Галоўныя навіны

25 жніўня, Мінск /Кар. БЕЛТА/. У штаб-кватэры Нацыянальнага алімпійскага камітэта (НАК) Беларусі 11-13 верасня ўпершыню адбудзецца кангрэс Еўрапейскага саюза спартыўных журналістаў і семінар для СМІ. Удзел у форуме прымуць чатыры дзясяткі ўдзельнікаў з 25 краін Старога Свету, паведамілі БЕЛТА ў прэс-службе НАК.

У сувязі з выбраннем Мінска сталіцай правядзення летняга Еўрапейскага юнацкага алімпійскага фестывалю-2019 (ЕЮАФ-2019) і перамогай Дар'і Домрачавай у намінацыі "Лепшая спартсменка 2014 года" ў апытанні СМІ ў адрас грамадскага аб'яднання "Беларуская асацыяцыя спартыўнай прэсы" (БАСП) паступіў зварот ад Еўрапейскага саюза спартыўных журналістаў з прапановай арганізацыі ў Мінску 3-га кангрэса і семінара. План мерапрыемстваў атрымаў падтрымку ў НАК Беларусі, які выступіў галоўным арганізатарам семінара. Ён быў адобраны ў Еўрапейскіх алімпійскіх камітэтах і пройдзе ў Мінску па праграме "Алімпійская салідарнасць".

Чакаецца, што ў беларускую сталіцу прыедуць прадстаўнікі Аўстрыі, Азербайджана, Арменіі, Балгарыі, Босніі і Герцагавіны, Венгрыі, Грэцыі, Ірландыі, Іспаніі, Італіі, Літвы, Мальты, Малдовы, Сербіі, Расіі, Румыніі, Славакіі, Славеніі, Украіны, Фінляндыі, Францыі, Харватыі, Чэхіі, Швейцарыі і Швецыі.

Плануецца, што ў мерапрыемстве прымуць удзел прэзідэнт Міжнароднай асацыяцыі спартыўнай прэсы (АІПС) Джані Мерла (Італія), прэзідэнт АІПС Еўропа Яніс Дарас (Грэцыя) і генеральны сакратар Чарльз Камензулі (Мальта), кіраўнікі і генеральныя сакратары нацыянальных асацыяцый, а таксама аглядальнікі і карэспандэнты.

Удзельнікі наведаюць "Мінск-Арэну", Рэспубліканскія цэнтры алімпійскай падрыхтоўкі ў Ратамцы і Раўбічах. Еўрапейскія журналісты прымуць удзел у асвятленні спаборніцтваў фестывалю "Гонка легенд - зоркі біятлона за мір" і Мінскага міжнароднага марафону. Таксама ў Раўбічах адбудзецца цырымонія ўзнагароджання Дар'і Домрачавай, названай лепшай спартсменкай 2014 года журналістамі Еўропы.

На семінары, пасяджэнні якога пройдуць у штаб-кватэры НАК, адбудзецца форум па правах СМІ ў Еўропе (радыёвяшчанне), будуць праведзены прэзентацыі Еўрапейскага юнацкага алімпійскага фестывалю ў Мінску ў 2019 годзе, а таксама спартыўных мерапрыемстваў, якія Беларусь прыме ў 2015 і 2016 гадах.

Арганізатарамі кангрэса Еўрапейскага саюза спартыўных журналістаў і семінара для СМІ разам з НАК Беларусі выступаюць Еўрапейскія алімпійскія камітэты, Міністэрства спорту і турызму Беларусі, БАСП.