Парламенцкія выбары ў Беларусі

9 верасня, Мінск /Кар. БЕЛТА/. У дзень выбараў дэпутатаў Палаты прадстаўнікоў Нацыянальнага сходу Беларусі, 11 верасня, галоўны тэлеканал краіны - "Беларусь 1" - будзе працаваць у фармаце вялікага інфармацыйнага канала "Парламенцкія выбары", паведамілі БЕЛТА ў прэс-службе Белтэлерадыёкампаніі.

Эфір на тэлеканале ў гэты дзень пачнецца ў 6.20 і завершыцца ў гадзіну ночы. Стаць удзельнікам важнейшай палітычнай падзеі кожны выбаршчык зможа, не толькі прыйшоўшы на ўчастак для галасавання. Сачыць за ходам выбараў па ўсёй краіне дапамогуць выпускі навін на тэлеканале "Беларусь 1". У гэты дзень са студыі "600 метраў" з 8.00 да 18.00 выйдзе 9 выпускаў "Навін" ад Агенцтва тэленавін Белтэлерадыёкампаніі.

Карэспандэнты па ўсёй рэспубліцы ў рэжыме анлайн будуць расказваць аб ходзе галасавання, актыўнасці і настроях выбаршчыкаў, сачыць за работай Цэнтральнай выбарчай камісіі і місій унутраных і міжнародных наглядальнікаў, якія прыбылі ў Беларусь.

Акрамя таго, у выпусках "Навін" запланаваны прамыя ўключэнні з Цэнтрвыбаркама і інфармацыйнага цэнтра па выбарах-2016, які 11 верасня ў 9.00 адкрыецца ў Палацы Рэспублікі.

Першыя вынікі выбараў падвядзе спецыяльны пашыраны выпуск штотыднёвай інфармацыйна-аналітычнай праграмы "Галоўны эфір", які пачнецца адразу пасля закрыцця выбарчых участкаў - у 20.00. Гасцямі ў студыі Белтэлерадыёкампаніі стануць палітолагі і эксперты, у тым ліку замежныя, якія падзеляцца меркаваннем аб ходзе выбарчай кампаніі.

На працягу ўсяго эфірнага дня святочны асаблівы настрой для тэлегледачоў "Беларусь 1" будзе ствараць спецыяльны кінапаказ. Гледачы ўбачаць фільм "Мой белы і пушысты", камедыйны серыял "Сваты" і меладраму "Асабістая справа маёра Баранава".

12 верасня тэлеканал "Беларусь 1" прадоўжыць асвятляць вынікі парламенцкай кампаніі-2016: тэлегледачоў чакаюць самыя аператыўныя навіны і эксклюзіўныя каментарыі спецыялістаў і лідараў меркаванняў.

У эфіры галоўнай радыёстанцыі краіны - Першага нацыянальнага канала Беларускага радыё - будуць выходзіць спецыяльныя выпускі навін у пачатку кожнай гадзіны. У іх запланаваны прамыя ўключэнні з інфармацыйнага цэнтра Цэнтрвыбаркама, прамыя рэпартажы з выбарчых участкаў па краіне, каментарыі ўнутраных і міжнародных наглядальнікаў, а таксама меркаванні экспертнай супольнасці.