70-годдзе Вялікай Перамогі

У Беларусі прайшло ўжо і запланавана каля 300 тыс. мерапрыемстваў да 70-годдзя Перамогі савецкага народа ў Вялікай Айчыннай вайне, больш за ўсё прайшло ў Мінскай вобласці - больш за 193 тыс.

У кожнай вобласці краіны ў 2013-2014 гадах адбыліся святочныя сацыяльна-культурныя падзеі. Напрыклад, у Брэсцкай вобласці - шэраг грамадска-культурных мерапрыемстваў, прысвечаных Дню Перамогі, гадавіне пачатку Вялікай Айчыннай вайны і 70-годдзю вызвалення Беларусі ад нямецка-фашысцкіх захопнікаў. У Віцебскай вобласці прайшла дабрачынная акцыя "Пасылка франтавікам", мерапрыемствы на Кургане Дружбы ў Верхнядзвінскім раёне, прысвечаныя 55-й сустрэчы ветэранаў Вялікай Айчыннай вайны і партызанскага руху Беларусі, Расіі, Латвіі, у Гомельскай вобласці адбылася маладзёжная акцыя "838 вогненных дзён і начэй", грамадска-палітычная акцыя "Парад Пераможцаў". У Гродзенскай вобласці прайшлі вахты памяці, віктарыны, эстафеты "Ад помніка да помніка". Мінская вобласць правяла абласное свята "Паклонімся вялікім тым гадам", а ў Магілёўскай вобласці адбылася раённая эстафета памяці, аўтапрабег памяці "Воіны-інтэрнацыяналісты - салдатам Перамогі", рэканструкцыя гістарычных падзей 22 чэрвеня 1941 года на мемарыяльным комплексе "Усакіна" і закладка Алеі Памяці.

Ірына Дрыга адзначыла, што асаблівай сімвалічнай падзеяй мінулага года да святкавання 70-й гадавіны вызвалення Беларусі ад нямецка-фашысцкіх захопнікаў стала адкрыццё Беларускага дзяржаўнага музея гісторыі Вялікай Айчыннай вайны. Акрамя таго, адбыўся шэраг рэспубліканскіх мерапрыемстваў, у тым ліку з верасня 2013 года па ліпень 2014 года прайшла рэспубліканская грамадска-культурная акцыя "Дарогамі вызваліцеляў".