Галоўныя навіны

8 лютага, Мінск /Кар. БЕЛТА/. У Чэхіі 8 лютага завяршыўся сёмы этап Кубка свету па біятлоне, паведамляе карэспандэнт БЕЛТА.

Жаночую гонку праследавання на 10 км з 4 агнявымі рубяжамі выйграла лідар беларускай зборнай Дар'я Домрачава.

Трохразовая алімпійская чэмпіёнка пайшла на дыстанцыю чацвёртай, адстаючы ад пераможцы спрынту немкі Лауры Дальмаер на 23 сек. Гэты разрыў яна ліквідавала на падыходзе да першай стральбы са становішча лежачы, але там Даша "зарабіла" два штрафныя кругі і пайшла на другі круг 12-й з адставаннем 1 мін. 06 сек. На другой стральбе са становішча лежачы Домрачава была дакладнай, скараціўшы разрыў да 56 сек., а да першай стральбы стоячы прыйшла трэцяй, але пры вельмі моцным снегападзе дапусціла 1 промах. Рашаючай стала другая "стойка", на якой Дар'я прамахнулася адзін раз, але пайшла на апошні адрэзак першай, таму што саперніцы таксама не былі бездакорнымі. На заключнай частцы дыстанцыі Дар'ю Домрачаву з усіх сіл спрабавала дагнаць лідар агульнага заліку Кубка свету фінская біятланістка Кайса Мякярайнен, але беларуска не ўпусціла свой шанц і прыйшла да фінішу першай, паказаўшы рэзультат 35 мін. 22,3 сек. пры чатырох штрафных кругах. Кайса Мякярайнен адстала на 6,8 сек. (4 промахі), а трэцяй фінішавала Лаура Дальмаер (14,9 сек.; 3 промахі).

Астатнія беларускія біятланісткі занялі наступныя месцы: 10 - Ірына Крыўко (+49,1 сек.; 2), 19 - Надзея Скардзіна (+1 мін. 55,1 сек.; 3), 36 - Надзея Пісарава (+4 мін. 35,6 сек.; 6), Настасся Дубарэзава - дыскваліфікавана.

У агульным заліку Кубка свету Дар'я Домрачава па-ранейшаму займае другое месца ў агульным кубкавым заліку, маючы ў сваім актыве 723 ачкі. Наперадзе толькі Кайса Мякярайнен, у якой 750 балаў, а ва ўкраінкі Валянціны Семярэнка, якая знаходзіцца на трэцім месцы, 579 ачкоў.