70-годдзе Вялікай Перамогі
Шчоткіна: Наш абавязак - быць праваднікамі праўды аб падзеях 1941-1945 гадоў
23 красавіка, Мінск /Алена Прус - БЕЛТА/. Наш абавязак - быць праваднікамі праўды аб падзеях 1941-1945 гадоў, якую перадаюць нам удзельнікі падзей тых гадоў. Такое меркаванне выказала міністр працы і сацыяльнай абароны Мар'яна Шчоткіна на анлайн-канферэнцыі, праведзенай на сайтах БЕЛТА і Мінпрацы і сацабароны.
"Мы жывём ва ўнікальны перыяд часу - маем магчымасць асабіста размаўляць з ветэранамі Вялікай Айчыннай вайны, - сказала Мар'яна Шчоткіна. - Пройдуць гады, і ад таго, якую гісторыю будуць вывучаць нашы нашчадкі, як будзе асветлены перыяд ваенных гадоў і роля савецкага народа ў дасягненні Перамогі, будзе залежаць і лёс нашай краіны".
Яна адзначыла, што кожны ветэран павінен быць акружаны клопатам і ўвагай. "Але ніхто з іх не даруе нам, калі гістарычная праўда аб Вялікай Айчыннай вайне будзе скажона. Наш абавязак - быць праваднікамі праўды аб падзеях 1941-1945 гадоў, якую нам перадаюць удзельнікі падзей тых гадоў. Яны ваявалі, аднаўлялі краіну, ім мы абавязаны свабодай і мірным небам, - падкрэсліла міністр. - Нам проста трэба жыць, працаваць так, каб быць дастойнымі іх - нашых ветэранаў".
У Мар'яны Шчоткінай спыталі, ці ёсць у яе блізкія сваякі, якія ўнеслі свой уклад - баявы, працоўны - у Перамогу, і якая сямейная рэліквія, звязаная з вайной, для яе найбольш дарагая. Міністр падкрэсліла, што для ўсёй яе сям'і Дзень Перамогі - светлае і вялікае свята. "Мой дзядзька загінуў у 1942 годзе. Для мяне вельмі дарагія медалі маіх бабуль "За доблесную працу ў Вялікай Айчыннай вайне 1941-1945 гадоў". Звычайныя сялянскія жанчыны, застаўшыся ўдовамі, перажылі голад і нягоды. Пры гэтым не толькі працавалі для Перамогі, выгадавалі дастойных дзяцей, але і ўсё жыццё неслі дабрыню і любоў, цанілі жыццё і Радзіму. У нашай сям'і ёсць удзельнік вайны, палкоўнік, які ў свой час пайшоў ваяваць у 17 гадоў", - сказала Мар'яна Шчоткіна.
версія для друку
зрабіць стартавай
дабавіць у выбранае