай эстафетнай гонкай беларускія біятланісткі займаюць трэцяе месца ў заліку Кубка свету, паведамляе карэспандэнт БЕЛТА.
Перад сённяшняй гонкай чэмпіянату свету ў фінскім Контыялахты ў барацьбе за малы Хрустальны глобус у эстафетах лідзіруюць чэшскія біятланісткі, у якіх 282 ачкі. На другой пазіцыі зборная Германіі - 242 балы, а ў беларускай каманды 226 ачкоў. Такім чынам, калі сёння нашы страляючыя лыжніцы Надзея Скардзіна, Надзея Пісарава, Ірына Крыўко і Дар'я Домрачава выступяць паспяхова, а іх канкурэнткі не будуць у ліку фаварытаў, то ў беларускай каманды будзе шанц узняцца вышэй у кубкавым заліку.
У гэтым сезоне зборная Беларусі ў пяці папярэдніх эстафетах тройчы ўваходзіла ў лік прызёраў - у аўстрыйскім Хохфільцэне і нямецкім Рупольдынгу была другой, а ў нямецкім Оберхофе фінішавала трэцяй. У італьянскім Антхольцы-Антэрсельве беларускі занялі 6-е месца, а ў нарвежскім Холменколене прыйшлі да фінішу дзявятымі.
Чэшскія біятланісткі на ўсіх папярэдніх стартах нязменна ўздымаліся на п'едэстал гонару - у іх актыве 3 першыя і па адным другім і трэцім месцы. Каманда Германіі двойчы была пераможцай і адзін раз заняла трэцяе месца.
Пераможца эстафетнай гонкі атрымлівае 60 заліковых балаў, другая каманда - 54, трэцяя - 48 ачкоў.
Сённяшняя эстафетная гонка 4х6 км стартуе ў 19.15 па мінскім часе і будзе паказана ў прамым эфіры тэлеканала "Беларусь 2".
Заключныя камплекты ўзнагарод 49-га планетарнага біятлоннага форуму будуць разыграны ў бліжэйшыя выхадныя дні:
14 сакавіка
мужчынская эстафета 4х7,5 км (18.30),
15 сакавіка
жаночы мас-старт на 12,5 км (15.30),
мужчынскі мас-старт на 15 км (18.15).
Пасля завяршэння сусветнага першынства лепшым біятланістам планеты трэба будзе прыняць удзел у заключным этапе Кубка свету, які пройдзе з 19 па 22 сакавіка ў расійскім Ханты-Мансійску. У яго праграму ўключана 6 намінацый:
19 сакавіка
мужчынскі спрынт 10 км,
20 сакавіка
жаночы спрынт 7,5 км,
21 сакавіка
жаночая гонка праследавання 10 км,
мужчынская гонка праследавання 12,5 км,
22 сакавіка
жаночы мас-старт 12,5 км,
мужчынскі мас-старт 15 км.